Korint Kimbi 2
Polnöŋ Korint yeŋgöra kimbi aliga 2 ahök.
Jim-asa-asari
Pol aka Korint urumeleŋ könagesö yeŋön urumohot ölöpŋi qahö aketka nalö miaŋgöreŋ Polnöŋ Masedonia mala kimbiŋi ki ohoyök. Tosatŋan Pol tuarenjoŋ köhöikŋi ak waŋgigetmö, Polnöŋ töndup aŋgururuk memba et ala yembuk urumohot akingö kapaŋ kölök. Aŋgururukŋini tekömapkö urusösöŋgaiŋi kondel eŋgiyök.
Kimbi bahöŋi mutukŋi (Boŋ 1-7) miaŋgöreŋ Polnöŋ Korint urumeleŋ könagesö yembuk jöhöjöhö ahöhaŋgö keuŋi jiza. Könaŋi denöwögöra urumeleŋ könagesö mi köhöikŋanök jim eŋgiyök? Mewö aiga uruŋini meleŋda urumohot akeri, miaŋgö sösöŋgaiŋi kondela jim asariza.
Kimbi bahöŋi 2 (Boŋ 8-9) miaŋgöreŋ Judia urumeleŋ könagesö bauköm eŋgiba naluk eŋgimegöra kuŋgum eŋgiza.
Kimbi bahöŋi 3 (Boŋ 10-13) miaŋgö keuŋi kewö: Böhi takapulakaŋi tosatŋan nanŋini qetŋini ‘Aposol ölŋi’ jiba Polgöra aposol muneŋi jigetka Polnöŋ keu miaŋgö likepŋi meleŋ eŋgiyök.
Buk kiaŋgö bahöŋi bohonŋi 5 mi kewö:
Jim-asa-asari keu 1.1-11
Pol aka Korint urumeleŋ könagesö 1.12–7.16
Judia urumeleŋ kambu yeŋgöra naluk alme 8.1–9.15
Polnöŋ aposol ölŋi akzawaŋgö kukösumŋi 10.1–13.10
Keu teteköŋi 13.11-13
1
* Apo 18.1Anutunöŋ sihimŋaŋgö dop Pol ni kuŋgum niŋgiiga Kraist Jisösgö melaimelai azi aposol akzal. Nöŋön urumeleŋ alanini Timotibuk tatzit. Korint sitinöŋ Anutugö urumeleŋ könagesö maljei aka ambazip sarakŋi pakpak Akaia prowinsŋini dop köla maljei, netkön embuk Buŋa keu eraum mötpingöra kaba kimbi ki ohozit.
Anutu Iwinini aka Kembu Jisös Kraist yetkön mönö kalem möriam eŋgiyohotka luainöŋ malme.
Polnöŋ Anutu urukölalepŋaŋgöra möpöseiza.
Nini Kembunini Jisös Kraistkö Anutu Iwiŋi möpöseimakzin. Yaŋön mönö ak-kömukömu Toŋi aka urukölalep pakpak neŋgimakzawaŋgö Anutuŋi akza.
Nini kahasililiŋ könaŋi könaŋi miwikŋaimakzini, nalö miaŋgöreŋ Anutunöŋ uruqesawölim neŋgimakza. Uruqesawölim neŋgii möta miaŋgö qakŋe kininga tosatŋan kahasililiŋ könaŋi könaŋi miwikŋaimakzei, mi mönö ölöp amqeba uruqesawölim eŋgimakin. Miaŋgö könaŋi kewö: Kraistpuk qekötahöinga yaŋgö sihimbölöŋan qaknine öŋgöi keleŋmaleleŋ mörakzinmö, miaŋgö dop uruqesawölim mewöŋanök neŋgii Kraist qekötahöinga urukölalepŋan urunine geiga keleŋmaleleŋ mörakzin.
Neŋön köŋjiliŋ uruŋe maljin ewö, Anutunöŋ mönö iŋini uru qesawölim eŋgii uruŋini kunbuk meleŋda oyaeŋkoyaeŋ akŋegöra mötza. Anutunöŋ uru qesawölim neŋgiiga eŋön mi eka nanŋinak uru qesawölim miwikŋaime. Uru qesawölim eŋgimakzawaŋgö ölŋan mönö uruŋine kewö asuhumakza: Nini sihimbölö möringa eŋön tok sihimbölö miyöhök miwikŋaime ewö, mi mönö ölöp möta mökösöŋda kin köhöiba malme. Sihimbölönöŋ qakŋine öŋgöi mörakzei, uru kölalepnöŋ mönö mewöŋanök qakŋine öŋgöi malje, mötzin. Mi möta miaŋgöra eŋön kin köhöimegöra mamböta jörömqöröm köhöikŋi ahakzin.
* 1 Kor 15.32O urumeleŋ alaurupni, nini Eisia prowins uruŋe nup memba mala nupkö sihimbölö möta kahasililiŋ miwikŋaiba mörini, iŋini miaŋgöra gukmaulem malbepuköra mötzin. Nupkö lömbötŋan ösumnini oŋgita öŋgöŋgöŋi aka mulumgöm neŋgiiga kin köhöibingö osiinmö, töndup kapaŋ kölinga mem et al neŋgiiga malin. Mewö asuhuiga toroqeba malbin me qahöwi, miaŋgöra mewöyök tötböröm aka malin.
Mewö mala uruninan kewö mötmöriin: Kunöŋ kömumbingö keuŋi lök jim teköi keu miaŋön qaknine öŋgöi ayuhubingö mambörin. Nanini ösumnöŋ nariba malbinbukmö, Anutu kukösum qakŋe nariba malbingöra aka mewö asuhuyök. Anutunöŋ kömukömuŋi mem gulim eŋgii wahötmei, yaŋön mönö amqeba nini mewöyök bauköm neŋgimakŋa.
10 Kömumbinbukö keŋgöt mötmöt öŋgöŋgöŋi ahinmö, Anutunöŋ mönö miaŋgöreŋök meköm neŋgiyök. Meköm neŋgiyök aka toroqeba meköm neŋgimakŋa. Nini jörömqörömnini Anutugöreŋ ala mewö möt narim waŋgiba kinjin. 11 Iŋini mewöyök bauköm neŋgiba neŋgöra aka köulukögetka meköm neŋgimakŋa. Gwötpukŋan neŋgöra aka köulukögetka Anutunöŋ möta miaŋgö likepŋi meleŋni kalem möriamŋan dop köl neŋgii neŋgehorimakŋa. Mewö meköm neŋgiiga alaurup gwötpukŋan mi möta neŋgöra aka mindiriba möpöseigetka köiraŋ köulukŋinan öŋgöba Anutugö kezapŋe gemakŋa. Miaŋgöra mönö toroqeba nöŋgöra aka Anutu köulukömakŋe. Mewö qesizal.
Polnöŋ köna anangö areŋi uteköyök.
12 Tosatŋi iŋini nöŋgö könaŋamnaŋgöra uruyahöt akzei, miaŋgöra keu kewö jimam: Anutunöŋ solanŋi malbingö mörakzawi, neŋön miaŋgö dop gölmeŋi gölmeŋi liliköba miaŋgöreŋ ahakmeme sarakŋi mi pöndaŋ wuataŋgöba malin. Eŋgö sutŋine mi mönö kapaŋ köla törörök wuataŋgöba malin. Mi gölme ambazip mötkutukutuninaŋgö dop qahöpmö, Anutugö kalem möriamŋan inahöm neŋgiyöhaŋgö dop mi aka memba malin. Anutunöŋ ahakmemeni mi eka naŋgöba “Dop kölja,” jiiga urukezapnan keu mi mörakzal aiga miaŋgöra silenini memba öŋgömakzin.
13 Kulem ohomakzali, miaŋgö keuŋi pakpak mönö ölöp oyoŋda möt asarimeaŋgö dop akza. Keuni mi geŋmoŋi qahö. Keu könaŋi asa-asambötŋi kun qahö ohomakzal. Mi aukŋeyök ahöza. Miaŋgöra nöŋgö könani mi körek möt asarim tekömegöra möta jörömqöröm akzal. 14 Nöŋgö könani mi lök bahösapsap kewö möt asarize: Kembunini Jisösnöŋ kunbuk kamawi, nöŋön mönö nalö miaŋgöreŋ eŋgöra aka sileni memba öŋgömam. Miaŋgö dop iŋini mewöyök ölöp nöŋgöra aka sileŋini möpöseigetka dop kölma. Iŋini nöŋgö könani mewö möt asarim tekömegöra mötzal.
15 Nöŋön keu miaŋgö qakŋe awösamkakak kinalaŋgöra aka mutuk eŋgöreŋ kaba eŋgekŋamgö areŋi alal. Indimŋi yahöt eŋgekiga kötumötuet mötmegöra aka köna anmamgö areŋi kewö albi ahöyök: 16  * Apo 19.21Masedonia prowinsnöŋ anmamgö könanöŋ mutuk iŋini eŋgeka toroqeba Masedonia anda liliŋgöba kunbuk eŋgöreŋ kamamgö jial. Kaba malbi yuai tosatŋi bauköm niŋgiba melaim niŋgigetka eŋgömosöta Judia prowinsnöŋ anmamgö möral.
17 Areŋni mewö albi ahöyökmö, mi uteköyal. Mewö aka an köl kam köl qakŋe möndöba laŋ qahö ahal. Nani areŋni mi gölme ambazipkö dop nanaŋgöra laŋ mötmöriba qahö ahal. Mewö kude mötmörime. Numbu ösum mohot miaŋönök “Oŋ, ölöp kamam!” aka “Qahö kamam!” keu yahöt mi mindiriba qahö jial. Mönö ahakmeme sarakŋi wuataŋgömakzal.
18 Anutunöŋ keu jiba miaŋgö dop pöndaŋ ahakzawi, neŋön mönö yaŋgö jeŋe kewö jim köhöizin: Neŋön nalö kunöŋ “Oŋ, mi ölöp akin,” jim jöhöba miaŋgö andöŋe “Mi qahö akin,” pötagororoŋ keu mewö meleŋqeleŋ qahö jiba malin.
19  * Apo 18.5Anutu Nahönŋaŋgö könaŋi kewö: Nöŋön Sailas aka Timoti yetpuk eŋgö sutŋine Kraist Jisösgö könaŋi jim asariba malinga yaŋön “Anutugö jitŋi tem kölmam!” aka “Qahö tem kölmam!” keu jöl yahötyahötkö qakŋe meleŋqeleŋda qahö kaba malökmö, Anutugöra keu jiba jöhöyöhi, miaŋgöra mönö “Oŋ!” jiba miaŋgö dop aka memba malök.
20 Anutunöŋ jöhöjöhö keu (promis) sehisehiŋi dawik neŋgiyöhi, qötöŋini qahö mötzinmö, Kraistnöŋ keu körek mieŋgöra “Oŋ!” jiba mem köhöiiga pöwöwöm ahöza. Miaŋgöra Kraistnöŋ mewöyök nam köl neŋgii keu mieŋgö ölŋinan asuhui möta “Keu mi ölŋa,” jibin. Mewö ahinga Anutugö qetbuŋaŋan sehimakŋa.
21 Anutu nanŋak mönö nini aka iŋini mohot mem köhöim neŋgiiga Kraistpuk qekötahöba kin köhöibin. Yaŋön mönö Buŋa keu jim sehibingöra aka bedu mem neŋgii maljin. 22 Anutunöŋ urunine Uŋa Töröŋi mekötahöiga yaŋön oyaeŋkoyaeŋ malbingö keuŋi naŋgöba jim köhöimakza. Anutunöŋ mewö aka buŋaŋi akzinaŋgö muŋgem supapŋi mi mekötahöm neŋgiyök.
23 Nöŋön tembula lömböt eŋgibileŋbuköra möta zilaŋ Korint eŋgöreŋ qahö liliŋgöba kayal. Mewö jiba Anutugö qetŋi qetpi ölöp keuni mi naŋgöba jima. 24 Silik denöwö aka Anutu möt narimakzei, miaŋgöreŋ kembu ak eŋgimamgö qahö mötzal. Mötnaripŋinan lök töndangöm eŋgiiga kin köhöimakze. Miaŋgöra sösöŋgai qakŋe malmegöra bauköm eŋgimamgö möta embuk mohotŋe urugö nup memakin. Mewö.

*1:1: Apo 18.1

*1:8: 1 Kor 15.32

*1:16: Apo 19.21

*1:19: Apo 18.5