Mátíyu
Ísu wíyómpaꞌa iyówana Mátíyu siyáánkai-aataiyaꞌiyo miyáumai-aatai maisuwéna Ísun-aai agaimakáiye. Ísuni kísau-waasima sísamaifakemba kaeꞌá kumbaimái-waasifinkemba moóráwigon-awiꞌa Mátíyu moórá-awiꞌa Rífái wemá maanáúfáí agaimakáiye. Maníkó séna sáwíꞌo úmaimo méraampinkemba faútíyukaiye siyóntemba ááéraan-aai símai kááísamakon-aufai-wandaaifimba agáúmba Ísuntafesa siyáawe. Yúndaa-waasi Ísuntafesa sésa Maníkómó íyáfasinankaiwai Mésíyaan-iye síwae séna maanáúfáífímbá agaiyáiye. Ísu fasiꞌaémbá tokéna Maníkóní ámútankoni áwáuma simátimena Maníkó wení waási wégarawin-aai simátímaꞌmae iyáiye. Mátíyu miyán-ááí maanáúfáífímbá agaimakáiye.
1
Rúku 3:23-28
Ísu Káráísitini akúníꞌo uráan-aai. Ísun-aíwáꞌná Téfítin-iye. Téfítin-aíwáꞌná Émbaramun-iye.
Émbaramu Áísáakimba maꞌankówana
Áísáaki Yékopumba maꞌankówana
Yékopu Yúndaa-iyai afarawainonda matinkówana
Yúndaa Pérésinte Sáraante matínkaraimba
tinówa Témaan-iye.
Pérési Éséronimba maꞌankówana
Éséroni Árámumba maꞌankówana
Árámu Ámínándapumba maꞌankówana
Ámínándapu Násonimba maꞌankówana
Násoni Sáómonimba maꞌankówana
Sáómoni Póásimba maꞌánkaraimba
anówa Réꞌapimaniye.
Póási Ópétimba maꞌánkaraimba
anówa Rútimaniye.
Ópéti Yésimba maꞌankówana
Yési Téfítimba maꞌankówana
Téfítimo káráwiyaiwai Soromonimbá
maꞌánkaraimba anówani aifaráán-kwánkón-áwíꞌa
Yúráya úwana ánaaen-kwamba Téfítin-iye.
Soromoní Ríyapoamumba maꞌankówana
Ríyapoamu Ápáísaamba maꞌankówana
Ápáísaa Ésaamba maꞌankówana
Ésaa Yíósafatimba maꞌankówana
Yíósafati Yórámumba maꞌankówana
Yórámu Ásáyaamba maꞌankówana
Ásáyaa Yótámumba maꞌankówana
Yótámu Éꞌásaamba maꞌankówana
Éꞌásaa Ésékayaamba maꞌankówana
10 Ésékayaa Mánásaamba maꞌankówana
Mánásaa Émósimba maꞌankówana
Émósi Yósáyaamba maꞌankówana
11 Yósáyaa Yékónaya-iyai afarawainonda matinkówasa
minkánááfímbá Pépíróni-naopakewi Ísareri-waasi tatíꞌmaesa Pépírónifaꞌa ándáfaꞌa mátínkaraawe.
 
12 Pépírónifaꞌa mátinkon-kanaafimba
Yékónaya Síátiomba maꞌankówana
Síátio Sérápáperimba maꞌankówana
13 Sérápáperi Ápáyatimba maꞌankówana
Ápáyati Éráyakimumba maꞌankówana
Éráyakimu Ésomba maꞌankówana
14 Éso Sétókomba maꞌankówana
Sétóko Ékímumba maꞌankówana
Ékímu Éráyatimba maꞌankówana
15 Éráyati Éríesaamba maꞌankówana
Éríesaa Mátánaamba maꞌankówana
Mátánaa Yékopumba maꞌankówana
16 Yékopu Yósepimba maꞌankówana
Yósepi Máríyaan-awaaikó úwana Máríyaa
Ísun-anówan-iye. Ísuntafesa Maníkó íyáfasinankaraiwaiye sésa Káráísitiye wésewe.
 
17 Émbaramumo méronkaꞌa sísamaifakemba éíyaimba kumbaimái-waasi 14 waasi agaiyówasa Téfítimo paápé urénamo méronkaꞌa sísamaifakemba éíyaimba kumbaimái-waasi 14 waasi agaiyówasa Pépírónifakewi tatíꞌmaesa Pépírónifaꞌa ándáfaꞌa mátínkarowasa méron-kanaafimba sísamaifakemba éíyaimba kumbaimái-waasi 14 waasi agaiyówana minkáꞌá Máríyaa Ísu Káráísitimba maꞌánkaraiye.
Ísumbo maꞌánkarain-aai.
Rúku 2:1-7
18 Ísu Káráísitimba maꞌankómba maará uráiye. Ísun-anówamba Yósepinkaꞌa aaí símakowana Yósepi ímba weséꞌa kurónkaꞌa ámúꞌa paápé uráiye. Ufaen-ámútánkó Máríyaan-arumpi túwana ámúꞌa paápé úwana 19 awaaikó kaweꞌá wéuwai séna waási túrankaꞌa aiꞌmáráanana Máríyaa aigaesáféna
ifáímpóꞌa aúpáꞌá aiꞌmátuwanaumne-imayaa uráiye.
 
20 Miyá imáyáa wéena aún-kwérowana Fasiꞌaénkó kísau-waasigo wíyómpakewi kaainampáꞌá simámena séna Yósepiyo Téfítin-andafaken-kwaasi óne. Máríyaamo ámúꞌo káúfímba Ufaen-ámútánkó aantemba ámúꞌa kauwánkáímba po wembá úwoi máínompo ímba ááꞌa íno. 21 Iyámpóímo maꞌankáínda áwíꞌa Ísuwe simánkaao siyáiye. Mináwíkóní áwáuma wení waási sáwí-imayaagomo taꞌótokaimpinkemba faútinkainiye siyáiye.
 
22 Naaófáꞌá Maníkón-aaimo simátímakowi siyónkaꞌa póna miyán-tántááꞌá paápé uráiye. 23 Wemá agaimaréna séna
moórá-inaamarugo waaí ímba maiyéna ámúꞌa
kaumái iyámpói maꞌankáínasa miníyámpóígón-
áwíꞌa Émániyueriye sénááwe
agaimaréna siyáimba mináwíkóní áwáuma Maníkó keséta méraiye siyáiye.
24 Yósepi aúfínkémbá íyáfasinena Fasiꞌaénkóní kísau-waasigo wíyómpakewi siyóntemba awaainínkómbá maiyéna 25 ímba weséꞌa kúmba úwoi ména káráwiyowana iyámpói maꞌankówana áwíꞌa Ísuwe simánkaraiye.