Filipai thofroh gontwat
Porr dwandfakhato htafmot
Barkof kfo nuhas mrokfom
Porr wandfamort ndar gontwat. Ror Yuropko yihato Bro Nkifrarhu hingrneft kasinyamo barkof kmit. Filipait Masedonia Profins korht. Porr nd kmi Filipait Bro Nkifrarhu hingrneft kasinya tanyhato wom kmit tfit yimor. Wom kmit yi hingrna hasetrn fakmomr. Yakhato kalabus htamomr. Kalabus tohhato wanyakmor Filipaithu Kristenm wom yimam yihato tfit wom yima yuhum hemotmm nd rom wanyuk mrokfom mfafhonimomm. Nd mrokfom ror wanyakmohat nhai krhohato rorhu krho yima yuhurhu mrokfom tfit ndar gontwat htarmorm. Nhai. Ror Jisasr yakitoh kihhato tohmor. Ndnetrn ror be yindhor yima yuhurpno tohmor.
Porr Bro Nkifrarhu hingrneft tohhato marufen duhatr rhumohat, Filipaithu Kristenmn marufam hta nhafohhato htafhemomr. Ndnetrn Porrhu kfo yindhor mrokfot ndar gontwatn htafmort. Yo womt kalabus tohetrn duka memor, “Na kalabus tohwa mrokfot Filipai thofm wanyakruhamn bok dukefm yakruhamn yima yuhum krhorahmm.” Ndnetrn wom kfo bmta mrokfom gontwatn htafmorm.
Porr kfo memorm, “Nd niko Jisasrpno yakmo nfri toh nmbuhati nfri yima dukefr, nhai Judaroh nkifra boririfhut hikhato yakrmokomr. Nhai. Jisasr hikhato fakmokomr.” Memorm, “Jisasr tohmo toheft tohhikfot. Jisasr nhai marimor, ‘Na bro yimaya,’ yo nhai turhu dukefr hikrmor. Nhai. Ror be hifa yima yuhurn Bro Nkifrar hayuk hingrnefrpat fakitohmor.” Kfo memorm, “Yimam Kraisrpno brbo frtkafwam, rroh yima yuhum miyorhwamm yindhor rifhurparpno korhrm.”
Ndar gontwathu mrokfom hti thombat, htirahn Porr be tu marbitn htamorm Filipaithu Kristenm.
Porrhu tamoh tamoh nefm Filipai thofm hti dukamoumr. Ndnatn Porr bro yindhor rifhurpno tohmor.
1
(Sapta 1—4)
No Por Timotirono Jisas Kraisrhu hingrneft hingrnewa yimayeno. No niko Filipaithu yimako dukewunonko. Ndnettn na Pora wandfiwant ndar gontwat. Niko Filipaithu yimako, Krais Jisasr hikwako yo niko pastoko yo niko Kraisrhu hingrneft hingrnanuhiwa yimako, nikmoh yufampno ndar gontwat htefiwant. Nmoh Bro Yifemrkoni nmoh Nungothet Jisas Kraisr nikmoh toh nmbuham atoh natwihkahfko ayak marnyatwafko.
Porr Bro Nkifrar kfo yindhormo yuhat
Yiha yiha na nikmoh dukefr yak thoft, Bro Nkifrar kfo yindhorwanr. 4-5 Na nikompno barkof mtohakni-hato gutnius mrokfot Filipait pthakni-mohat, hifa nikomn nd mrokfot bi yakhato, tfit nikompno rpat nd gutnius hingrneft hingrnanuhaknimokma. Rihingrnakmohat to be toko yuhre hingrnanho hanitkma. Ndnatn nanhu yima yuhur yindhorwor niko yutahato kfo bruttna yindhorneft. Nanhu htiyeft inji htitant, Bro Nkifrar bi nikompno bi inji ndhtet dborioh hingrneft rihingrnakmohat, to be nikompno hingrnahany hingrnahany Kraisr nierahr. Niko nanhu hingrna tamnouwa yimayeko. To na ndhtet yimena Bro Nkifrar yuhuwafhato dhemo hingrneft hifa nikomn kakitoh-nhohnewukma. Na kalabus tohneft o kalabus toh duha yimam kangm gutnius ayak thunomt o finji ananomt hifa nikompno rpat tohhato gutnius yonm kanjo kakitohwonomt. Nhai yimam gutnius mrokfot finjinakfot. Bro Nkifrar nanhu yima yuhur htitworr. Na tu kfo mif mifwanko, nanhu yima yuhur niko dukewur nikmoh yi htineft. Krais Jisasr niko duka yuhuwafmo kanjo inji dukiwanko.
Na niko yutahato kfo bruttna thombat, nikmoh yima nayak nanyima-neft, o yima nayak marnyaneft yo tuko nahti duka nahti dukaneft, nd neft kanga mfro mfro yakitohaknikah-komn, Bro Nkifrar dukewa dukef yuham hti duka tungunaruhakommn yo hti duka tungunarahkomm fasoh nefmi dborioh nefm. Ndm kfo bruttne-wanko. 10 Fasoh nefm hti nhta mirahko ndm fasoh nefem. Dborioh nefm inji buga, hti nhtarahkomm. Hti nhtaruhakommn, nikmoh toh nmbuham be hifa toh marnyarahko. Nhai wom fasoh nefm wom yimam yak nuhasruhatkomm. Be hifa dborioh toh nmbuhatn toh hasetkomn Kraisr yawihnerahr. 11 Nd Jisas Kraisr yak nuhasyuk dborioh nefrpam womm yak nuhasruhatkomm womm nikmoh dborioh nefm htiruhamn Bro Nkifrar kfo yindhorrahmr.
Porr kalabus tohmotr Kraisrhu mrokfot bromot
12 Niko nanpno hingrnewa brata-kfot kanga, akfo dukayanko. Mirahko ka bi kalabus tohwarn gutniuskfot ka nhai wom yiruhatt. Nhai. Kfiwanko nd tkittn gutnius tfit hingrneft mburaknitatn hingrneft mfro mfro yiyaknitt. 13 Nd asharhof yimam yo kingrhu kuny kmifat tohukatohwa yimam na kalabus htamo nmbuhat htihato kfo memom, “Na Kraisrhu gutniuskfot kfiwota yakhato kalabus htamoma.” 14 Bok yimam asha Kraisr hikwam na Bro Nkifrar tohukatohmo nmbuhat htihato rom bi Kraisrpar rroh bro dukefm htewum. Nhai wom yakrme yima yuhumpno rhukahmm. Kraisrhu mrokfot ptha habri thombat, nhai yakrme hanyhato pthakahmt bro rifiny skitm. Nhai. Rifiny skitm tohhato pthiwumt.
15-17 Kfo ptha htfas thombat womrpam kfo yuhuweh htfaswom. Kangm, “Tamohmpno Porrpar Bro Nkifrar yak marnyewatr kmi kmi rorhu yufarpat kfo yindhorwam? Nom to inji kangnom Bro Nkifrar ayak marnyakahtrnom nmoh yufam kmi kmi akfo yindhor habrimnom.” Rom ptha yuhuweh htfas thoft, rroh dukefm duka kangm, “Inji akfo htfaskahtnom, na Pora wanyakrhoyann yima yuhur krhorahra.” Be yuwi kangm, “Wom nfri krhopam ahtanomr.” Ndnetmn inji newum. Womm nd hifa yima yuhetm rroh dukefm duka kangm, “Tamohmpno Porr kfo yuhuweh htfasruhanomr? Nom be gutniuskfot akfo htfaskahtnom kmi kmi nd gutniuskforpat broniraht. Ror be Bro Nkifrarhu hingrnefthu htiyafohany yuker. Nd hingrneftn Bro Nkifrar fak htamorr. Kraisr hik duha yimam mirahm, ‘Akfo dburna inji ananomt tfit rorn tohhato kfo nuhas hik marnyarahrm.’ ” 18 Na nd kfo yuhuweh htfaswa yimam na nhai kfo mekfot, “Tamohmpno inji kfo yuhuwehwama?” Na nhai inji kfokfot. Nd kfo yuhuwehet yimami nd hifa yima yuhet yimam rom bugam na yindhorwanm Kraisrhu mrokfot romn kfo ptha htfaswatmt.
Porr kangr atohkahann Filipai thofm kfo bmtaruhanm
19 Nanhu yima yuhur duka kangr, niko Filipaithu Kraisr hiket yimako kfo bruttniwotkma Jisas Kraisrhu Yafothat toh natwihwota. Rot kforaht na fnahniruha. 20 Toh bmtarhoyann ptha thombat, nhai bso yewirnano yimtnahato ptharhota. Ptha brorhotann mrokfom wanyrahmm. Na yima nfriya tohan o fnohniya dborioh nefm na nayukm yimam htiruhamn Kraisr kfo yindhorrahmr. 21 Nanhu htiyeft inji htitant, yima nfriya afo ftoha nhai mrokfom. Kraisrhu hingrneft tohhato hingrnaruhant. Fnohane ndt to hifa mrokfo duhatet. Nd tkittn Kraisrpno yi tohruha. 22-23 Afo yima nfriya ftohane, be Kraisrhu mrokfot kmi kmi kfo ptha fnahruhant. Nd hus yima yuhuf korhwofa. Bro yima yuhur duka kangr, hifa anohkahann be Kraisrpno amtoha. 24 Tfit wom yima yuhur nikom mdukekwoyann kanga afo atohkahann Kraisrhu mrokfom kfo bmtaruhanko. 25 Nanhu yima yuhur inji htitanr nikomn afo mdukak hanita, kanga afo niko Jisasrhu mrokfom afo wayakitoh bmtakomm, nd dukeftpno afo tohhato nikompno niahato Kraisrhu mrokfot kfo ptha bmtarhotanko Jisasrhu mrokfot yakitoh bmtaruhakomn yima yuhum yindhorrahmko. 26 Na afo yima nfriya ftohann nieya nikmoh kmit, be nhaf Krais Jisasr masat kfo yindhor mirahko, “O hifa Kraise toh rafomotnr, nhai yimam wasrmomr. Asor yima nfrir tohwarn nia kau hafotwornom.” Inji kfo yindhorrahko.
Porr yakyuk krhopam kanjo Filipai thofm yak hnerahm
27 Bro mrokfot kfiwanko. Nikom tohyuk toh nmbuham, be Kraisrhu mrokfot kfiwa yuharpat toh hikkfot. Na be tukann yima nfriya afo ftohane, ee btn tuka nia htiruhanko. Nhai asha afo kalabusn ftoha, kanga nikmoh toh nmbuhathu mrokfot awanyaktwoya amitwam, “Filipaithu Kristenm, nhai rinatuhtakahm. Rpatn rpa yima yuhurparn tohwamn Kraisrhu mrokfot kukatohaf hanitmt. Yimam kangm faso ahanyinomt o kfo dburnanomt, romn tfit kfo hik bohik marnyewumt. Inji newatm Kraisrhu mrokfot buriwut.” Na kanga inji awanyaktwoya. 28 Yo tu bro nmbuhat na kanga awanyaktwoya amitwam, “Nhai yakrmikahm Kraisrhu mrokfom yak dburnayuk yimampno nna kfo hamuh nna kfo hamuh thoft. Tum Kristenm rpatn natoh dbkafwamn Kraisrhu mrokfot kfo hta bohta marnyewumt.” Na kfiwanko, inji rpat tohhato Kraisrhu mrokfot yakitohhato ptharahkomt, be nd nikompno nia pthayuk yimam mhti yanhorahmko. Mhti yanhohato kfo mirahm, “Nom injina injinaneft, Bro Nkifrar nom yak batiruharn, Filipai thofmn yakmiyak-rahr.” 29 Ndnatn nikmoh toh nmbuham be rpat tohhato rpa yima yuhurpar yakitohkfot. Bro Nkifrar hifa nikomn hti dukahato Kraisrhu hingrneft wafak htamorko. To mirahko ka be rorhu mrokfothu hiknefrpat hikkfot nhai, krhopam rpat yakkfot. 30 Niko htimoko na Filipait tohhato yakmo krho nmbuham, yo tfit arihat na asha Romt tohhato yekwa krho nmbuham wanyekwoko. Niko krhopam yakneft mirahko ka nndo. Nikomi na rpa yihotar kauwonom. Na yakyuk krho-pam niko to kekwomko.