3 Yowan
Rau Yo Yowan Iwode I, In Tol Ki
1
Au i kuto mai ke di tooltool yo tigaua ye bareme ke Yesu nga, in awodo rau naii pong Gaius. Ong in tool kiau yo lok pong mai san moolmool i.
Tool kiau dook mata, au i lok galanga nen bet lom yo kutaru pang Maro i, in iken dook mata san. Le apatarau pang Maro nen bet so yo bet kuyei nga, ngan ole pombe dook mata le imot, inbe ong in ole kunepe ye nepongo dook mata nen lapau. Le lok ponana san ye yo alongo bingi kiong ye di tooltool ke Kirisi yo timan yau nga. Ngan tiwete pau bet ong in kutara lom medana le kutoo betanga moolmool ke Maro. Inbe kanakana ngan kutoo betanga moolmool tani. Kene yo alongo betanga ye di natuk bet titoo betanga moolmool nga, ngan le lok ponana mai san. Le tina ke bet so san mulu iyei au, a bet nen ngan lok ponana ye nen, ngan tiap.
Gaius Iyei Urata Dook Mata
Tool kiau dook mata Gaius, ong in kutara lom medana le kuyei urata dook mata yo bet kulon di diede kapala yo titara lodi medana pang Yesu a tipa lowo pong nga, inbe pang di kapala yo lom galanga ye di tiap, ngan lapau. Le di tooltool tina yo kuye di kanepe nga, ngan tiwete pam am di tooltool yo amgaua ye bareme ke Yesu a amnepe ni nga, ngan ye dada kiong yo lom pang di mai san nga. Ngan nen le atorong bet ye kene yo lodi bet tipa mulu a tila nga, ngan ole kulon di ye so sa mulu yo bet tikap pang di a tila nga, le lo ige Maro lono. Ngan di tooltool tina ngan tipa bet tiyei urata ke Maro, bong di tooltool yo titara lodi medana pang Yesu tiap nga, ngan tikaua so sa ke bet tilon di ye, ngan tiap. Le idi nga ke bet talon di tooltool yo nen nga, a bet nen ngan taye di tagaua ye urata atu ke bet tapamede betanga moolmool ke Maro.
Dioterepes Iyei Urata Dook Tiap
Ngan awodo betanga kapala pang di tooltool yo tigaua ye bareme ke Yesu a tinepe potai pang yong nga. Bong Dioterepes ye in lono bet iyei tool mai pang di le ilongo betanga kiau yo awete, ngan tiap. 10 Nen le kumata bet amala pang yang nga, ngan ole apaposi ye dada dook tiap ki yo iyei nga. Ye in iwete googoonoo pam ye betanga ki matana matana yo illung ye nga. Ngan iyei nen leu tiap lapau, bong ikap di diede kapala yo titara lodi medana pang Yesu nga a tilo ye rumu ki tiap. Inbe kene yo di tooltool kapala bet tikap di a tilo rumu kidi nga, ngan ipasakala di, inbe ole inganga di tooltool tina ye bareme ke Yesu a tikoo.
Demitirius Iyei Urata Dook Mata
11 Tool kiau dook mata Gaius, ken kutoo dada dook tiap yo di tooltool kapala titoo, ngan be. Bong kutoo dada dook mata yo bet di tooltool titoo ngan leu. Tool yo itoo dada dook mata i, in tool ke Maro. Inbe tool yo itoo dada dook tiap i, in lon galanga ye Maro tiap. 12 Di tooltool le imot tiwetewete Demitirius nen, bet ye in dada ki dook mata. Inbe itoo betanga moolmool ke Maro le ipaposi ye dada ki yo iyei ngan dook mata. Ngan au i lapau aweteweta bet ye in dada ki dook mata, le lom galanga yau nen, betanga kiau nga moolmool.
Yowan Lono Bet Ikamata Gaius
13 Betanga kiau alunu la bet awete pang nga, bong ngan lok bet awodo ye kasa a ilo ye rau i tiap. 14 Bong lok bet amala pang yang a bet nen ngan mala ayang taparkammata matada, inbe tawetewete. 15 Le lo silene ke Maro inepe yang. Ngan di tooltool kiong yo tinepe ni nga, ngan tiyawar lo ponana kidi pong. Inbe ong kuwete lo ponana kiau pang di tooltool kiau ngan di atu atu le imot.