Lukom Angal Bib Hobao Sao waeb bisao o
1
Lukom Njisesom bisao sao arman aol Tiyopilas bor waeb bu pen kisao o
1-2 Aol aondao Tiyopilas o, su ngo nao hayom o bor hobao sao mend bisaol tenaol mendborom ngo bisao sao mbinin elom hondobur, mbes di ngubi tomb di mbinim hindismi ub angal bib ngo tenaol hambunom pangen kao kalam aeben aeben bubur, naom di pangaomun kao njismi ka. Ngub bismil tenaol mendbor andubom ngo bisao sao arman mbuk waeb buklwao ko nen sabismi ub* Njo 15:27; Bis 1:1 nim di ngo bisao sao mbes ora te dubi mao bemberawaol, arman ngo bisao sao hambun sao mbuk waeb bor oborob ora uklwao ko nen sabowao ora. Ngubi tomb ngo bisao sao kang mend pangisi o, njem hambun sao bisao sao te oborob ora pangenin ko nim mbuk ngo waeb bi ka.
Angal mini wesaom Sekaraya bor Njon Mbabtas Biyao Aol maruklesi ko kao kalisao o
Mbes ora kabmanon aol wesmbao Heror ke ndisom su Njuriya maomb bo hasndis tomb Nju semon baolum aol mend obun imbi Sekaraya kismil, aol Abasan sem maomunu baolum aol kongon bimi baebenon is mend obu sisesa. Ngo tomb obun weren imbi Ilisaber kismil, aol Eron obu ten ngo obun ab sumb sisaol, obu di baolum aol semon wane sisesa. Ngub burubur kisbin mbibi tobaklom kone ebe u oborob was bu hasbil, Ngaorom hindisao tomb di Aorao Aondaom bibaebe keyao sao di obun man hambun sao di hul nao haebur khorob sao kang mend nao bisbisa. Ngub bisbi o ten ngom nongnas nao mari hapele was bao habur, mbibi tobakl hungi sam sam bisbil mbibin nongnas is mend and nao sisesa.
Ngo tomb baolum aol baebenom akl akl bismi nda ub aol ngon semom Ngaoron kongon akl akl bu, bu hasmi tomb Nju semom bismi ub embi kongon aebom was buklaob ko ne mi mi bubur hondo mao bemberaesmil, kao ebe ora peben haoroklme sao embi aol Sekarayam haoruklao ko mao bembera hindismisa. Ngub bismil aol ngom kao pebe sao mend Ngaor bor kalo haoruklbur, Aorao Aondao Hen Moroklme Anda andaon hondaesesa. 10 Ngub hondaesaol Nju semom kao pebe sao ngub haorismi tomb, mbinim bismi ub tenaol hambunom Ngaor bor kao kaloklbur and ngon dera nan kiril mba ber mba hasmisa. 11 Ngo tomb and ngon andaon Aorao Aondaon angal mini wesao mend obo pindib pabur, kao pebe sao haoroklme to ndan ki tao nan hasaol aol Sekaraya ngom hindisesa. 12 Ngub hondobur kisaon aol ngom pakl aondao ora homo burisao po wisesa.
13 Ngo tomb angal mini wesao ndam obu bor kakl, Sekaraya o, njem Ngaor bor kao kalale ub obum pango hayao ko kao njukl ubukl ngao, pakl nao hom ka. Njen were Ilisaber ke ndam njen isi mend maru waklaong, obun imbi Njon ko karu wibi. 14 Nas ngo obu obun amom maruklao tomb njem di werek bubur turi homoklesil, tenaol mendbor hambunom di turi aondao bu ora homoklemi. 15 Aorao Aondao obum nen sabeyao ub obu aondao imbi wi ora soklao. Nas ngo obum ib waen di he soklme ib buri ngubi hakl di nao noklao ora. Obu wen mar paklao ora tomb di obun kone bor Wesao Ebe Tangar nda hae ora maru uklao. 16 Nas ngom su Isreyel tenaol mendbor andub ora mbinin Aorao Aondao Ngaor hayaol wakl kone baol maonaoklbir pen lao. 17 Obu Ngaoron man mini aol ora soklaol, Wesao Ebe Tangarom man mini aol Ilanjan kone bor hondabur buri mao palaesao ub buklaol, obu di Ilanjam kone u hasao ubi u haklao. Nas ngom mbini aol baebenom di wakl kone u bokeyobur mbinin nongnasol kone win lao. Obum mbini hul ha kone awis haroklme baeben di wakl kone u bokelen ko, kone dund se wi oborob bimi baebenom kone woroklme ub win lao. Nas ngo obum Aorao Aondao eben ko obun sem hambun man man bu mao baraklao ko angal mini wesaom ngub kisesa.* Mat 17:11-13
18 Ngub kisaol Sekarayam angal mini wesao nda bor kakl, Wao. Yao tobakl hungi ora inj e bo? Nim asub buklaol hondobur njem heneng kal ko ne saboklwaob? kisesa. 19 Ngub kisaol angal mini wesao ndam obu bor ko san lubur kakl, Pangal. Ninao imbi Ngeberiyel ora ubukl ol, ni Ngaor hayaol bao haruklu ka. Obum ora angal bib ebe ngo njem pangenin ko kao kalokl pu kaonaol ubukl ol,* NjuS 1:14 20 nim kao njanda ub heneng ora buklao o, njen kone taol taol bu heneng ora buklao ko nen nao sobal ol nje e beb nao ke was haklesi. Ngub was habur mabor nim ngo kao njanda ub buklao tomb oran, njem wakl angal lesi ora ko angal mini wesaom ngub kisesa.* Luk 1:45
21 Ngo tomb tenaol dera hasmi nda baebenom Sekaraya ngubi tomb pen dera oboklao ko nen sabismi o, obu Ngaor Hen Moroklme Anda ngon andaon bor bao habur pen dera nao ibisao tomb mbinim burir bismisa. 22 Ngub bismil mabor obu dera ibisao tomb obun pondo pe minisaol, obum angal kokl buwaesaol hondobur, obum andaon bor obam sao menjao haondaonaol bene ko nen sabismisa. Ngub nen sabismil obun kim was menger mu habur, e beb nao ke was bao hasesa. 23 Obum bao hor kab teb ngub was bao bu haklbir kisaon, mabor aol Sekaraya ngom Ngaoron kongon ngo bu paesao tomb obun anda pisesa.
24 Ngo tomb mabor obun were Ilisaberom nongnas sen homobur, obu hungum ek ukl su oran mupango sub was burubur kakl, 25 Aorao Aondaom ngubi tomb ni hond aondao ora homobur oborob ora bi ol, nao tenaol bor ni ko mende sakl nao poloklwao kisesa.
Angal mini wesaom nong Mariya bor Njises maruklesi ko kao kalisao o
26 Ngo tomb mabor ten Ilisaber nda nongnas sen homo win ek ukl dowa oran pibi hasao tomb, Ngaorom obun angal mini wesao Ngeberiyel ke mend nje and lobokl lobokl Nasarer su Kalili bor pu kisesa. 27 Ngub kisaol nong is mend obun imbi Mariya kismil, su ngo bor birisao o obu nas Njoseb ke mend hasao on sokl kal hae burubur obun anda biri non bi sisaol, nas Njoseb ngo obu di Debir semon isi hasesa.* Mat 1:16-18; Luk 2:5 28 Ngo tomb angal mini wesao ndam nong Mariya ngo birisaol obobur kakl, Aorao Aondaom nje haru habur bisur aondao ora baonaong, njen kone bor sub tibaen as ko ora biribi kisesa. 29 Ngub kisaol pangobur nong Mariya ndam burisao po burir aondao ora biyubur, obum angal ngon te asub ko leb ko obun kone taol taol bu nen aondao ora sabisesa. 30 Ngub bisaol angal mini wesao ndam nong nda bor wakl kakl, Mariya o, Ngaorom njel kone u turi aondao ora homeyaong, nje pakl nao homaebe ora. 31 Pangal. Nje nongnas sen homobur isi maruklesing, obun imbi Njises ko karu wibi.* Mat 1:21-23 32 Nas ngo obu aol aondao imbi wi ora haklaol, mbinim obu Ngaor Aondao yubu oran isi hae lemi. Obun ab sumb Debirom aol wesmbao aondao ora habur buri palo maeb ha maomb bo hasao ub, naon Aorao Aondao Ngaorom aol ngo obum di ngub buri palo maeb ha maomb bo haen lao. 33 Ngub buklaol obun ab sumb Njekob sem hambun maeb ha maomb bo habur laon, obum ngub maomb bo ha kimb ora buklao kisesa.
34 Ngub kisaol nong Mariyam angal mini wesao nda bor kakl, Wao. Nao aoli nao hae ni nong ora bereng, nim asub bubur maruklwao? kisesa. 35 Ngub kisaol angal mini wesao ndam obu bor ko san lubur kakl, Ngaoron Wesao Ebe Tangarom njen hibi umu bor hondabur, Ngaor Aondao yubu ora ndan burim nje men mbaklao tomb njem nas ngo maruklesi. Ngub maruklesil Ngaorom nas ngo obu komb bi ora haen kisao o ora yaol, obu Ngaoron Isi ora hae lemi kisesa.* Mat 1:20 36 Ngub kobur wakl kakl, Pangal. Njen bab hungi Ilisaber ke nda mbinim obu ten habele nongnas nao marib se ora bere lome o, obu nongnas pango win ngubi tomb ek ukl dowa oran pibi harnaol, ten heyao ngo obum di isi maruklao ora. 37 Ngub buklaol Ngaor obum menjao bukl buwa nao bib se ora hayao ko angal mini wesao ndam ngub kisesa. 38 Ngub kisaol nong Mariya ngom obu bor kakl, Pangal. Ni Aorao Aondaon kongon biyu nong ora bereng, njem ngo kao njiril ub ba sin di ebe was kisesa. Ngub kisaol angal mini wesao ndam paokl pisesa.
Nong Mariyam ten Ilisaber hondokl pisao o
39 Ngo tomb nong Mariya obun su ngol baoraoklbir Njuriyan su and te mend yu manda bor wisaol, ngo bor penar bu ora pisesa. 40 Ngub pobur kisaon obu aol Sekarayan anda hondabur, aol ngon were obun bab Ilisaber nda bor, nao bab ko turi homo taeki kisesa. 41 Ngub kisaol ten ndam nong Mariyan angal ngo pangisao tomb nongnas ngo obun tombao ndaon bor birisao ndam el bu nuklu taokl en aeben bu pesesa. Ngo tomb Wesao Ebe Tangarom ten Ilisaber ndan kone bor aondao bu ora hondaesaol,* Luk 1:15 42 ten ndam nong Mariya bor angal buriyab ora kobur kakl, Ngaorom nje turi homo njel aondao bu ora kone waoraoklao om mbini ten kone ebe wi aeben o bereyem baeben turi homaoklao ub di men mbayao ora. Njem nas ngo maruklesi o di Ngaorom obul aondao bu ora kone u turi hom ha was haklao. 43 Ngub buklaong nao Aorao Aondaon am ngom ni non bi ngo asub ko saor mu hondokl obaokl balem? 44 Pangal. Njem ni taeki kaenda pangowao tomb nongnas ngo nao tombao ndaon bor beremon werek bu, el bu aondao bu ora nuklu taokl en aeben ba kisesa. 45 Ngub kobur kakl, Aorao Aondaom nje bor kao njaonao ub njem heneng ora buklao ko nen sabobur obul hul ha ora hael ngao, njem werek bu turi aondao bu ora homaebe ko ten Ilisaberom ngub kisesa.* Luk 1:20
Nong Mariyam we ko Ngaor bor kaoya kisao o
46-49 Ngo tomb nong Mariyam kakl,
Ni Ngaoron kongon biyu nong
Kang ndi nao mini ora bere o
Obum ni non bi ngo turi homo kone wiyaol
Nao konem Aorao Aondao bor
Aondao bu kaoya kao was lao.
Ngaor nao bu maoraoklao aol ndam
Ni non bi ngo turi homo kone wiyaol
Nim obu di turi homo
Nao kone bor werek aondao ora bin beraklo.
Ngaor obu buri pon pae aondao ora nda
Obun imbi ebe komb bi ora yao.
Obum ni bor hobao sao aondao ora ngo be o
Tenaol sem hambunom maru wam aeben buklemim
Nong ngo obul kone u turi mao homaesao lemi.* Luk 1:25; Luk 11:27
50 Mbes mari baeben di wen maruklemi baeben di
Ngo hakl hambunon obu pakl homo haklemi baeben
Obum hond homo bu mukalo.
51 Ebekone puklmi baebenom
Naom ngo sao ngo sao buklmao ko nen saboklme o
Obun burim ngo baeben
Lu taol peyo buri ken kisao.
52 Buri palobur maomb bo haroklme baebenom di
Ngub nao maomb bo haen
Obum men kang mao saesao.
Imbi nao wi men kang so boroklme baeben
Obum aondao ora mao hasao.
53 Obum dem homo boroklme baeben bor
Hobao sao ora ngaorukl pelen taol bu kalisao.
Andub sao u haroklme baeben bor
Obum menjao nao wi ki hobaol birin kobur
Menjao nao mini ora pen kisao.
54-55 Naon ab sumb wil baeben bor
Buklwao ko kao kalisao ub kone nao tuwae
Obun kongon biyao aol Isreyel di
Ki taokl kalo bisur bisao.
Naon sumb Eberehem di
Obum maru wam aeben aeben bisao hakl di
Ngo baeben bor nim buklwao ora kisao ub
Aokl nao hemen beyabur
Hond homo bisur bi aeben saraoklao ko
nong Mariyam ngub kisesa.
56 Ngo tomb nong Mariya Ilisaber hesa ek ukl teb mend bao baoraoklbir wakl obun anda pisesa.
Njon Mbabtas Biyao Aol marisao o
57 Ngo tomb ten Ilisaber nda nongnas marukl peb se tomb sisaol obum nas marisesa. 58 Ngub marisaol ten ngon sem baeben di obun tenaol sango baeben di, Aorao Aondaom ten Ilisaber nda hond homo bisur aondao ora bisaol hondobur, mbini hambunom turi homo werek bismil, ten ngo obum di turi aondao ora himisesa.
59 Mabor bao hor duklab oran pibi hasao tomb mbinim nas kang ngo soweb bi ha songol pe hakl obobur, obun abon imbi Sekaraya kismi ub nas ngon imbi di Sekaraya lomao ko nen sabismi o,* Luk 2:21 60 nas ndan amom inj ora kobur kakl, Obun imbi Njon ora lomao kisesa.* Luk 1:13 61 Ngub kisaol mbinim ten nda bor kakl, Nje semon aol is mend Njon ke mend nao hasaong, asub ko kal? kismisa. 62 Ngub kobur kismin mbinim nas kang ngon ab bor ne muklbur imbi aeb lomaob ko, kim was menger mubur kao kalo hasmi nda ub kao kalismisa. 63 Ngub bismil aol ndam kim menger mu mbini bor bobae mend njib kobur, bobae ngo bor obun imbi Njon ora ko waeb bisaol, mbini hambunom burir aondao ora bismisa. 64 Ngub bisaol bombor ngo ora tomb wakl obun heke baol baol kisaol, obum angal oborob kobur Ngaor bor kaoya kisesa. 65 Ngo tomb mbibin tenaol sango ngo hasmi nda baeben hambunom pakl homo burisao pobur kismin, ngo bisao saon arman hambun sao su Njuriya ngon yu manda hakl bor di kam aeben aeben bismisa. 66 Ngub bismil angal ngo pangismi baebenom Aorao Aondaom obun buri nas ngo obu bor taol bu kalenesal ko mao bemberabur kismin, mbinim ngo pangismi saon was nen sab hakol bu burir biyubur kakl, Nas ngo and so haklao tomb obu asub bi mend soklaob? kismisa.
Sekarayam Ngaorom wen ngo sao buklao kisao o
67 Ngo tomb Ngaoron Wesao Ebe Tangarom nas kang ngon ab Sekarayan kone bor aondao bu ora hondaesaol, Ngaorom wen ngo sao buklao kobur kakl,
68 Isreyel semon Aorao Aondao Ngaorom
Obun tenaol bisur bu, bu muklbur ibisaong
Naom obu bor kaoya kem ora.* Luk 7:16
69 Obun kongon biyao aol Debirom
Maru wam aeben aeben bisao on is mend ngo
Naon bu maoraoklao aol buri ora eben karaokl.
70 Mbes obun man mini aol komb bi hasmi haklon ne bor
Obun angal ngub kao deraesao.
71 Inin saond bi baebenom ini nao lin ko
Bu muklwao ora kisao.
Ini ko homoklme haklom ini nao men mbaen ko
Bisur buklwao ora kisao.
72 Naon sumb wil baeben bor
Ini hond homo ki taokl njuklwao ora kisao.
Nim hobao sao ora mend buklwao kisao ub
Obum nen sab hakol ora beyao.
73-74 Naon ab sumb Eberehem bor
Nim buklwao ora ko mao kobur
Njem maru wam aeben aeben buklesi baeben
Mbinin saond bi baebenom nao lin
Bu muklwao kisao ub nao bor ora kisaol
Naom pakl nao heme
Obun kongon bi hakol ora baomun ko kisao.
75 Nao obun sem komb bi hamun kisaol
Nao nao heme sul bao haklmao tomb
Obum naom oborob dund se ub was bu hamun ko
Eberehem bor ngub kisao.* Tat 2:12-14
76 Nao isi o nje Ngaor aondao yubu oran
Man mini aol hael lemi.
Njem Aorao Aondao poklao hareron
Bu ware haklesi tomb obu mama oboklao.* Mat 3:3
77-78 Njem mbini obun sem baeben bor
Inim khorob bismi sao inin kone bor wiyao o
Naon Aorao Ngaor obu naol kone u
Hond hom ha hayao ndam wakl kunabur
Ini bu muklao ora ko mbinim pango birin
Kao kaloklesi ora.
Obum nao hayom ol bao yu heben bor hakl
Bu taokl eben kam kam bubur
Nao bu muklao ora.
79 Nao hambun em hundur wi bor habur
Pe paklbur haroklmao o
Naom kone bor tibaen puklmi hareron
Sub as ko paomun ko
Bao ngub eben lao ora ko
Sekarayam ngub kisesa.* Mat 4:16
80 Ngo tomb nas kang nda obun toklo ebe ora and sisao ub obun kone bor di oborob ora haru and sao sao bisao o, obum pibnao su Isreyel tenaol bor Ngaoron angal kao kalo hasao nda ub nao bi aeben anga tomb, obu hungum su tenaol nao biri bor bao hasesa.* Mat 3:1; Luk 2:40

*1:1-2: Njo 15:27; Bis 1:1

*1:17: Mat 17:11-13

*1:19: NjuS 1:14

*1:20: Luk 1:45

*1:27: Mat 1:16-18; Luk 2:5

*1:31: Mat 1:21-23

*1:35: Mat 1:20

*1:41: Luk 1:15

*1:45: Luk 1:20

*1:46-49: Luk 1:25; Luk 11:27

*1:59: Luk 2:21

*1:60: Luk 1:13

*1:68: Luk 7:16

*1:75: Tat 2:12-14

*1:76: Mat 3:3

*1:79: Mat 4:16

*1:80: Mat 3:1; Luk 2:40