Jongöreŋ Kimbi 1
Jonöŋ Kimbiŋi mutukŋi alök.
Jim-asa-asari
Jonöŋ jöpaköm aŋguaŋgugö keuŋi köhöiba jiba malök. Urumeleŋ ambazip neŋön Anutu aka Jisös Kraist yetpuk qekötahöba kinda uru jöhöm aŋguba mohok aka maljin.
Tosatŋan keu muneŋi ambazip kewö kusum sohom eŋgiba malget: “Jisösnöŋ Suep aziyök akza. Gölmenöŋ yuai pakpak mi bölöŋi akza. Miaŋgöra Jisösnöŋ gölme azi ölŋi qahö aka malök.” Keu miaŋgöra aka tosatŋan “Anutu möt narizin,” jiba ahakmeme ölöpŋi mosöta siksauk silekmalek mala ambazip tosatŋi yom kazik ak eŋgiget aka qölzöm injarere malget. Keu sinŋi sinŋi mewöŋan zioz mem bölibapuköra Jonöŋ goro keuŋi kimbinöŋ kewö ohoba ali kayök, “Jisösnöŋ Suep aka gölme azia mohok akza. Gölmenöŋ nup meme aka mötmöt meme mi yuai bölöŋi qahö. Miaŋgöra ‘Anutu möt narizin,’ jiba Nahönŋi Jisös kude mosötpin aka alaurupnini uruninan jöpaköm aŋgubin. Urukalem mi mönö kapaŋ köla ak aŋgumakin.”
Kimbi kiaŋgö bahöŋi bohonŋi 6 mi kewö:
Malmalgö könaŋi mi Jisös 1.1-4
Asak aka söŋaup uruŋe malmal 1.5–2.29
Anutugöreŋ aka Satangöreŋ nahönbörat 3.1-24
Uŋa ölöpŋi aka öme mi mönö kewötme 4.1-6
Urukalemgö könaŋi aka jimkutukutuŋi 4.7-21
Mötnarip neŋön bölöŋi luhut alakin 5.1-21
1
Malmal köhöikŋaŋgö keuŋi mi Jisös Kraist
* Jon 1.1Nöŋön malmal köhöikŋaŋgö keuŋi jimamgöra kimbi ki ohozal. Mutuhök malmalgö keu Toŋan maliga miaŋgö könaŋe öröyuai pakpak asuhuyök. Yaŋön mala kota gölmenöŋ eriga i jeninan eka böröninan sileŋi misiriinga keuŋi jii möta malin. * Jon 1.14Oyaeŋkoyaeŋ malmalgö Toŋan asuhuiga neŋön i eka könaŋi naŋgöba jiba dangunu ewö kinjin. Malmal teteköŋi qahö miaŋgö Toŋan Iwibuk mala kota eta asuhum neŋgiyöhi, neŋön miaŋgö Buŋaŋi jim asariba uruŋini kuŋguzin. Neŋön Iwi aka yaŋgö Nahönŋi Jisös Kraist yetpuk urunini jöhöba mohot maljin. Iŋini mewöyök uruŋini nembuk jöhöba mohot malbingöra yuai eka mörini, mi jim tuarim eŋgizin. Sösöŋgainöŋ urunini kokolak qei malbingöra keu ki jim tuariba ohozin. Mewö.
Kembugö asakŋe malmal
Buŋa keu yaŋgö Nahönŋaŋgöreŋök möta jim tuarim eŋgizini, mi kewö: Anutunöŋ asakŋaŋgö Toŋi akza aka yaŋgöreŋ söŋaup kun qahö ahöza. “Neŋön yambuk urunini jöhöba mohot maljin,” mewö jitnöŋ jiba töndup aiakaninan jipjap aka söŋaupnöŋ maljin ewö, mönö keu muneŋ jiba ahakmemeninan keu ölŋi qahö wuataŋgömakzin. Anutunöŋ asakŋaŋgö uruŋe maliga neŋön miaŋgö dop aiakanini asakŋaŋgö uruŋe ahakzin ewö, mönö sutnine urunini jöhöm aŋguba mohok malinga Nahönŋi Jisös Kraistkö sepŋan mönö siŋgisöndoknini pakpak saŋgoŋmakza.
Urunine siŋgisöndok qahö ahöza, mewö jibinak ewö, mönö nanini tilipköm aŋguinga keu ölŋan urunine qahö kinma. Qahö! Siŋgisöndoknini jim miwikŋaizin ewö, yaŋön mönö uruŋi diŋdiŋaŋgö dop jöhöjöhö keuŋi pöndaŋ wuataŋgöba siŋgisön-doknini mosöta ahakmemenini goŋgoŋi pakpak saŋgoŋmakza. 10 “Siŋgisöndok qahö ahin,” mewö jibin ewö, mönö keu Toŋi oŋgiringa Anutunöŋ muneŋ jiji azi tandök aiga keuŋan urunine qahö kinma. Mewö.

*1:1: Jon 1.1

*1:2: Jon 1.14