Tesalonaika Kimbi 1
Polnöŋ Tesalonaika yeŋgöra Kimbi mutukŋi alök.
Jim-asa-asari
Rom mindimindiri kantrigö prowins qetŋi Masedonia miaŋgö siti bohonŋi mi Tesalonaika. Polnöŋ misin nup memba liliköba Filipai siti mosöta Tesalonaika kaba nup meiga tosatŋan uruŋini meleŋgetka kusum eŋgii urumeleŋ kambu alget. Mi algetmö, tuarenjoŋ mi miaŋgöreŋök asuhuyök. Polnöŋ Kraistköreŋ Buŋa keu jim asariba uruŋini kuŋguiga miaŋgöreŋ Grik ambazip Juda akeri, yeŋgöreŋök gwötpukŋan uruŋini meleŋgetka kambu miaŋön sehiyök. Miaŋgöra Juda ambazip uruŋini qahö meleŋda uruŋinan böliiga Pol andö qem waŋgiget. Andö qem waŋgigeraŋgöra lömböriiga köna jaruba eŋgömosöta Berea taonöŋ anök. Könaŋgep Korint sitinöŋ maliga neŋakŋi Timotinöŋ alabaukŋi aka Tesalonaika sitiyök kaba denöwö möt narigeri, miaŋgö kösohotŋi ali mörök.
Polnöŋ Kimbiŋi mutukŋi Tesalonaika alöhi, mi Kraistkö alaurupŋi yeŋgö uruŋini naŋgöba mötnaripŋini mem köhöimapköra ohoyök. Kembu möt nariba urukalem ak aŋgumakzei, miaŋgö buzupŋi mötagun yeŋgöra Anutu möpöseiza. Nanŋak malmal yembuk denöwö aka malöhi, mia ölum eŋgubapuköra mi papianöŋ ohoza. Tesalonaika urumeleŋ kambu sutŋine keu tosatŋi asuhui jigeri, Polnöŋ mi meleŋda jim asariba ohoza. Keu tosatŋi mi kewö: Kraistnöŋ liliŋgöba kaiga Suep malmalnöŋ aŋgotpini, miaŋgöreŋ tosatŋan uruŋini meleŋda kömupnöŋ ahözei, yeŋgöra mönö denöwö asuhuma? Kraistnöŋ wani nalönöŋ liliŋgöba kama? Keu mi meleŋda kewö jim kutum eŋgiyök, “Iŋini Kraist kunbuk kamapkö jörömqöröm aka al mamböta mala miaŋgöreŋ mönö nup ölöpŋi ölöpŋi mi jegep kinda pöndaŋ memba malme.”
Buk kiaŋgö bahöŋi bohonŋi 6 mi kewö:
Keu mutukŋi 1.1
Saiwap jiba söŋgaiba möpöseiza 1.2–3.13
Ahakmeme diŋdiŋi akŋegö kuŋgum eŋgiza 4.1-12
Kraistnöŋ kamapkö keuŋi kusum eŋgiza 4.13–5.11
Qambaŋ keu teteköŋi tosatŋi 5.12-22
Kimbigö keu kötŋi bohonŋi 5.22-28
1
* Apo 17.1Pol, Sailas, Timoti neŋön Tesalonaika urumeleŋ könagesö embuk keu eraum mötpingöra kimbi ki ohozin.
Iŋini Iwi Anutu aka Kembu Jisös Kraist yetpuk qekötahöba kingetka yetkön mönö kalem möriam eŋgiyohotka luainöŋ malme.
Mötnarip köl gulizeaŋgöra söŋgaizin.
Neŋön qösösök mötmörim eŋgiba körek eŋgöra “Anutu pipsaiwap!” jiba möpöseimakzin aka köuluk nup memba miaŋgöreŋ nalö dop qetŋini qerakzin. Iŋini Jisös Kraist jöpaköba möt narigetka urukalemŋan nam köl eŋgiiga nupŋi köhöiba memakze aka Kembuninan liliŋgöba kamapkö jörömqöröm aka kapaŋ köla mambörakze. Neŋön mi pakpak Anutu Iwininaŋgö jemesoholŋe ölöp mötmörimakzin.
Urumeleŋ alaurupnini, Anutunöŋ jöpaköm eŋgiba iŋini nanŋaŋgöra kewö möwölöhöm eŋgiyöhi, mi mötzin. Neŋön Jisösgö Ölöwak Buŋaŋi memba eŋgöreŋ kaba sutŋine denöwö aka malini, iŋini mi mötze. Neŋön Buŋa mi keu töhönök qahö jiin mötketmö, Uŋa Töröŋan mönö sölölöhöm neŋgii awösamkakak kinda ösum-mumuŋambuk uruŋini kuŋguba malin. * Apo 17.5-9Mewö malinga iŋini köŋjiliŋ ketaŋaŋgö uruŋe mala Buŋa keu möt aŋgön kölget. Mi aŋgö kölgetka Uŋa Töröŋan sösöŋgai eŋgiiga Kembu aka neŋgö siliknini wuataŋgöba malje. Mi denöwö asuhuyöhi, neŋön mi ölöp mötzin. Mewö andönine kaba mala Masedonia Akaia prowins yahöt miaŋgöreŋ Jisös möt narizei, körek pakpak yeŋgöra silik ölöpŋi kondel eŋgimakze.
Mi kewö: Iŋini Kembugöreŋ keu möta aŋgön köla jiba malgetka tosatŋan mi aŋgötömual ewö toroqeba jim sehigetka anök. Anda mala Masedonia aka Akaia prowins yahöt mi dop köl teköyök. Mi dop köl teköyökmö, miyök qahö. Iŋini Anutu möt nariba nupŋi megeri, miaŋgö ölŋan mönö gölme dop anda kaba sehiiga gwötpukŋan uruŋini meleŋget. Mi kilik-kalukŋi qahö. Miaŋgöra nini miaŋgö keuŋi kun qahö toroqeba jibin.
Nini eŋgöreŋ kainga denöwö asuhuyöhi, miaŋgö kösohotŋi mi miri tosatŋi yeŋön jigetka aŋgötömual ewö mörakzin. Iŋini tandö lopioŋ aka bem muneŋi andö eŋguba Anutu ölbölŋi aka malmal Toŋi yaŋgöreŋ meleŋda nupŋi memba malje. 10 Anutunöŋ Nahönŋi mem gulii kömupnöhök wahöröhi, iŋini yaŋön Suep mireyök eta asuhumapköra mambörakze. Anutugö irimsesewölŋan könaŋgep aukŋe asuhuiga Jisösnöŋ mönö eta jeŋberereŋ kanjamŋambuk miaŋgöreŋök meköm neŋgima. Mewö.

*1:1: Apo 17.1

*1:6: Apo 17.5-9