KOLOSE
MeKolose ꞌidi leta Paulo ꞌileleya
Toheꞌita ꞌaboꞌabo meKolose siguguyediya, sigwaeya, “Yesu Keliso geya sowasowahina ma ꞌiꞌabihetegita ꞌida pui mabwaiyana ꞌoidiyega. Tauna ꞌina waiwai tupwana, ta ꞌilobwainegita tupwadi ꞌebe hemisao wete tamuliyedi.” Coinega meKolose ꞌidi leta bewa ꞌalona Paulo guguya dumwaluna ꞌiꞌebwaediya, ꞌigwaeya, “Yesu Yehoba Natuna, Tohewaiwai hedada, taboinamo tauna ginaula mabwaiyana sowasowahina.
1
Loyauwedo
Taugu Paulo, ma Yehoba ꞌina hesinuwega yahetohepwaila Yesu Keliso weyahina, ta tasidai Timoti ꞌiꞌabihetegauwa, ꞌoinega ꞌimi leta bewa yaleleyawa, ꞌomi meKolose, Yehoba ꞌina bodao, ma Keliso ꞌana tohemisao, ꞌoimiya. Tamada Yehoba ꞌina helauwega tuwa wamiya daumwala.
Paulo meKolose weyahidi ꞌiloyauwedo
Sauga mabwaiyana ꞌima ꞌahwanoi Yehoba ꞌoina, tauna ꞌida Bada Yesu Keliso Tamana, ma ꞌanuwanuwa tuhugomi ta weyahimi ꞌaloloyauwedo. Weyahina wasami ꞌahesagoheya, ꞌabehega Yesu Keliso wahemisaeya, ma tohekalesiyao mabwaiyadi wahelauwediya. Weyahina wanuwatuhu yahiya ꞌabehega ꞌimi ꞌebe yaliyaya ꞌabwa waloba galewa, gide wasaina moisa mwalo wahesagoheya.
Wasaina wahesagoheya ta sauga bewa tupwa mabwaiyadi ꞌoidiya ꞌihehemadou ma ꞌihuwahuwa, ꞌomi gide saugaina Yehoba ꞌina helau wahesagoha nugeteya Epapila ꞌoinega, ma waꞌahwa moisaeya. Moisa, ꞌiyada Epapilaina loheya bwebweꞌana, ꞌoinega wasaina ꞌiheꞌita nugetegomiya. Weyahina tauma ꞌihemiyalaemaiya ta ꞌihehetapewa Keliso weyahina ꞌoimiya. Eeta Epapilaina Yaluyaluwa Tabuna ꞌana helau ꞌatemiya ꞌihepwaileya ꞌoima.
Keliso ꞌina paihowa
Saugaina wasami ꞌahesagoha nugeteya ꞌana siga bewa, ꞌima ꞌahwanoi weyahimi geya ꞌada lolaguwa. Ma hesi Yehoba ꞌoina ꞌaꞌahwaꞌahwanoi ma ꞌoinega Yaluyaluwa Tabuna ꞌiꞌabihenuwa sabwalenigomi, ta ꞌane wasanapu bwaibwaini toꞌaha ꞌina nuwatuhu weyahimi. 10 Ta ꞌimi paihowaedi ꞌoidiyega ꞌida Badaina waꞌabihe yaliyaya. Ma wete mumugami bwebweꞌana ꞌihuwahuwa, ta Yehoba ꞌana sanapu ꞌoimiya ꞌihemadou.
11 Ma wete tauna ꞌina waiwai madounega ꞌiꞌabihe waiwaiyegomi, ma ꞌimi paihowa mabwaiyadi ꞌoidiya waheꞌalamaꞌiꞌitanegomi, ma watoholo paꞌala, ta wete maꞌimi yaliyaya, 12 waloyauwedo Tamadai ꞌoina, weyahina tauna ꞌina tagwalega tupwa ꞌasiꞌasilalaina ꞌoina tamiyamiya, ꞌina tomotaiyao baꞌidadao. 13 Moisa, tupwa guguyou ꞌoinega ꞌiꞌetolihasigita ma ꞌilagubuigita Natuna ꞌina ꞌebeloina bwebweꞌana ꞌoina. 14 Weyahina tauna ꞌoina ꞌetolihasa talobeya, beno ꞌida pui ꞌoidiyega ꞌibuyogita.
15 Tauda geya sawasawahida ma Yehoba taꞌita, ma hesi ꞌana ꞌita tuwa Natunaina, ma Yehoba ꞌana paipaihowa mabwaiyadi Natunaina ꞌihane sinediya. 16 Weyahina Natunaina ginaula mabwaiyadi galewa ta baleꞌuwa huhudi, ginaulaedi taꞌitaꞌitadi ma ginaulaedi geya tada ꞌitediya, gide aneloseyao bo toloinao waiwaidi bo yaluyaluwao, mabwaiyadi Yehoba ꞌipaihowediya Natuna ꞌina paihowega, ma Natunaina weyahina. 17 Ma tuta nugenugetana ꞌoina mulina ma ginaula mabwaiyadi geya silatu, ma nugeta Natuna ꞌimiyamiya. Ta Natunaina ꞌina waiwaiyega ginaula mabwaiyadi sipaipaihowa.
18 Tauda tohekalesiyao gide tuwa yahunao ma tauna debada, ma tauna ꞌebehegaina, ta tauna wete totoholo hila nugenugetaina ꞌamasega. Ma ꞌoinega ginaula mabwaiyadi ꞌilohane sinediya. 19 Yehoba ꞌina nuwatuhu gide ma ꞌina waiwai ta ꞌina mumuga mabwaiyadi ꞌoidiyega Yesu ꞌilohemaheya. 20 Ta Yesu kelose ꞌoina bweyahina ꞌina dauwega ginaula mabwaiyadi baleꞌuwa ma galewa simiyawasiya ꞌiꞌewedima Yehoba ꞌoina sabi heꞌiyaꞌiyagu hila.
21 Comi wete mwalo wamiya wasiwasiya, ta ꞌimi nuwatuhuwega Yehoba waloꞌaleheya, ꞌoinega wamumuga galagala. 22 Ta Yesu wahina ꞌina ꞌamasa ꞌoinega ꞌiꞌewegomiya ma ꞌoinega Yehoba baꞌidamiu waheꞌiyaꞌiyagu hila, maꞌimi mumuga bwebweꞌana ma dumwaluna matana. 23 Beno ꞌeguma ꞌimi hemisa sahena ꞌiweꞌaweꞌa, ma ꞌeguma watoholo paꞌala wasaina bwebweꞌanaina wahesagoheya ꞌana hemisa ꞌoina, ma sahena waꞌebeꞌebesine. Wasaina ꞌana lohatoto tomota mabwaiyadi baleꞌuwa sihesagoha pwaiya, ma taugu Paulo ꞌana tohepwaila ꞌaigeda.
Paulo ꞌina paihowa tohekalesiyao weyahidi
24 Coinega sauga bewa ꞌagu muya yalobaloba ꞌomi weyahimi, ma tuwa maꞌigu yaliyaya. Taugu wahigu ꞌina muya ma Keliso ꞌina muya ꞌilohegogoneya ta ꞌimadouwa, tohekalesiyao weyahidi, beno taudi Keliso wahina.
25 Eeta tohekalesiyao ꞌomi weyahimi taugu wete Yehoba ꞌina loinega yahetopaihowa, ma ꞌoinega Yehoba ꞌina gwae yahehepwaila latuhe. 26 Gwaeina mwalo tubudao ꞌoidiyega ꞌidahweya, ma tuta bewa ꞌilagu latuheyama ꞌina tomotaiyao tauda ꞌoida. 27 Weyahina Yehoba nuwanuwana ma sanapu bewa mwalo dahwadahwaina ma bwebweꞌana hedade, ꞌabehega ꞌilagulatuhe ꞌomi ganamuli ꞌoimiya, beno Keliso nuwamiya ꞌimiyamiya, ma tauna ꞌoinega wanuwatuhuyahi ꞌabehega tupwa wasawasa ꞌoina waluhu. 28 Tauna Kelisoina ꞌahehepwaile, maꞌima sanapu moisa ꞌaloguguya ta ꞌaheheꞌita tomota mabwaiyami ꞌoimiya, ma ꞌabehega Keliso ꞌana tohemisao ꞌomi ma ꞌaꞌabilatuhegomi mamumugami mabwaiyana bwebweꞌana ta matuwana. 29 Bewa weyahina yahehetapewa, ta yahewaiwai, tauna ꞌina waiwai nuwaguwa ꞌiꞌebwaegauwa ꞌoinega.