PALAPALAꞌALIXU NOXOU
IOANESI
VAIKALA LAMANA
Vaikala lamana
Palapalaꞌalixu noxou Ioanesi ꞌo ne mukaukavunu no mine ta mitema miꞌoxonu masuaneꞌi ta mitema noxou Lataua, xo aneꞌi mimuxaxu taneꞌi lexe Iesu Kalisito anu Tila noxiꞌa. Anu umasaxa lexe uꞌoxonu pekiaꞌa ta mitema noxou Lataua no anu muxamuxaxu taneꞌi noxiꞌa mo sou itulu pekiaꞌa no anu voxo sou tuꞌutuꞌumaxu.
Lavuku ane ꞌo muaꞌaloxu mimii ane uxali iliꞌi. Ta mitema noxou Lataua male milamana no anu mimii ane ꞌo ia aneꞌi ane ilolotu uasi ne ilamana uasi. Laaxu vaikala tovotovolaꞌi no nano ꞌo aloxo ꞌo. Iesu Kalisito anu Tila mo no avolu la Lataua umamuloneꞌi ta uluau iloꞌa Satani. No mine Iesu ukalusou xaixai noxou la Lataua uꞌitinu ualasiꞌa ta mitema ane mimuxaxu taneꞌi pekiaꞌu xe mitulu pekiaꞌa. La iloꞌa Lataua ixolu mo tuꞌumaxu vile uxalisiꞌa la uasi. Xo Lataua ulosiꞌa ꞌulusou xaixai laixe noxiꞌa mo Anu uꞌoxonu mimii uxali alavua.
Aꞌalo muai no nano aloxo ꞌo
Vaikala lamana 1:1-8
Malemalei noxou Ioanesi xe uoli voloxu mulai no ꞌa taasou lalotu muxatele tamei 1:9–3:22
Puloulou teitexi no opo loxotolo 4-5
Sakisaki muxatele tamei 6:1–8:1
Xoolau muxatele tamei 8:2–11:19
Ta mitema misosovosou mimii iou xe mii maꞌia muxali 12-14
Ta angelo muxatele tamei mo tuꞌutuꞌumaxu muxatele tamei 15-16
Vaviloni ane loxo sema sou voteꞌi 17:1–19:5
Sipsip ꞌOlu utaulaꞌi 19:6-10
Iesu Kalisito ulivu uneꞌe 19:11-21
Misakisakiinu Satani muxolu tauu ie itemaxu mavulovexa taꞌuve 20:1-6
Mikalusou Satani avile 20:7-10
Voxo sou ta mitema itulu no anu vaivaikala 20:11-15
Loxotolo ilou lia xe Ielusalemu alavua 21:1–22:5
Vaikala kaluxusou 22:6-21
1
1 ✡ Pal 22:6Vaivaikala ane ꞌo, Lataua mulosou Iesu Kalisito tei lexe upalaꞌalixu noxiꞌa ta mitema sou xaixai vitanisi noxou sou ilavusou mii maꞌia ane ꞌalaꞌalasi sou uxali maninasou. La sou anu Iesu muavuti, la mupalusou angelo vile noxou sou muneꞌe mulosielixu eni itema sou xaixai vitanisi noxou, ualasilo lexe Ioanesi. 2 Angelo mulosielixu mimii mukalu, la eni ekaukavunu mimii latala e eni emaisou. No anu kaukavu noxilo ne, eni eaꞌaloxu vaivaikala manina noxou Lataua mo vaivaikala manina noxou e anu Iesu mupalaꞌalixu. 3 ✡ Pal 22:7, 10Ia Lataua ualusou ꞌei ane uitisou vaivaikala e anu mutotokalasou, mo anu ualusiꞌa aneꞌi ane ilomusou mii maꞌia ane eni ekaukavunu mo imulaxu no taneꞌi. Xo ꞌalaꞌalaisi sesi sou mimii e eni emaisou ne, uxali manina.
Vaivaikala Noxou Lataua Ulai Noxiꞌa ta Mitema Noxou ne Asia
4 ✡ Mul 3:14-15; Pal 3:1; 4:5Eni alinga lexe alauna mo opo seꞌisisi noxou Lataua uxolu noxinge ngingi ta mitema noxou no tuala muxatele tamei no xalee lia tila ne Asia. Ia enisisi alinga aloxo ne uasi. Anu ane muxolu tatei mo muxolu vaimomo ꞌo mo iliꞌi la anu uneꞌe iloꞌa ta uleenu muxatele tamei e ixoxolu ꞌalai no paꞌumolu, 5 ✡ Lex 89:27; Kol 1:18mo alauna mo opo seꞌisisi noxou Iesu Kalisito uxolu noxinge. Anu muꞌoxonu xaixai laixe sou muaꞌaloxu aꞌalo laixe noxou Lataua mo Anu mumauli tei noxiꞌa ta mitema e misoisoli, xe Anu usaxilaꞌa ta tatanaanu tuatuala no lia ꞌo kalumo.
Iesu tanunenge, la sou musolisinge mo sialuxu munixi sou mululusinge no anu sakisaki sou ꞌiliꞌilixo masumasua. 6 ✡ 1Pi 2:9; Pal 5:10; 20:6No anu soli noxou ne, la Anu muꞌuna-lailinenge no anu saxisaxilaꞌu noxou Lataua mo nenge texali loxo ta ailiꞌi sou taxaxai noxou Lataua, anu Maminge. La sou nenge taꞌitinu ualasou mo Anu molu usaxilaꞌinge no anu xavi mo lamana noxou no voxovoxo utotomu mo kaluxu uasi! Manina.
7 ✡ Tan 7:13; Sek 12:10; Mat 24:30; Ioa 19:34-37; 1Te 4:17Ngamaisou! Anu a uneneꞌe no anu tamuxala, la ta mitema latala imaisou mine uneneꞌe. Mo aneꞌi ane mitoꞌomolu kalumo imasiou. La ta mitema latala no lia ꞌo ne, itama. Ani, mii ne, uxali manina.
8 ✡ Pal 21:6; 22:13Lataua anu Tila mo xaviinu musuku misevile, muxolu tatei mo muxolu vaimomo ꞌo mo iliꞌi la Anu uneꞌe, muvikala lexe, “Eni exolu tatei mo, mo iliꞌi la eni axolu.”
Eni Emaisou Kalisito
9 Eni Ioanesi, eaꞌaloxu vaikala manina noxou Lataua mo eni apalaꞌalixu vaikala noxou Iesu Kalisito, la sou aneꞌi mikusailo elai exolu no laꞌolu vile ilemo lexe Patomosi. Eni vivinge, xo nenge nengeꞌa tamulinu Iesu, la sou nenge taxaxamulinu navunavu, ia taxolu seꞌisisi mo tatulu pekiaꞌinge no anu tuꞌutuꞌumaxu, mo nenge taxomaiou voxo ane Lataua usaxilaꞌinge. 10 Ia no voxo sou lalotu, la Uleenu Tavuna muꞌanaꞌana noxilo, la elomusou ꞌava tatila no tumalilo loxo itema vile mutaunu xoolau. 11 La muvikala aloxo ꞌo, “Nakaukavunu no anu mipipinu mii maꞌia ane nini namaisou mo nasova ulai noxiꞌa ta mitema noxou Lataua no tuala muxatele tamei ano, tuala ne Epeso mo ne Sumuna mo ne Peluxamo mo ne Tiatila mo ne Saludesi mo ne Piladelupia xe ne Laodekia.”
12 Eni elomusou aloxo ne, la exiu sou lexe amaisou ꞌei ane muvikalaleli ne. La emaisou mii sou itulusou telu xoulu no anu muxatele tamei, ia mulalami manina. 13 ✡ Tan 7:13; 10:5Ia no taiinu, la emaisou itema vile loxo Itema ꞌOlu mutaa tokolomo veveeni molu teitexi la mulai muxali no lia no tavaꞌu. Mo emaisou utupoko xoulu vile mulamilami no lutunu. 14 ✡ Ese 43:2; Tan 7:9; 10:6; Pal 2:18; 19:12Mo emaisou kisou laxusou ne mukea manina loxo sipsip laxusou xe loxo tamuxala mo iou ne uvaxa loxo navu lamixu. 15 Mo tavaꞌu ne loxo barasi ulamilami e mixutu la mosomoso vile uxolu no anu uasisi. Mo xolunu ne loxo lexa utaloxo no kisou ulu. 16 ✡ Eva 4:12; Pal 2:12; 19:15Mo utetelisiꞌa ta oto muxatele tamei no avolu tema, mo lavisou vile anaxu tamei ne anaxu misevile mulaa muuatu no anaxu. Xe iou ne loxo aso e ukaa lailaixe.
17 ✡ Ais 44:6; 48:12; Pal 2:8; 22:13Eni emaisou aloxo ne, la elapau loxo itema musoli muluꞌe no tavaꞌu. La sou Anu mumulaxu avolu tema noxilo, la muvikalaleli lexe, “Naꞌume mamu, xo eni exolu tei mo iliꞌi la eni axolu, 18 mo eni tavaꞌu mauli, la sou eni esoli. Ia namaisou, eni emauli mo umomomo sou asoli la uasi. Mo eni amomomo sou atulusou itema vile musoli mo alaaneꞌi aneꞌi ane mixolu no tualasiꞌa ta mitema misoisoli.
19 Ioxe, nini nakaukavunu mii maꞌia ane nini nemaisou mo mii maꞌia ane nini namaisou vaimomo ꞌo mo mii maꞌia ane sou uxali iliꞌi. 20 Ia, laaxu ta oto muxatele tamei e nini nemaisiꞌa etetelisiꞌa no avolo tema mo mii sou itulusou telu xoulu no anu muxatele tamei ne, aloxo ꞌo. Ta oto muxatele tamei ne, musosovosiꞌa ta angelosiꞌa ta mitema noxou Lataua no tuala muxatele tamei, xe mii sou itulusou telu no anu muxatele tamei ne, musosovosiꞌa ta mitema noxou Lataua no tuala muxatele tamei.”