Leta ke
Jems
Orek famu
Leta igii, Jems i siit ta u. Foron tom tasum na Buk na Gogoh ri wol le Jems igii i tualik e Iesu (par Metiu 13:55). Jems i nenge famfamu ken foron tom unune na Ierusalem (par Aposel 15:13 ke 21:18).
I siit leta igii usuf foron tom unune ae ri tafe ifuun e tatawin sing fanu ae biil ri unune. Ri fes ufu foron tom unune ma ri ka kiis arae foron ses na fale maleh tapak.
Na leta igii, i orek isi rokap na sinang ae foron tom unune rin mi lo. I fas ri sabin le rokap na sinangu ri in finngas u le unune kiri i tekentu.
Leta ke Jems i aragii:
1:1 Tanwara na leta igii
1:2-8 Unune turan rokap na wolwol
1:9-11 Foron lauu ke fanu ae ifuun e minmara ri
1:12-18 Keren tifat na fatoftof
1:19-27 Sinangun wong
2:1-13 Keren bulat lon fanu tikii
2:14-26 Unune in la turim turan rokap na foim
3:1-18 Kerme kerer
4:1—5:6 Fafanau isi sinang tinaga na piklinbat
5:7-20 Tifat na unune
1
Metiu 13:55; Mak 6:3; Aposel 15:13; Galatia 1:19Ia Jems nenge fafauun ke God ke ke Kumguui Iesu Karisito. Ia sisiit usuf gam nenge sangful ini u e mat tina Israel ae gam kiis sarara na foron maleh tikii na piklinbat. Famais kiak usuf gam.
Foron Fatoftof i Farakrakai kerer la
Foron tuaklik, aunbiing marmarsan tatawin i tapiek lo gam, ke gamen laes sau, wara le gam usum le, foron tatawin ae i tof unune kimi, in farakrakai gam isi gamek tifat. Ma gamen tifat isi sinangun tifat kimi ik mel e fua, ke liu kimi ik matuk ma gamek tapiek tortores, ke biil gamen to dar ti tier. Male tikas lo gam i pongpong isi polo na wol, i rokap le in sising, isi God ik ta u usuf i, wara le lima God i sapeng usuf fanu tikii, ke biil i balkut la lo se ae i sising u. Isau le aunbiing i sising, in sising tom ini unune ke ini in tikii sau e wolwol. Wara le se ae iwu e wolwol kia, ifasi sau arae panaf ae na palgantes ae kif i kufe u una foron falifu tikii. Gong i wol le in kep ti tier sing Kumguui, wara le iwu e wolwol kia, ma foim i tel u biil i tikiin mata.
Nenge Lauu ke nenge Kaltu ifuun e Minmara
Male nenge tualikrer na asa Iesu i bilbiling, ke in laes sau, wara le na mata God, kiiskiis kia i laumet tom. 10  Aisaia 40:6,7Ke kaltu ae ifuun e minmara, in laes sau aunbiing God i fapu kiiskiis kia. Wara le in mangmangal sau arae sian au ae i maing sape. 11 Pisiih i susupiek ini tara tuntun ke ka famang au ae. Sia ka luut ke rokap na parpar lo ka mangmangal. Ifasi sau arae kaltu ae ifuun e minmara, in mangmangal aunbiing i muduung na foron foim kia.
Wolwol Laulau kirer tom i Falamlam kerer la isi Tel Sinang Laulau
12 I kalok e kaltu ae i tifat na aunbiing i tafe foron fatoftof. Wara le se i tifat, God in suat u ini bangbang na liu ae i falimlim ta ini usuf fanse ae ri ier kanaka isi God.
13 Aunbiing ti tier i falamlam tikas isi in luut na sinang laulau, gong i tara le God i falamlam u, gong. Wara le sinang laulau biil ifasi in falamlam God, ke God tom biil ifasi in falamlam tikas isi ik luut na sinang laulau, biil. 14 Wolwol laulau ken temtem tikii na kaltu tom, i dat u ke ka falamlam u isi tel sinang laulau. 15 Aunbiing wolwol laulau i laumet, ka fang sinang laulau. Namih, sinang laulau ka laumet ke ik fang minet.
16 Foron rokap na tuaklik, gong gam somangat pes tikas isi in fabal gam. 17 Foron rokap na fafen tikii ae i kalkaluu, i pu la tom tinbae na kukulii. Ri la tinbae sing God ae i fakiis ta foron tier ae ri malal la buuii na bat. Isau le God biil i sokiliis la, arae tantanwan nenge tier ae i sosokiliis la, aunbiing pisiih i popos ulo, biil. 18 Na wolwol kia tom, ke kerer ka pang fuuh ini orek tekentu kia. I fule pes ta kerer tina foron fakfakiis tikii kia, arae inen famu ae ri ta u la usuf God.
Keren Ongen Orek ke Kerek Misuut lo
19 Foron rokap na tuaklik, gamen usum na tier igii: I rokap le gam tikii gamen wong sape, isau le gong gam orek sape ke gong gam ngaliaf sape. 20 Wara le ngaliaf ken nenge kaltu, biil ifasi in fatapiek tortores na sinang ae God i ier isi, biil. 21 Pesu, gamen tel ufu foron sinang ae i duh ke foron sinang laulau tikii ae ifuun na piklinbat tina liu kimi. Ke gamek fasabiro pes gam tom ma gamek somangat pes orek ke God ae ri ka so ta u na balmi, ae ifasi in faliu gam.
22 Gamen misuut na orek ke God, gong gam ongen foes u sau, tarama gam ka fabal fafis gam tom. 23 Se i ongen foes orek ke God, i arae kaltu sau ae i tutues ma ka par posong na mata. 24 Aunbiing i par ta u, ka la ke fanpil ka ruruu le arafa i par arae. 25 Isau male tikas i parpar rokap tole foron tortores na orek na nagogon ke God ae i fasengsegeng fanu la ma ka misuut lo, ma biil i to ruruu na sani ka ongen ta u, ke God in fakalok u na sani i tel u.
26 Male tikas i wol le i nenge tom lotu tekentu, isau le biil i fofonoi rokap na ngusu, ke lotu kia i tier foes sau ma i fabal fafis u tom. 27 Lotu tekentu ae i kalkaluu ma biil ti laulau lo na mata God Tama kerer, i aragii: Keren lupes foron natunsih turan foron makos na foron tatawin kiri ke kerek fofonoi lo kerer tom koseng foron sinang ae i duh tinaga na piklinbat.

1:1: Metiu 13:55; Mak 6:3; Aposel 15:13; Galatia 1:19

1:10: Aisaia 40:6,7