Galesiaba rakwa du taakwaké Pol kavin nyéga
1
1-2  * Ga 1:11-12 Wuné Pol Jisas Kraisna kudi kure yaakwa du, wuné gunat kéni kudi wakweyo. Guné Galesiaba rate Jisas Kraisna jébaaba yaalan du taakwa, gunat wuné kéni kudi wakweyo. Kéni képmaaba rakwa du kaapuk wunat wadaka kéni jébaa yawurékwa. Jisas Krais naana yaapa Got wale bét wunat wabétka wuné kéni jébaa yo. Jisas déknyényba kiyaadéka Got wadéka tépa nébéle raapdéka wuné déku yéba kudi wakweyo. Jisas Kraisna jébaaba yaalan du las wuné wale rate naané gunat wo, guné yéknwun mawulé yate miték ragunuké.
Naana yaapa Got gunéké mawulé lékte gunat kutkalé yate, yéknwun mawulé kwayéte, naana Némaan Ban Jisas Krais waga male yadu guné miték raké guné yo. Waga wuné Gorét waato. * Ga 2:20; Ta 2:14Krais dé naana yaapa Gotna kudi véknwute naana kapéredi mawulé yatnyéputiké nae dé kiyaak. Kéni tulé wupmalemu kapéredi mawulé yakwa du taakwa de ro. Naané de yakwa pulak kapéredi mawulé yamuké, dé Krais déku kapmu naanat kutkalé yate dé kiyaak. Waga yadénké sanévéknwute, naané apuba apuba Gotna yéba kevéréksaakuké naané yo. Wan adél.
Kraisna kudi male véknwuké naané yo.
Déknyényba Got gunat dé wak, guné Krais Jisasnyét kulé mawulé kérae dé wale apuba apuba miték rasaakugunuké. Wadéka guné Kraisna kudi kaapuk miték véknwusaakugunén. Gorét bari bari guné kulaknyényu. Kulaknyényte guné nak kudi véknwute guné wo, “Wan yéknwun kudi. Wani kudi véknwute kulé mawulé kérae miték rasaakuké naané yo.” Waga wagunéka kwagénte wuné wo, “Aki. Samuké guné bari bari nak kudi véknwu? Wan kapéredi mu guné yo.” Naate wate wuné gunéké sanévéknwu wanévéknwu. * Ap 15:1, 24 Guné nak kudiké guné wo, “Wan yéknwun kudi. Wani kudi véknwute kulé mawulé kérae miték rasaakuké naané yo.” Naate wagunéka wuné wo, “Wan kaapuk. Wani kudi véknwute, guné kulé mawulé kéraamarék yate miték rasaakumarék yaké guné yo. Yéknwun kudi nakurak male dé ro. Wani kudi wan Krais Jisasna kudi. Guné wani kudi male véknwute kulé mawulé kérae miték rasaakuké guné yo.” Wawurén kudi wan adél kudi. Du las Kraisna jébaa yaalébaanké nae de gunat nak kudi wakweyo. Wakwete de gunat yénaa yadaka guné wo, “Deku kudi wan adél kudi, kapu kaapuk?” Naate sanévéknwugunéka guna mawulé kaapuk miték tédékwa.
* 1 Ko 16:22 Mé véknwu. Déknyényba naané Kraisna kudi wakwekwa du naané déku kudi gunat wakwek, guné kulé mawulé kérae miték rasaakugunuké. Wakwenaka véknwugunén kudi wan adél kudi male. Naané bulaa nak kudi gunat wakwete kéga wakweno mukatik, “Kéni nak kudi véknwute kulé mawulé kérae miték rasaakuké guné yo.” Naate wano mukatik naané adél kudi wamarék ye, naané Gotna méniba kapéredi mu yakwa du rate, kapéredi taalat yéno. Gotna kudi kure giyaakwa du nak giyae, guné Kraisna kudi kulaknyénytakne kulé mawulé kérae miték rasaakugunéran nak kudi gunat wakwedu mukatik, dé wawo Gotna méniba kapéredi mu yakwa du rate kapéredi taalat yédu. Wani muké bulaa tépa wakweké naané yo. Déknyényba Kraisna kudi naané gunat wakwek, guné kulé mawulé kérae miték rasaakugunuké. Wakwenaka véknwute guné wak, “Wan adél kudi.” Naate wagunéka wuné wak, “Nak du yae, kulé mawulé kérae miték rasaakugunéran nak kudi gunat wakwedaran, de waga yate kapéredi mu de yo. Deku mé yalaknu. De Got wale rasaakumarék yaké de yo.”
10  * 1 Te 2:4Wuné wani kudi wakwete wuné Gotké wuné sanévéknwu. Kéni képmaaba rakwa duké kaapuk sanévéknwurékwa. Got wunéké yéknwun mawulé yaduké wuné sanévéknwu. Kéni képmaaba rakwa du wunéké yéknwun mawulé yadoké, kaapuk sanévéknwurékwa. Wuné kéni képmaaba rakwa du wunéké yéknwun mawulé yadoké sanévéknwuru mukatik, wuné Kraisna jébaa yakwa du ramarék yawuru.
Krais dé kapmu dé Polét wak déku kudi kure yéduké
11-12 Jisas Kraisna jébaaba yaale wuna némaadugu wayéknaje nyangegu pulak rakwa du taakwa, guné mé véknwu. Wakwewurékwa yéknwun kudi kéni képmaaba rakwa du wunat kaapuk wakwedan. Kéni képmaaba rakwa du las wani kudiké wunat kaapuk yakwatnyédan. Wan Jisas Krais dé kapmu dé wunat wani kudi wakwek.
13  * Ap 8:3 Déknyényba yawurén muké wakwedaka gunébu véknwuk. Wuné Judana du rate Judana apa kudi véknwute apat kapére yate Gotna jébaaba wulaan du taakwat wuné yaalébaanék. Yaalébaante wuné derét akwi viyaasadaké wuné mawulé yak. De Krais Jisasna kudi véknwudaka wuné déknyényba déku kudiké kélik yate Judana apa kudiké male mawulé yate waga yawuréka gunébu véknwuk. 14  * Ap 22:3 Nak Judana du wuna naawi du rate de wawo Judana apa kudi de miték véknwuk. Wuna képmawaara wakwen apa kudi miték véknwuké mawulat kapére yate wuné wuna naawi duwat talakne wuné Judana apa kudi miték male véknwuk. Véknwute Judana apa kudiké wuné miték kutdéngék.
15  * Ap 9:3-6 Wuné déknyényba waga yawuréka Got wuné waga yamuké kélik dé yak. Déknyényba wuna néwaa wunat kéraamarék yalén tulé wuné déku du rawuruké, dé Got wak. Watakne wunéké mawulat kapére yate déku jébaa yawuruké, dé wunat wak. 16 Watakne kukba déku mawulé sanévéknwute dé déku nyaan Jisas Kraisnyét wunat wakwatnyék. Wuné Jisas Kraisna kudi nak gena du taakwat wakwewuruké, dé Got déku nyaanét wunat wakwatnyék. Wakwatnyédéka vétakne wuné nak duké kaapuk yéwurén, Jisas Kraiské kudi bulké. 17 Yate Jerusalemba rate Jisasna kudi taale kure yaan duké wawo kaapuk yéwurén. Wuné du ramarék séknaa képmaa Arebiat wuné yék. Ye kukba gwaamale yae wuné Damaskasnyét yék. 18 Kukba kwaaré kupuk yédéka wani tulé male wuné Jerusalemét waarék. Pitat véké wuné Jerusalemét waarék. Waare wuné dé wale walkamu (15) nyaa male wuné rak. 19  * Mt 13:55Wani tulé wuné naana Némaan Ban Jisasna wayékna Jemsnyét véte dé wale kudi wuné bulék. Pita bét Jemsnyét male wuné vék. Krais Jisasna kudi kure yaakwa nak dut kaapuk véwurén.
20 Kén gunéké kaviwurékwa kudi wan adél kudi male. Yénaa kudi kaapuk. Gotna méniba rate wuné gunat wani adél kudi wakweyo. Guné wani kudi véte kutdéngké guné yo. Képmaaba rakwa du Jisas Kraisna kudi wunat kaapuk wakwedan.
21 Pita bét Jemsnyét vétakne Judiana képmaa kulaknyénytakne wuné Siriana képmaa Silisiana képmaat wawo wuné yék. 22 Wani tulé de Judiana képmaaba rate Krais Jisasna jébaaba yaalan du taakwa wuna ménidaama kaapuk védan. Yate kaapuk wunat kutdéngdan. 23 De kéni kudi male de véknwuk, “Déknyényba dé wani du naana du taakwat viyaapérekne, dé naana Némaan Ban Krais Jisasna yéknwun kudi yaalébaanké dé mawulé yak. Bulaa déku kudi miték véknwute dé déké yéknwun kudi wakweyo.” Wani kudi véknwute waga male de wunéké kutdéngék. 24 Waga kutdéngte de Gotna yéba kevéréknék.

*1:1-2: Ga 1:11-12

*1:4: Ga 2:20; Ta 2:14

*1:7: Ap 15:1, 24

*1:8: 1 Ko 16:22

*1:10: 1 Te 2:4

*1:13: Ap 8:3

*1:14: Ap 22:3

*1:15: Ap 9:3-6

*1:19: Mt 13:55