Iruhin Ananin Yopinyi Baraen Luk Nenyem Iri
Banenyi Baraen Um Luk
1:1-4 Nyarik iri baraen
1:5–2:52 Jon nenek baptaisumesh iri natogur aria Maria kwobuki Jisas
3:1-20 Jon nenek baptaisumesh iri nagabeman yah Jisas
3:21–4:12 Jisas nenek baptais aria Satan nanaki nakwiraehan um nunek yoweishi inahos
4:13–9:50 Jisas nanak shokugi nahobig Galili nakripesh Iruhin ananin baraen aria nagabe arugeh haesh iri arpesh
9:51–19:27 Jisas nakutukuk shokugi nahobig Galili aria natanam nanak Jerusalem nakripesh Iruhin ananin baraen
19:28–23:56 Jisas nanak Jerusalem nakripesh yopinyi baraen aria eshesh Juda esheshim debeimi henekuman baraen aria han henek nyiluman rowog kruse nagok
24:1-53 Jisas wata nakitak aria nekesh mour ananish disaipel
1
Luk Nowem Enyudok Baraen Nyanak Um Tiofilus
O Tiofilus, riguk sabaishi arpesh shakwiraeh showem baraen um ihishmorim eshudok eneshenesh douk Iruhin nohur Jisas nenekesh shatogur orokohun um apak iri. Eshesh showem baraen um eshudok eneshenesh douk eshudok arpesh sagomatin shatrish esheshis nabes aria shakripap-umesh iri. Eshudok shakripap iri arpesh douk shenek mour um shakripesh Iruhin ananin baraen iri. Aria shokubur atin eik yape yarigesh yenek surisorik yaurim baugenyum baraen um gani baugos enyen nyakitak nyanakumori. Namudok aria eik shopunek yakri wosik um inyem wosik atin enyudok baraen kabi douk sagomatin nyakitak nyanaki um aria ishopoken nyunakumagu nyak yopuyopuni arman Tiofilus. Eik yenekesh namudok um nyak ta nyudukemen wosik enyudok baraen douk riguk shenek skulumen-enyi, douk adurin atin abom.
Iruhin Ananin Ensel Nyakrip Sekaraia Um Ta Nubuki Anan Nuganin
Abudok nyutob Herot nape king um shokugi nahobig Judia obi nyutob, anan arman shahwaran um Sekaraia iri shopunek nape. Anan douk anan pris. Aria anan douk nanaki apudok awirop um pris douk shahwaram um Abiya iri. Aria ananik irohukwik douk shahwarok um Elisabet. Okwok shopunek douk kwakitak agundok Aron ananip awirop iri. Aria Iruhin natrish um, eshudok biyesh shagipesh lo atin abom iri biyesh shape. Eshesh shagipeshen sheyaten um Debeini nakripesh-enyi baraen nyani lo seiwok nakoguk Moses enyi. Aria eshesh douk batowish wokesh. Um maresh, Elisabet kupik. Aria eshesh biyesh douk ruwehesh abom.
8-9 Arigaha aria anah nyumnah douk Sekaraia nani ananip awirop amam pris amamih nyumneh um hunek mour numun Iruhin ananit debeiti urupat um hatogur. Aria amam henek enesh eshudok hagipesh ehudok amamih aih um hudukemesh um ta meini pris nurik nuwish nunek ofa um eshudok nuko Iruhin. Aria ahudok nyumnah, Sekaraia nenek uhwin um nuwish Debeini ananit debeiti urupat um nuweh eshudok sheisik wosik iri um nunek ofa nuko Iruhin um enyudok alta. Amam henekesh namudok aria anan nawish numun Debeini ananit debeiti urupat. Aria Sekaraia neyotu numun nape nuweh eshudok nenek ofamesh nako Iruhin aria Iruhin nape natrun. 10 Aria abudok nyutob nawish nuweh eshudok obi nyutob, ihishmorim arpesh shenek lotu um Iruhin iri shantorum shape aduk shape shenek beten.
11 Aria enen Debeini ananin ensel nyatogruman aria natrin. Enyen nyatogur meyoh nyeyotu um yopunyi rogur ehahum enyudok alta douk amam pris hape howem eshudok sheisik wosik iri henek ofamesh hako Iruhin iri um. 12 Douk Sekaraia natrin aria anan nakitak yowiyokuk aria nanogugur abom. 13 Aria enyudok ensel nyakripan nyakri, “Sekaraia, nyak mare nyunogugur. Iruhin douk nemnek nyakin beten aria nyakik irohukwik Elisabet ta kwubukumenyi anan nuganin. Aria nyak ta nyuhwaran nyeigur Jon. 14 Aria nyakihw apahw ta hur wosik aria ta nyunadudareh nyuriguk. Sabaishi arpesh shopunek ta shunadudareh abudok nyutob okwok kwunabuki obi nyutob. 15 Aria agundok Debeini nutrun um, anan ta nupe debeini arman. Anan ta mare nuwok wainibar abar buni anabar dodogowibari, uwok. Anan ta wata nur apahw aria Iruhin ananin Mishin ta nyuwishan aria nyupenyan shuknin abom. 16 Anan ta wata nurauri sabaishi arpesh eshesh Israel shukutukuk eneshenesh yoweishi inahos aria wata shutanamori um Iruhin esheshin Debeini. 17 Anan ta dodogowin atun kabi douk profet Elaija um. Aria shopunek, anan ta nurao Elaija ananih aih. Aria anan ta nurik aria Debeini ta nugiguk. Anan ta nubadig arhim amamip urkwip aria amam ta wata urkwip punawasham amamish batowish. Aria ta nubadig madae shumnek baraen atin iri esheship urkwip aria ta wata shurao yopishi arpesh esheship urkwip. Aria anan ta nutaurum Debeini ananish arpesh um shukeshuguk agabus yoweishi inahos aria shunek redi shupe shutik um Debeini nunaki nutaurumesh um.”
18 Aria Sekaraia nakrip enyudok ensel nakri, “Eik douk ruwogin aria eikik irohukwik shopunek douk ruwogik. Aria eik ta idukemesh mumam aria douk ikri enyudok baraen douk adurin?”
19 Aria ensel wata nyakripan nyakri, “Eik Gabriel douk yeyotu Iruhin napemori. Anan douk nashopoke yanakumori ini nyak wiyagwreh aria ikripen enyudok yopinyi baraen. 20 Aria nyak douk madae nyunek bilip um eikin baraen uwe. Douk namudok aria nyakit nokwat ta tishuk tupe namudok atin. Nyak ta mare nyiyagwreh atin arigaha ahudok nyumnah Iruhin nakriyahi um enyudok eik yakripenyumen iri baraen nyutogur adurin atin.”
21 Aria abudok nyutob ensel nyape nyakripan baraen obi nyutob, eshudok armam armago shape aduk iri shape shabeiman. Eshesh shakri maresh shatogruman aria anan douk nape roubi gani numun urupat. 22 Arigaha douk natograri aria nabirak um nakri nunamesh niyagwreh aria nabirak natik uwok. Douk namudok aria eshesh shadukemesh shakri anan natik enesh eshudok eneshenesh gani numun Iruhin ananit debeiti urupat. Aria nakri nukripesh baraen um, anan naurumesh rogur meyoh. 23 Arigaha douk ananib nyutob um nenek mour pris numun urupat um batuh aria wata natanamum ananibur wabur. 24 Anan nanak nape anob nyutob banak badiguk aria ananik irohukwik Elisabet kwanarahaen. Aria kwanabeshuk kwape urupat atut um 5-poreib aub. 25 Aria kwakri, “Arigaha douk Debeini nutaurume namudok. Anan nawarukuk abraen um agundok arpesh shatruweim yape kipiwe um.”
Ensel Nyakrip Maria Um Okwok Ta Kubuki Jisas Um
26 Douk Elisabet kwanarahaen kwape arigaha douk bakri um 6-poreib aub um, Iruhin neshopok enen ensel nyeigurinyum Gebriel iri nyanak um anabur wabur bape shokugi nahobig Galili iri. Abrudok wabur douk shahwarabur um Nasaret. 27 Enyudok ensel nyaraumokwi baraen onok armatok shahwarok um Maria iri. Okwok douk wata kwurao anan arman shupe atugun uwe, uwok. Okwok douk shakriok um anan arman shahwaran um Josep iri. Anan douk nakitak king Devit ananip awirop iri. 28 Enyudok ensel nyanaki nyatogrumok aria nyakripok nyakri, “Ruwahep Maria, nyakin mishin nyur wosik aria nyanadudareh. Debeini nani nyak nape hurukatin aria nenekumen yopunyi.” 29 Aria Maria kwomnek enyudok baraen aria okwok urkum yowem. Okwok madae kwudukem baugenyum enyudok baraen ensel nyakripoken iri uwe. 30 Aria ensel nyakripok nyakri, “Maria, nyak mare nyunogugur uwe, uwok. Iruhin douk nanadudareh-umen aria ta nunekumen yopunyi. 31 Mnek! Nyak arman douk wata nyurao anan uwe, aria nyak ta nyonarahaen aria nyubuki anan nuganin. Aria nyak ta nyudowon nyeigur Jisas. 32 Aria anan ta nutogur debeini arman. Aria ta shuhwaran Debeini Iruhin abom douk nariguk ihish arpesh shani eneshenesh eshudok shabuhuk iri um ananin Nuganin. Debeini Iruhin ta nunekan nutogur king kabi douk ananin babuken Devit um. 33 Aria ihih nyumneh anan ta nupe deben um Jekop ananish popehesh yamehesh. Anan ta nupe Debeini um ananish arpesh namudok atin ihih nyumneh.”
34 Aria Maria wata kwakrip enyudok ensel kwakri, “Enyudok ta nyutogur mumam? Eik wata irao anan arman uwe.”
35 Aria ensel nyakripok nyakri, “Iruhin ananin Mishin ta nyuwishen aria debeini Iruhin ananin dodog abom ta nyishigorin. Douk namudok aria anudok yopuyopuni nuganin abom nuhut nyunubuk iri ta shuhwaran Iruhin ananin Nuganin. 36 Mnek, okwudok armatok Elisabet douk kwani nyak ipak atup awirop iri douk shakri kwape kupik. Okwok douk ruwogik abom aria okwok douk kwanarahaen. Aria douk 6-poreib aub badiyok. 37 Aria eshesh douk madae enesh eshudok eneshenesh douk Iruhin ta nubirak um mare nunekesh iri uwe, uwok.” 38 Aria Maria kwakripan kwakri, “Eik yenekuman mour meyoh Debeini iri. Aria anan wosik nunekume enyudok nyutogur kabi douk nyak nyakrium.” Aria enyudok ensel nyakutukuk nyanak.
Maria Kwanak Kwatik Elisabet
39 Enyudok ensel nyanak nyeyagwrehuk um jurug, aria kwape arigaha douk anah nyumneh hanak hadiguk, aria Maria kwanagabe eshudok aria arigas kwaikitak kwatoum yadururuh kwanak. Okwok kwanak um anabur wabur douk bape shokugi nahobig Judia iri. 40 Okwok kwanak kwatogur kwawish Sekaraia ananit urupat aria kwonekumok yopuhi nyumnah Elisabet. 41 Aria douk Elisabet kwomnek um agundok Maria kwonekumok yopuhi nyumnah um, aria batowin nyor okwokwihw apahw iri nyanagugwanam. Aria Iruhin ananin Mishin nyawish Elisabet abom aria nyapenyok shukunik. 42 Douk nyawishok aria nyakuhur kweyagwreh debeihi mah kwakri, “Nyak nyeshagrakuk ihiyumorim armago um agundok Iruhin nenekumen yopunyi um. Aria shopunek, enyudok batowin nyak nyunyubuki iri, Iruhin ta nunekumen yopunyi atin. 43 Aria enyudok douk nyatogrume um agundok eikin Debeini ananik amakek kwanaki kwatiwe um? Eik douk madae debeikwi armatok uwe. 44 Aria abudok atub nyutob abom eik yemnek agundok nyak nyenekume yopuhi nyumnah obi nyutob, batowin nyor eikihw apahw iri nyanadudareh aria nyanagugwanam. 45 Nyak douk nyenek bilip um Debeini ananin baraen aria nyak douk nyanadudareh. Debeini ta nuneken nyutogur kabi douk riguk anan nakripenyum!”
Awehw Maria Kweyorub Kwatuk Debeini Ananin Nyeigur Nyato Iruhw Um
46 Aria Maria kwakri,
“Eik yanadudareh abom aria yatuk Debeini ananin nyeigur nyato iruhw.
47 Eikin mishin douk nyanadudareh um Iruhin douk nutaurume naraowe yatanamori yape wosik atin iri.
48 Um maresh? Anan urkum morum eik nyeigur woke iri douk yasuhw ananin mour iri.
Douk arigaha kweipon, ihishmorim arpesh ta shukri eik douk Iruhin nutaurume
aria neneke yanadudareh atin iri.
49 Eshesh ta shukri yanadudareh um enyudok debeinyi yopunyi mour abom
douk Debeini Iruhin nenekenyume iri.
Aria ananin nyeigur douk nyenek holi abom aria yopuyopunyi.
50 Anan douk nenek giha abom um eshudok arpesh douk
shape shakamum anan shagipeshan iri.
Anan ta nenek gihaumesh arigaha shugokuk
aria esheshish batowish shugiguk shukitaki iri shopunek.
Anan ta nunekesh namudok atin.
51 Aria anan dodogowin nenek mour um, anan apa nabo eshudok arpesh douk
shanahur esheshish nyeiguhw shato iruhw
aria esheship urkwip porum shunek yoweishi inahos iri
nahiyahesh sharuwok shanak atin atinyuk.
52 Anan neyatakuk amam king nam habuhuk
aria natuk nyeiguhw wokeshi arpesh shato iruhw.
53 Aria nekesh sabaishi yopishi eneshenesh eshudok yaruhish arpesh iri.
Aria arpesh douk shatik sabaishi eshudok eneshenesh iri neshopokesh shanak wis wohis.
54 Ananim urkum douk wata morum enyudok adurin atinyi baraen douk seiwok nakripaguk apakish yamehesh-enyi.
Aria nanaki um nutaurum ananish arpesh eshesh Israel douk shasuhw ananin mour iri.
55 Aria anan urkum morum nunek yopunyi
um Abraham nini ananish batowish iri popehesh yamehesh douk shugiguk shutograri iri
aria nenek gihaumesh namudok atin ihih nyumneh.”
56 Aria Maria kwani Elisabet wape biyab atun aub batuh aria wata kwatanam kwanak um wabur.
Elisabet Kwabuki Jon
57 Aria nyutob um Elisabet kwubanuh obi nyutob banak batograri aria kwabanuh kwabuki armanin batowin. 58 Aria okwokwishi shani eshudok douk shape hurukatin iri shemnek um agundok Debeini nenekumok yopunyi um aria eshesh shopunek shanak shanadudareh. 59 Aria douk arigaha 8-poreih nyumneh hadiguk anudok nuganin, aria shanakumori shutah ananihw yegenyihw. Aria eshesh shakri shudowan nyeigur Sekaraia douk ananin yain nanahwarom um. 60 Aria ananik amakek kwakri, “Uwok. Ananin nyeigur ta muhwaran Jon.” 61 Aria eshesh shakripok shakri, “Nya, ipak atup awirop um douk madae anan arman nunahwar enyudok nyeigur uwe.” 62 Aria eshesh shauraman wis um ananin yaken shariganum shakri nukripesh um meinyi nyeigur anan nakri shuhwar nuganin-uman. 63 Aria anan naurumesh wis um sharauri anat slet aria nowem enyudok baraen nakri, “Ananin nyeigur douk Jon.” Aria eshesh ihishmorim shakitak yowiyokuk abom shape. 64 Aria abudok atub nyutob, Sekaraia ananit nokwat tani yaham wata shanupok neyagwreh aria nape natuk Iruhin ananin nyeigur nyato iruhw. 65 Aria ihishmorim arpesh shape hurukatinyum eshesh iri shanogugur abom. Aria baraen nyarahaen nyanak ihirub warub douk betem yodururuh agudok shokugi nahobig Judia iri. Aria ihishmorim shadukemesh um enyudok douk nyatogurum Sekaraia nani Elisabet iri. 66 Aria ihishmorim arpesh douk shemnek um enyudok iri shape urkwip porumen aria shakri, “Anudok nuganin nukitak yopun um, anan ta nutogur manan arman?” Um maresh? Eshesh shadukemesh um Debeini nani anan nape hurukatin aria ananin dodog douk nyapenyan.
Baraen Douk Sekaraia Neyagwrehen Um Debeini Ta Nutogur Nutaurumep Iri
67 Aria Iruhin ananin Mishin nyawish Jon ananin yaken Sekaraia nyapenyan shuknin aria neyagwreh Iruhin ananin baraen kabi douk amam profet heyagwrehen um. 68 Sekaraia nakri,
“Apak mutuk Debeini apak Israel apakin Iruhin ananin nyeigur nyuto iruhw.
Anan nanaki nataurum apak ananish arpesh aria wata nanarap mape wosik.
69 Anan nagraehumap anan dodogowin atunari arman um nunarap mutanamori mupe wosik abom iri.
Anudok arman douk nakitak Devit nasuhw Iruhin ananin mour iri ananip awirop.
70 Kabi douk seiwok ananin Mishin nyawish amam yopumi profet aria hakriyenyuguk iri baraen nyakrium.
71 Anan nakri adur abom um ta nutaurumap nunarap mukutukuk apakish horim.
Aria shopunek ta nutaurumap um nunarap mukutukuk ihishmorim arpesh douk shakapaguk agabus iri.
72 Riguk nakripeshuk ananin adurin atinyi baraen kontrak apakish popehesh yamehesh um ta nutaurumesh.
Aria anan douk wata urkum morum ananin kontrak douk riguk nakriyen
um douk ta nugipeshen aria nutaurum apak um.
73 Anan narik nakri iruhw nakripan enen adurin atinyi baraen abom um apakin yamenen Abraham.
Aria douk nakri nunekenyumap kabi riguk nakri ta nunekenyumap um.
74 Anan nakri nutaurumap nunarap mukutukuk apakish horim
um musuhw ananin mour aria mare munogugur uwe, uwok.
75 Anan nataurumap um nakri apak mupe agundok atap um,
apak mupe ananishi atish mupe holi aria mugipesh lo atin iri arpesh aria anan nupe nutrup munek ananin mour.
76 Aria nyak eikin batowin,
arpesh ta shuhwaren Debeini abom atunari Iruhin ananin profet.
Nyak ta nyurik nyunak nyukrip arpesh um shukutukuk yoweishi inahos shupe wosik atin
aria shupe shutik um Debeini um ta nunaki um.
77 Nyak ta nyukrip apak ananish arpesh Israel
aria mudukemesh um anan ta nukweshihuk eneshenesh yoweishi inahos apak menekesh iri,
aria wata nunarap mutanamori mupe wosik atin.
78 Apakin Iruhin ta nunek enyudok um maresh, anan douk yopuyopunum apak abom aria nenek gihaumap.
Aria anan ta nuneki lait douk tabuhi kabi aun nakihumori gani iruhw heven tubuhi tuwishap.
79 Atat ta tubuhmori eshudok arpesh douk shape arukwutigun
aria hurukatin um shugok iri aria eshesh ta wata shunatrugun.
Anan ta nutaurumap mugipesh ahudok yopuhi yah
um mupe wosik aria aparuh hur wosik um.”
80 Aria douk arigaha Jon nakitak yopun aria dodogowin abom um agundok ananim urkum manawasham Iruhin um. Aria nanak nape wehigun um arpesh uwok um. Anan nape agundok arigaha ahudok nyumnah natogur yopugunum aria eshesh Israel shatrun aria nape nakripesh Iruhin ananin baraen ahi iri.