9
Mewö jiba kewö jii mötket, “Nöŋön keu ölŋi kun kewö jibi mötme: Kiaŋgöreŋ kinjei, eŋgö sutŋineyök tosatŋan Anutunöŋ bemtohoŋi kuŋguiga kukösumŋan asuhumawi, mi ek kutume. Jebuk mala kömupkö sihimbölöŋi qahö mötketka asuhum tiŋgiriga ekŋe.” Mewö.
Jisösgö sileŋe letotqetot ahök.
Mat 17.1-13; Luk 9.28-36
* 2 Pitö 1.17-18Wehön 6 teköiga Jisösnöŋ Pitö, Jeims aka Jon eŋguaŋgita ambazip eŋgömosöta nanŋinök kunduŋi köröpŋi kunöŋ öŋgöba kötikŋe malget. Miaŋgöreŋ malgetka jemesoholŋine kiniga Jisösgö sile tandökŋan letota murutŋi ahök. Malukuŋan tuat lalamŋi asakmararaŋambuk ahök. Gölmenöŋ opo tuatŋi saipenöŋ (omo bliz) saŋgoŋmakzei, mönö mi oŋgita tuariyök. Mewö aiga Elaija aka Moses yetkön asuhum eŋgiba Jisösbuk keukeu jiget. Jigetka Pitönöŋ könahiba keu jiba Jisösgöra kewö jiyök, “Ketaŋamnini! Neŋön kiaŋgöreŋ uruölöwak mötzin. Miaŋgöra neŋön ölöp koum karöbut qebin: Göhö kun, Mosesgö kun aka Elaijagö kun.” Gwarek yeŋön jönömŋini gwötpuk unduiga Pitönöŋ “Denöwö jimam,” jiba keu jaruyök.
* Mat 3.17; Mak 1.11; Luk 3.22Keu jaruba kiniga unuŋunuŋ tuat lalamŋi asakmararaŋambuk kunöŋ eta aumŋan esuhum eŋgiiga miaŋgö uruŋeyök qet kun kewö eriga mötket, “Azi ki nani wölböt nahöna akza. Mönö yaŋgö keuŋi möta malme.” Keu mi möta könöpuk liliŋgöm purik um jaruba tosatŋi kunbuk qahö etkeketka Jisösnöŋ nanŋök yembuk kinök. Mewö.
Jon O-melun azi mi Elaijagö salupŋi akza.
Kunduŋeyök etketka Jisösnöŋ sörökŋi miaŋgöreŋ kewö jim kutum eŋgiyök, “Iŋini yuai ekzei, miaŋgö buzupŋi mi mönö ambazip kun kude jiget mötme. Suep gölmegö azi ölŋan kömupnöhök wahöriga miaŋgö andöŋe mi ölöp jim asariba malme.”
10 Mewö jim kutum eŋgiiga gwarekurupŋi karöbut yeŋön keu mi uruŋine aŋgön köla “kömupnöhök wahötwahötkö” könaŋi mi nanŋini qesim aŋguba eraum mötket. 11  * Mal 4.5; Mat 11.14Eraum möta Jisös kewö qesim waŋgiget, “Köna keugö böhi yeŋön mönö keu kewö jimakze, ‘Kezapqetok azi Elaijanöŋ mönö Suepnöhök mutuk eta asuhuma.”
12 Qesim waŋgigetka meleŋda kewö jiyök, “Elaijanöŋ mutuk eta asuhuba malmal pakpak möhamgöma. Keu mi ölŋa akzapmö, keu kun ki mönö wuanöŋgöra ohoget ahöza: Suep gölmegö azi ölŋan mönö sihimbölö gwötpuk möriga jijiwilit ak waŋgime.” 13 Keu yahöt mi ahözahotmö, nöŋön kewö jibi mötme: Elaijanöŋ lök eta asuhuyökmö, yaŋgöra Buŋa keu ohoget ahözawaŋgö dop ambazipnöŋ i nanŋini sihimŋini wuataŋgöba laŋ ak waŋgiget.” Mewö.
Jisösnöŋ öme wuataŋgöi morönöŋ ölöwahök.
Mat 17.14-21; Luk 9.37-43
14 Jisös aka gwarek karöbut yeŋön kunduŋeyök eta gwarekurupŋi tosatŋi yeŋgöreŋ kaba yuai kewö eket: Köna keugö böhi tosatŋan kinda yembuk jitnakölik aka goranora keu jigetka ambazip jesöŋgöŋan liliköba eŋgeka kinget. 15 Mewö kinda ambazip kambu pakpak yeŋön Jisös eka miaŋgöreŋök auruba kiŋkiŋgöba kösutŋe anda jölöŋi jiget. 16 Jölöŋi jigetka kewö qesim eŋgiyök, “Iŋini wanatköra yembuk jitnakölik aka goranora keu jize?”
17 Qesim eŋgiiga kambuŋineyök azi kunöŋ meleŋda kewö jii mörök, “Böhi! Nöŋgö nahöni ömenöŋ numbuŋi muhungöba töŋöt mem waŋgiiga waŋgita göhöreŋ kazal. 18 Mi miaŋgöreŋ me miaŋgöreŋ memba mendawöla öröm giliga eta qeba numbuŋeyök qölqöl söutsöut eriga irimŋi yöhözömgöba sileŋan sölöpkömakza. Mewö ahiga kaba göhö gwarekurupki ulet eŋgiba öme mi wuataŋgömegö jizalmö, yeŋön osize.”
19 Mewö jiiga meleŋ waŋgiba jiyök, “Gölmegö yaŋgiseŋ ambazip yei! Mönö nalö dawik embuk mala qatön eŋgubiga Anutu qahö möt narigetka sihimbölö mötmam. I mönö waŋgita nöŋgöreŋ kaget.
20 Mewö jiiga waŋgita yaŋgöreŋ kaget. Kagetka ömenöŋ Jisös eka miaŋgöreŋök morö utuköba urepköm waŋgiiga wölöhariba tala gölmenöŋ qeba pöraŋpöraŋ mitiba semben auba ahöiga numbuŋeyök qölqöl söutsöut kota erök. 21 Jisösnöŋ mi eka iwiŋi kewö qesim waŋgiyök, “Nalö dawikö dop yuai ki lök asuhum waŋgiiga kotza?” Qesim waŋgiiga jiyök, “Mi lök morörökŋeyök asuhum waŋgiyök.
22 Mi mem bölim waŋgimamgöra nalö tosatŋe könöpnöŋ, nalö tosatŋe onöŋ metal waŋgiiga nalö gwötpuk geba qebayök kinahakza. Mewömö, miaŋgö kukösumŋi kun göhöreŋ ahöza ewö, mönö ak kömumba bauköm netkiman.”
23 Mewö jiiga jiyök, “ ‘Kukösumŋi göhöreŋ ahöza ewö,’ jizan. Anutugö kukösumŋan mönö yuai kungöra qahö qakömakza. Anutu möt narizawaŋön mönö yuai pakpak ölöp ahakŋa.”
24 Mewö jiiga iwiŋan miaŋgöreŋök qeta jiyök, “Anutu möt narizalmö, mötnaripnan lölöwöröŋi akza. Mötnaripni mönö mem köhöiman.”
25 Jiiga ambazip jesöŋgöŋan ösumŋinan kaba kingetka eka miaŋgöra öme mi kewö jim waŋgiyök, “Gi töŋöt aka kezapduhupkö ömeŋi, nöŋön jim kutum gihizal: Gi mönö azi ki mosöta kota anda kunbuk kude liliŋgöba kaman.”
26 Jim waŋgiiga qeta silata morö mi utuköba könöpuk urepköm waŋgii wölöhariiga utala kota anök. Kota aniga qeba qamöt tandök aka ahöiga gwötpukŋan mi eka “Wösöŋi alja!” jiget. 27 Mewö jigetmö, Jisösnöŋ böröŋe memba köbibiiga wahöta kinök.
28 Mewö kiniga Jisösnöŋ miri uruŋe öŋgöiga gwarekurupŋan nanŋinök tata kewö qesim waŋgiget, “Neŋön mönö wuanöŋgöra mi naninök wuataŋgöbingö osizin?”
29 Qesim waŋgigetka kewö jii mötket, “Öme tandökŋi mewöŋi mi mönö köuluköba nene siŋgi mala wuataŋgöbin. Yuai murutŋi kun ahinga qahö kota anma.” Mewö.
Jisösnöŋ kömumamgö Buŋaŋi jiiga yahöt ahök.
Mat 17.22-23; Luk 9.43b-45
30 Jisösnöŋ gwarekurupŋi yembuk miri gölme mi mosöta anda Galili prowins uruŋe liliköba denike malgeri, mi kunŋan mötmapkö tököyök. 31 Mia tököba gwarekurupŋi kusum eŋgimamgöra ölöŋ anget. Könanöŋ anda keu kötŋi kewö jii mötket, “Anutunöŋ Suep gölmegö azi ölŋi mi gölme ambazip yeŋgö böröŋine al waŋgii gema. Geiga i qegetka kömuma. I qeget kömui wehön karöbut teköiga miaŋgöreŋ mönö kömupnöhök wahötma.”
32 Keu kötŋi mewö jii mötketmö, mi qahö möt kutuget aka könaŋi denöwö, mi qesibingö kölköldömdöm aket. Mewö.
Gwarek sutŋine daŋön mutukŋi akza?
Mat 18.1-5; Luk 9.46-48
33 Mewö anda Kaperneam taonöŋ kaŋgotket. Miaŋgöreŋ kaŋgota nanŋi miri uruŋe öŋgöba gwarekurupŋi kewö qesim eŋgiyök, “Iŋini Könanöŋ kaba wani keuya eraum mötze?”
34  * Luk 22.24Yeŋön könanöŋ kaba ‘Daŋön öŋgöŋgöŋi akza’ mia nanŋinök eraum möta kaget. Miaŋgöra qesim eŋgiiga keu bök tatket. 35  * Mat 20.26-27; 23.11; Mak 10.43-44; Luk 22.26Keu bök tatketka Jisösnöŋ geba tata gwarekurupŋi 12 eŋgoholi kagetka kewö jii mötket, “Kunŋan mutukŋi malmamgö mötza ewö, yaŋön mönö körek eŋgö nembö bapŋine eta qöndökŋi aka tosatŋi pakpak welen qem eŋgimakŋa.” 36 Mewö jiba namande moröŋi kun memba sutŋine ali kinök. Kiniga böröŋan memba tambuŋe ala kewö jii mötket, 37  * Mat 10.40; Luk 10.16; Jon 13.20“Kunŋan namande kewöŋi kun nöŋgö qetne miriŋe köl öröba köyan kölmawi, yaŋön mönö ni köl öröm niŋgima. Kunŋan mewö ak niŋgizawi, yaŋön niyök qahöpmö, daŋön melaim niŋgiyöhi, mönö i mewöyök köl öröm waŋgima.” Mewö.
Jisösnöŋ gwarekurupŋi mindiŋgöm eŋgiyök.
Luk 9.49-50
38 Jonöŋ Jisös kewö jii mörök, “Böhi! Nini azi kun neŋgö andönine qahö kayöhi, yaŋön göhö qetnöŋ ömewöröme közöl eŋgiiga ehin. Yaŋön nembuk qahö liliköba maljawaŋgöra nini i qetal waŋgiin.”
39 Mewö jiiga Jisösnöŋ jiyök, “I kude qetal waŋgime. Kunŋan nöŋgö qetni qeta aŋgöletot mezawi, yaŋön mönö miaŋgö andöŋe nöŋgö andöqeqe keu awamŋanök jimamgö osima. 40  * Mat 12.30; Luk 11.23Kunŋan qahö qetal neŋgimakzawi, yaŋön mönö neŋgö areŋnöŋ malja. (Miaŋgöra nöŋgö alaurupni tosatŋi mi kude qetala aŋgösirip meme.) 41  * Mat 10.42I mönö naŋgöm eŋgigetka Anutunöŋ töwaŋini eŋgima. Kunŋan Kraistkö qetŋe yaŋgö buŋaŋi akzeaŋgöra aka o qambi nemegö eŋgimawi, Anutunöŋ mönö miaŋgö töwaŋi meleŋda waŋgima. Nöŋön keu ölŋi kun kewö jibi mötme: Naŋgöm eŋgimei, mieŋön mönö töwa meme.” Mewö.
Siŋgisöndokö kölgorom mönö qetal eŋgime.
Mat 18.6-9; Luk 17.1-2
42 Jisösnöŋ keu kewö jiyök, “Morö kewöŋi möt narim niŋgizei, kunŋan yeŋgöreŋök kun kölgorom ak waŋgiiga siŋgisöndok akŋawi, azi miaŋön mönö lömböt öŋgöŋgöŋi miwikŋaima. Anutunöŋ lömböt miaŋgö likepŋi denöwö waŋgiiga dopŋe akawak? Kemuŋ jamönjiŋ jölŋe jöhöba köwet röndumnöŋ gilget mulumgöi gebawak, miaŋön mönö awamŋi ahum waŋgii tandök akawak. 43  * Mat 5.30Miaŋgöra börögan siŋgisöndok akŋangö kölgorom ak gihima ewö, mönö yandim gilman. Yandim gilagun börötak mala malmal köhöikŋi miwikŋaiba oyaeŋkoyaeŋ akŋanmö, börö yahötpuk mala könaŋgep könöp sianöŋ gebanbuk. Sia könöpŋi mi nalö kunöŋ qahö bököma. 44 Miaŋgöreŋ ‘Döhöŋini eŋgöhöm pilikuta mala qahö kömume aiga könöpŋinan nalö kunöŋ kude bököma.’
45 Mewöyök könagan siŋgisöndok akŋangö kölgorom ak gihima ewö, mönö yandim gilman. Yandim gilagun könatohot mala malmal köhöikŋi miwikŋaiba oyaeŋkoyaeŋ akŋanmö, köna yahötpuk malnöŋga könöp sianöŋ gil gihigetka gebanbuk. 46 Miaŋgöreŋ ‘Döhöŋini eŋgöhöm pilikuta mala qahö kömume aiga könöpŋinan nalö kunöŋ kude bököma.’
47  * Mat 5.29Mewöŋanök jegan siŋgisöndok akŋangö kölgorom ak gihima ewö, mönö qözöla gilman. Qözöla gilagun je-ilik mala Anutugö bemtohoŋnöŋ aŋgota oyaeŋkoyaeŋ akŋanmö, je yahötpuk malnöŋga könöp sianöŋ gil gihigetka gebanbuk. 48  * Ais 66.24Miaŋgöreŋ ‘Döhöŋini eŋgöhöm pilikuta mala qahö kömume aiga könöpŋinan nalö kunöŋ kude bököma.’
49 Könöp sia miaŋgöreŋ ambazip körek mi howe sihi kölköl ewö könöpnöŋ eŋgohogetka sihimbölöŋi mötme.
50  * Mat 5.13; Luk 14.34-35Howe mi ölöpŋi akzapmö, howegö sihimŋi mosötma ewö, mi mönö denöwö möhamgögetka nahömŋi kunbuk ahubawak? Iŋini mewöŋanök urumohot malmalgö nahömŋi mosötpepuk. Miaŋgöra Suep howeŋini mosötpepuköra mönö galömŋini memba sutŋine luai qem aŋguba malme.” Mewö.

*9:2: 2 Pitö 1.17-18

*9:7: Mat 3.17; Mak 1.11; Luk 3.22

*9:11: Mal 4.5; Mat 11.14

*9:34: Luk 22.24

*9:35: Mat 20.26-27; 23.11; Mak 10.43-44; Luk 22.26

*9:37: Mat 10.40; Luk 10.16; Jon 13.20

*9:40: Mat 12.30; Luk 11.23

*9:41: Mat 10.42

*9:43: Mat 5.30

*9:47: Mat 5.29

*9:48: Ais 66.24

*9:50: Mat 5.13; Luk 14.34-35