1 KORINITI
1 Korinitido Vua Amure
Maza ije Foru fu fasi ige isoena e Godi ma vierafevo bu sidove Koriniti kariva ije nijiaema ije fu sidove Efesasi ijia fina isoe. Ro are Koriniti fu sidove ireobo be fu aesakae Gurisi guove ijia ro e Jiusi baki ije buka ma uruvana ijia kari. Ro e ije bu Godikiro akae fuone buka naebe vierafei. Ijadufuo buka barubara fudaenamina vame ise rekinu ro kuke ise binobino renoevo. Ijadufuo Foru fu va are Koriniti ijia kekena Godido vua maeje abe e Korinitiko ijene kuariamoga e boeje bu una oe kuderiana Godi ma vierafei. Ro rade Foru fu una fasi be isoe nijiana izege e Godi ma vierafevo bu kenoevo ijadufuo zinume maeje kuariana nijasiae. Areme fu kuke izege bu vame ise bu renoevo ije aredufuo ijene kuariae. Ro e Korinitiko bu una fasi isoena Foru nijana vame binobino e Godi ma vierafevo bu revo ijadufuo duna gue kuarae. Ijadufuo Foru fu fasi igia isoena duna buone bu kuaraeva ijadufuo maeje una kuariae.
1 Koriniti vua binobino fu isoema ijeja -
1:10–4:21 Foru fu Godido e ije bu dabe ataeva ijadufuo madiaema ijene.
5:1–7:40 Barubara bu izege samuanamikinu maninamidufuo ijene.
8:1–11:1 Vame ise ije mimatana kenoejo ije e Godi ma vierafevo ije buka ijuonevo ijene.
11:2–14:40 E Godi ma vierafevo bu besu afuina imenoekinu ro baname isoevo ijene.
15:1-58 Kuraesi fu baronenaro una urima ijadufuo zinu maeje ijene.
16:1-4 E Jerusaremeko ije moni vajiadufuo ijene.
16:5-24 Forudo vua rane fu kuariaema ijene.
1
Foru fu sidove Koriniti ijia e ije bu besu afuina Godi ma vierafevo ije anadiaema ijene
Fasi ige Foru nare isoena e ije ja are Koriniti ijia kariva ije nijiave. Naeje fune Godire isuibe kumema ijadufuo na Jesu Kuraesido Afasero renoeve. Ijadufuo na vua fuone maeje abena ja kuariave. Ro e Sosini uvia nuvuone ije Kuraesi ma vierafemo ije no fuosiki ja anadiave. Ro fasi ige na isoeva ije na Godido sosi ije ja anadiave. Ro jaeje fune Godire iko zinume ijia ja e akae rena karidufuo fu ije kumei. Ro fu kuke ja kena una e are binobino ije bu E Ireobo Jesu Kuraesi ma vierafevo ijena besu uniae. Ro na vierafe Godi asoe nuvuone ijiakiro E Ireobo Jesu Kuraesi bu ja ma rejiana ifejiaga jaka kafaena karike.
Foru fu e Korinitiko ijiebuo Godido oemarema ijene
4-5 Na maza boeje naka izege Godi fu ja daro miana vame binobino ijia ifejiamo na ijadufuo fuone oemareve. Fu ijiege remo ijadufuo maeje jane una Kuraesina besu rei. Ro fu ja daro miaema ijadufuo ire boeje jaka mukoreigia reve. Ro kuke ja vua fuone maeje mukoreigia fiekinu vierafevo ijadufuo jaka mukoreigia e gue kuariave. Ja ire ijiege revo ije na vierafega Kuraesido vua maeje no nijasiaeva ije janeka abe gikikimana vierafeve. Ijadufuo Kavene Akae ije fune daro fuone binobino vekinu ja vajiae. Ijadufuo ja maza ije Jesu Kuraesi fu una ume igia ari ruadufuo ije jaka ijafunekinu samuave. Ro kuke na vierafe Kuraesi fu ifejiaga jaka giriesana ma vierafena karivakuma maza radekuma ijia usiaeke. Ja ijiege rekina maza ije E Ireobo Jesu Kuraesi fu una ruomo ijia jaka maturaena ise bino baki ja nidua fuone ijia iredufuo. Ro vua irere Godi fu kuaemo ije fu arekuma baki. Ijadufuo Godi ijare iko zinume ijia ja kumeno ja una Fari fuone Jesu Kuraesi E Ireobo nuvuone ijena besu mazie.
E ma vierafevo sidove Koriniti kariva ije bu dabe ata guegue reva ijene
10 Ro kairafano na E Ireobo Jesudo ive ijia vua gikikimana ja kuariana vafiave. Ijadufuo na soesoena kiavo jabe jone atavajuekiro nika oe besu vierafena kafae karifo. Ro kuke janika oe besu vierafekinu ro ire boeje ja renoevo ije nika besu afuina renoefo. 11 Ro erafano, vua ige na ijiege kuariavo ijadufuo maeje e Koroido agane ijia e ma vierafevo bino bu na kuariena kie jaeje jaka jone madinamikinu karinoejono kie. 12 Ro na irerefuo vua ijiege kuaevo ije na fiega e gue ja kuae nono Forudo vua ije fu Jesudo kuaruema no ije nuvevono kuaeve. Ro e gue ja kuae nono e Aforasido vua ije nuvevono kuaeve. Ro kuke e bino ja kuae nono e Fitado vame ijia nuvena kenoevono kuae. Ro bino ja kuae no nuvuosukua no Kuraesido vame ijia nuvena kenoevono kuaeve. 13 Ro igia fie, vame ijiege ja karina revo ije na vierafega fuka naebe marei. Ro Kuraesi fuje fu abe atasena binobino rema baki. Ro kuke na Foru nare kurosi ijia joefuo baroneva baki ro fune Kuraesire joefuo baronei. Ro kuke do ja rueva ije ja ive none ijia rueva baki. 14-15 Ro na Godido ireobo oemarevo ijadufuo maeje na e uruvana do ruoriaeva baki. Ro name e inokiro Kurisifasikiro Geasi buosukua kena do ruoriae. Ijadufuo fu erare kuaeko naeje na Forure do ruoriedo na e fuoneno kuaekuma baki. 16 Ro na vierafega e be ije na e Sitifanesikiro agane fuone ijeduaku kena do ruoriae. Ro na vierafega e bino na naebe kena do ruoriae. 17 Ijadufuo maeje Kuraesi fu naebe kie, A va e do ruoriano kie. Ro i ije fu na kiemo na ruaeva ije na Kuraesi izege fu kurosi ijia baronena una urima na vua ijiaru abena kuariave. Ijadufuo maeje vua ijare fuka daroki. Ro na una emabuo vierafe abe kuariakuva vua ije fu daro bakido fube e gue karauniake.
Godido vierafe mukore ijiakiro daro fuone ijene
18 Ijadufuo maeje e ije bu vua maeje naebe ma vierafevo ijadufuo buka vame ise are miane naeno ijia vako. Bu vua maeje Godi fu Jesu kuamo fu arina kurosi ijia baronema ije bu dabe omise igege vierafeve. Ro no ma vierafega Godido vua maeje ije fuka daroki ijadufuo fu no karaunuomo. 19 Ijadufuo maeje Godido vua akae bu isuibe isoeva ijia fu ijiege kuae,
Na e ije bu mukoreigia vierafenoevo ijiebuo vierafe ije nare kame arafiriajiake. Ro kuke e ije bu ire binobino mukoreigia vierafevo ijiebuo vierafe ije nare bijukuriaejiakono kuae.
20 Ijadufuo maeje e ijiege vierafevo ije Godi fu giaga vierafe buone mukore ijiakiro vua buone bu kuaevo ije fuka buzeme. Ro kuke e ije akae samuavo ijiakina e ije bu una e guebuo vierafe ije kame kuderianoevo ije bu Godido vame maeje bune arena una vame ise ijia vake.
21 Ijadufuo Godi fune fuone vierafema ijia e ije bu buone mukoe vierafevo ijia Godi gakuae giriesavo ijiebuo vierafe ije kame mukoreigia bijukuriaejae. Fu ijiege rejiagaro una e ije bu vua maeje no abe e kuariaga bu fiena ma vierafevo ije fu karauniame. Ro vua ije no abe kuariavo ije e ume igeko bu vierafero fu omisero bu ijiege vierafevo. 22 E Jiusi ije bu vua maeje bu dabe omise igege vierafevo. Ijadufuo maeje bu vierafe maza boeje buka vame sumiki bino ni buone ijia giakuae vierafevo. Rove e Jiusi baki ije buje buka e ije bu vua mukoe vierafena kuaevo ijiebuo vua ije fiekuae reriave. 23 Ro noeje no vua ije no abe e kuariavo ije no kia, Kuraesi kurosi ijia fu baronema ije fu no kaenamuona una Godido vame ma ijia unuemano kiave. Rove e Jiusi ije bu vua ije fiega fuka isediagana buka zieve. Ro una e Jiusi baki ije buje bu vierafero vua ije fuka omisedo fu izege ire ma be rekuma bakiro bu ijiege vierafeve. 24 Ro e Jiusi ijiakiro e Jiusi baki ije erarebe Godi fune uria ijia bu umui tuana karauniaema ije ni buone ije fune Godire ke samadirejiae. Ijadufuo bune mukoreigia gana vierafega Kuraesi ije fu Godido daro ka anuigi ije bu karauniadufuo ijene. Ro kuke bune vierafega bu Kuraesido duvado ijia Godi izege fu ire binobino mukoreigia vierafena remo bu ijene gave. 25 Ijadufuo Godi irere fu rekiro vierafemo ije e bu kuae fuka omiseno kuaevo ije fuka mukore. Fu Godido vierafe ijare ema ijiebuo vierafe mukore ije fuka asidiae. Ro Godido vierafe maeje fu vierafena Kuraesi kuamo fu kurosi ijia baronema ije e bu vierafekuae fu daro bakino kuae. Rove Godi vame ije fu rema ijare fuka ma daroki fu ema irere bu vierafena revo ije ma asidiae.
26 Ro kairafano nine izege ude ja oenoejoga Godi fu kumeno ja una e fuone reva ije vierafefo. Maza ijia e sibaneke gue jadua ja e ije bu ume igia vua mukoe vierafevo ije no kuaevo ijiege mukoe vierafevo. Ro kuke e sibaneke gue jadua jaka daro mamekanu kena e gue samuagiavo. Ro kuke e sibaneke gue jaje bu e anuigi ijiebuo agane uve ijia nafena samuagiae. 27 Ro Godi e ije fu kumega bu e fuone revo ije fu e ije e ume igeko bu vierafekuae bu e omiseno kuaevo fu ijene keme. Fu ijiege keikina e ume igia oenoevo ije bu ijia giana vierafero vierafe buone mukore ije fuka ma bakiro buka jaeveke. Ro kuke Godi e gue fu kemo ije fu e ije e ume igeko bu giana vierafero bu e garukiro bu ijiege vierafevo fu e ijene kemo. Fu ijiege kekina e daroki ije ume igia kariva ije bu ijia giana vierafero daro buone fuka ma buzemero bu ijiege vierafena jaeveke. 28 Ro kuke Godi e ije fu kemo ije fu e ije bu e mamekanu reva fu ijene kemo baki. Ro fu e ije e ume igeko bu nese giavo fu ijene kemo. Godi fu e ijieki ije kemo ijadufuo maeje erarebe bu iviama ume igia vierafero buka e mamekanuro bu ijiege vierafevo ije rade Godi fuka bu giamemareke. 29 Godi fu e ijieki ijene kekina e bube uri Godido nidua ijia aroekaradufuo.
30 Ro iviama jaeje jane una Godido anafa rei. Godi fu Jesu Kuraesi kuaga fu no karaunuona ifejuoga no ire boeje mukoreigia vierafekinu renoeke. Ro kuke fure ifejuoga no Godido nidua ijia e akae redufuo. 31 Ro Godi fu ire ije rema ijadufuodo e be fu oenoene aroekarakuma fume E Ireobo irere fu rema ijiaru kuaena aroekaradufuo. Ijadufuo iviama no vierafe vua irere bu isuibe Godido buki ijia isoena kuaeva ije fu ma kuae. Ro vua ije bu ijiege isoena kuae,
Erare fu aroekarakiro vierafekuma ni irere E Ireobo fu rema ijiaru kuaena aroekarano kuae.