1 Eunu ege eeta ec madecnu? Ege Anutna eelgec uum igec egeca ihoc ligiannu silail kobolna himec cois bileqan ec madeqan eu coisfo? 2 Qee bahic! Ege cal mecwe mimeb silail kobol eu wele culom. Odocob eu adi ege silail kobolna gaid biluquna? 3 Ege Krais Jisasca gabandumeb wa joigec om kobol euna ege cunug uqana cal mecca gabandumeb wa joigec om. Age eunu qee doginafo? 4 Odocob Memige Anut uqa uqana kobolkobolna Krais Jisas cal mecnadec tulidocob cajen. Eu odiwe egeha sanan mi cebac bilec jic haun toodocnu Anut ege cal mecnadec tuligeceb cajeqannu wa joigecna ege Krais Jisasca gabandom, odocob Anut ege Krais Jisasca osoben qalqalna heel cisigen.

5 Ege Kraisca gabandumeb uqa cal men eu odi cal mom. Eunu ege uqaca gabandumeb uqa ceseli cajen eu odi egeha ceseli cajeqan. 6 Ege odi doqona, silail uqana kobol ege dewenigena cabi ona eu qee mudigiannu, odocob silail kobol eu ege uqana cabi dana haun cain biluqaunnu ege wawige hilah eu wele Krais Jisasca gabandumeig na babalecna tuitu qocobil cal mesin. 7 Ge, dana wele cal men silail kobol eu uqa qee iwaldona eunu uqa silail kobol haun qee odona.

8 Eu mele, ege Kraisca cal mom eunu ege wawige meleeceb egeha uqaca cebac bileqan. 9 Ege doqona, Krais cal mecnadec wele ceseli cajen eunu uqa haun qee cal meiaun. Cal mec eu uqa cilehdocnu gagadicca qee. 10 Uqana cal mec eu uqa saen osolna himec wele cal men, odimei silailna gagadic odoc wooldon. Euqa qila uqa cebac bilina eu uqa Anutnu cebac bilina. 11 Eunu ageha agedodoc wele cal mein, odocob silailna gagadic odoc cain cilehadecdainnu odi cisdoigale. Odocob age Krais Jisasca gabandumeig Anutnu cebac bilegina ec cisdoigale.

12 Silail kobol eu age dewenega eu cal mena cain culdocobil cilehadeiaun. Age dewenegana gale doc me qee eu cain toodowain. 13-14 Qila age loo je bisalu qee bilegina qa age Anutna eelgec uum igec bisalu bilegina. Eunu silail eu agena cilehadec haun qee biluwain. Odimeig age ebenega jaimagaca dewenega amihilon filfil cunugca kobol me qee odocnu silail kobol haun cain utuwain. Euqa age dana eu cal mecnadec ceseli cajen cebac bilia cinigwe age dewenegaca agena cisdocca cunug eu Anut uteiga. Odimeig age dewenega amihilon cunug eu ititom kobol odoqagannu Anut uteiga.

15 Eunu ege eeta odocnu? Ege qila loo je bisalu qee biluquna qa ege Anutna eelgec uum igec bisalu biluquna eunu ege silail cois mecnufo? Qee bahic! 16 Age wele dogina, age dewenega dana oso utimeig uqa co himec toodufeig eu age uqana cabi dana bilegina. Age silail kobol uqana cabi dana bileginafi age euna cal mec gulucdoqagan. Eu odi qeefi age Anutna je toodoc kobol uqana cabi dana bileginafi Anut age dana cajaca ititom ec madigian. 17 Mele, wele age silail kobolna cabi dana bilein qa hibna age Anutna je gadac dah mimeig age wawaga meleeceb je eu qila tutuc bahic toodogina. Eunu ege Anut hegaga doqale! 18 Anut uqa age silail kobol uqana cilehadecnadec begesaden. Odimei age ititom kobolna cabi dana maden. 19 Agena cisdoc eu mahanadec eunu ija dana egena cisdoc toodumig maadigina. Wele age dewenega amihilon cunug kobol gegehinca uqana cabi dana biloloig, odimeig age eunu qisol mec kobol gehgeh odoloig. Qilaqa age dewenega amihilon cunug ititom kobolna cabi dana mudeiga. Odimeig age kobol gun odocnu oodi bileiga.

20 Wele age silail kobol uqana cabi dana biloloig saen euna age ititom kobol uqana cabi dana qee biloloig. 21 Euqa saen euna cel ceteh me qila majanaga adena eunadec oin? Ceteh eu agena aig qoc eu cal mec himec! 22 Qilaqa Anut uqa silail uqana gagadic odocnadec wele begesaden. Odimei uqa uqana cabi dana odi maden. Odocob eu uqana aig qoc eu odi. Age Anutnu gun cocoboig li cebac bilec catanec oqagan. 23 Ge, silail kobol eu uqana ameg eu cal mec himec. Euqa Anut uqana eelgec uum igec eu cebac bilec catanec. Ege egena Tibud, Jisas Kraisca gabandumeb cebac bilocomun cataneqan.