Taitusgö Kimbi
Polnöŋ Taitusgöra Kimbi alök.
Jim-asa-asari
Azi gwabö qetŋi Taitus yaŋön uruŋi meleŋda Polbuk öröröŋ jöhöba bauköba misin nup meyohot. Memba köwet sutŋe gölme jölanŋi qetŋi Krit (Arete) miaŋgöreŋ malohotka Polnöŋ kembaŋe kutuba alabaukŋi mosöriga zioz nup areŋgöba ek kewöta galöm kölök. Polnöŋ mosöta anda yaŋgöra köuluköba mala Buŋa Kimbi ki ohoyök.
Krit mi keu Grik miambuk mindiribanbuk. Krit mi köwet sutŋe gölme jölanŋi kun aka Grik (Greece) mi kantri kun.
Polnöŋ Taitusgöra waimanjat karöbut möta qambaŋ keu kewö ohom waŋgiyök: Krit yeŋgö könaŋini mi goŋgim teköi baunam jegömöl aka malget. Tosatŋan uruŋini meleŋgetka malmalŋinan diŋgiyöhi, yeŋön kunbuk bölibepuk. Miaŋgöra yeŋgö jitŋememeŋinan silik ölöp kötökŋi kondela köuluk aka Baiböl stadi nup qahö mosöta kambuŋini mindiŋgöba malmegöra jiza. Uru meleŋget yeŋgö sutŋine kambu morömorö mi denöwö mindiŋgöba kusum eŋgiba malme? Azi namŋi, ambi namŋi, ambi seram, azi gwabö aka welenqeqe yeŋgö goro keuŋini mi nanŋök nanŋök kewö jim asariza, “Uruŋini meleŋda Buŋa keu wuataŋgöba luainöŋ mala ketaŋi yeŋgö keu bapŋe anda jegep uruk nup ölöpŋanök memba kinda julbepuköra kazik aŋgururuk mosöta malme.”
Buk kiaŋgö bahöŋi bohonŋi 5 mi kewö:
Polnöŋ aposol nupŋaŋgö könaŋi jiza 1.1-4
Anutugö jitŋememe yeŋgö goro keuŋini 1.5-16
Ambazip kambu morömorö yeŋgö goro keuŋini 2.1-15
Urukuŋgukuŋgu aka galöm meme keu 3.1-11
Yaizökzök aka keu teteköŋi tosatŋi 3.12-15
1
Polnöŋ aposol nupŋaŋgö könaŋi jiza.
Anutunöŋ ambazip möwölöhöm eŋgiyöhi, eŋgö mötnaripŋinan asuhuba qarimapköra aka Jisös Kraistnöŋ Pol ni melaim niŋgiiga yaŋgö aposolŋi akzal.
Nöŋön Anutu welenŋi qeba keu ölŋi kusum eŋgimakzal. Keu ölŋi mi möt kutuba köl gulime ewö, eŋgö malmalŋinan mönö uteköba letorakŋa. Miaŋgöra kimbi ki ohozal.
Anutunöŋ keu muneŋi jimawaŋgö dop qahö yaŋön möpŋaŋgö möpŋe malmal köhöikŋi neŋgimamgö jim jöhöba miaŋgö andöŋe yuai pakpak miwikŋaiyök. Eŋön keu ölŋi möt kutuba möt narigetka miaŋön mönö nam köl eŋgiiga malmal köhöikŋe aŋgotpiŋgöra al mamböta jörömqöröm ahakze. Anutu, Amötqeqe Toninan oyaeŋkoyaeŋgö keuŋi jim jöhöba miaŋgö nalöŋi diŋdiŋi ali kam kuŋguiga miaŋgöreŋ Buŋa keuŋi indela mi jim sehibingö jimkutukutuŋi alök. Miaŋgö dop mi jim asarigetka Anutunöŋ nöŋön mi jim sehimamgö möt narim niŋgiba kuŋgum niŋgiyök.
* 2 Kor 8.23; Gal 2.3; 2 Tim 4.10O mötnarip nahön sorokni Taitus! Nöŋön bauköm gihibi urugi meleŋda alabaukni aka mohotŋe Kembu möt nariba maljit.
Iwi Anutu aka nanini Amötqeqe Tonini Jisös Kraist yetkön mönö kalem möriam gihiyohotka luainöŋ malman.
Galöm jitŋememe yeŋgöreŋ keu areŋ
Köwet jölanŋi Krit (Crete) miaŋgöreŋ mohotŋe misin nup memba kembaŋe gömosötmamgö aka kewö jim kutum gihial, “Uruŋini meleŋget yeŋön iliŋgösöŋ laŋ maljei, i mönö areŋgöm eŋgiba (pasto aka) jitŋe memeŋini miri taon dop kuŋguba kusum eŋginöŋga areŋinambuk zioz nup memba malme.” Mewö jiba deŋnit.
* 1 Tim 3.2-7Uruŋini meleŋgeri, yeŋgö sutŋineyök azi kewöŋi möwölöhöman: Kungö sileŋe pinjitkö keuŋi qahö, anömŋi mohok-kun memba mali nahönböraturupŋan uruŋini meleŋda Anutu möt nariba yaŋgiseŋ kezapjupjup silikö keu sileŋine qahö ala jim eŋgimakze.
Urumeleŋ könagesögö ketaŋamŋini pasto (bisop)* ouwösiö, zioz paris lida, bisop, nup meme bohonŋi yaŋön qet ketaŋi öne qahö bisimapmö, paris kambu-urupŋi yeŋgöra köuluköba kusum eŋgiba uruŋini kuŋguba nupŋinaŋgö areŋini eŋgiba goro qambaŋ qakŋe galöm köla mindiŋgöm eŋgimakŋa. yaŋön Anutugö könagesö galöm köl eŋgimakŋawi, miaŋgöra mönö azi kewöŋi kuŋguman: Kungö sileŋe pinjitkö keuŋi qahö, jakbak-öraŋböraŋ qahö aka urupik qahö. O köhöikŋi qahö nemba bim laŋ qahö qeba möndömöndö qakŋe injarere mala moneŋ yuaigöra qahö kapaŋ kölakza. Yaŋgöreŋ kamei, i ölöp köl öröba köyan köl eŋgiba keu ahakmeme ölöpŋaŋgö sihimŋi möta uruŋi miaŋgöreŋ ala malma. Kilik-kaluk kekpurikŋi qahö, keu pakpak diŋdiŋanök kewöta sarakŋi töröŋi qainŋi kun aka nanŋi ahakmemeŋi törörök galöm köl aŋgumakŋa.
Buŋa keu kusum neŋgigetka tandö söran ewö malmal töngumamgöra ahözawi, pastonöŋ mi mönö töp memba miaŋgöreŋ qekötahöba kinma. Mewö kinda ölöp Buŋa Kimbigö dop mötnaripkö keu kembaŋi kembaŋi ambazip kusum eŋgiba miaŋön uruŋini kuŋgumakŋa aka tosatŋan Buŋa keu möwöramgöba qetalakŋei, yeŋgö keuŋini goŋgoŋi ölöp qeapköba mindiŋgömakŋa. Mewö.
Böhi takapulakaŋi mönö qetal eŋgime.
10 Ambazip gwötpukŋan keu qetala kezapjupjup aka sesekŋai ewö keu sinŋi sinŋi jiba ambazip tilipköm eŋgimakze. Anutugö aiwesökŋi sileŋine yandigeri, yeŋgö kambunöhök ambazip jesöŋgöŋan mewö ahakze.
11 Ambazip mewö mieŋgö keuŋini mönö qömbököme. Yeŋön Buŋa keu kusum eŋgibingö möndöba moneŋ yuaiŋini öröbingö möta kösawöraŋ keu laŋ jigetka gamuŋambuk ahakza. Mewö aka saiwa tosatŋi lök körekŋanök mem sohom eŋgigetka eŋololoŋ aket. 12 Krit nanŋine kezapqetok azi kunŋan aiakaŋinaŋgöra kewö jiba ohoyök, “Krit ambazipnöŋ mönö nalö dop keu muneŋ jiba injarere qölzöm mala ubibi kömböt ewö lilikqilik aka bau numbu nemakze.” 13 Yeŋgöra keu mewö naŋgöba jiyöhi, miaŋön mönö ölŋa. Miaŋgöra kawölŋinan qahöwahi mötnaripŋinan asuhuba ölŋambuk akŋapköra i mönö köhöikŋanök tereŋgöba jim eŋgimakŋan.
14 Mötnaripŋinan ölŋambuk aiga Juda neŋgö bem sambanini aka ambazip keu ölŋi siŋgiba jimkutukutu alakzei, keu mewö miaŋgö kezap kude alme. 15 Urunini meleŋniŋga Uŋa Töröŋan köl könjörat ak neŋgiiga sarakŋi akzini, neŋgöra nene kungö dönqizizinŋi qahö ahöza. Neŋön nene pakpak ölöp nembinaŋgö dop akzapmö, qewöloŋ ambazip keu ölŋaŋgö yaŋgiseŋ ahakzei, yeŋön i me wai aketka uruŋinan töndup tölohomakza. Uruŋinan kölköljiŋjiŋambuk aiga uruŋinaŋgö kezapŋan duhui mönö bau jegömöl tandök malje.
16 Yeŋön “Anutugö könaŋi möt yaközin,” jitŋinan mewö jigetka aiakaŋinan mi qaŋ köla qeapkömakze. Mewö aka Anutugö keuŋi qetalgetka imbiloŋloŋ möt eŋgiiga ahakmeme ölöpŋi kun memeaŋgö dop qahö akze. Mewö.

*1:4: 2 Kor 8.23; Gal 2.3; 2 Tim 4.10

*1:6: 1 Tim 3.2-7

*1:7: ouwösiö, zioz paris lida, bisop, nup meme bohonŋi yaŋön qet ketaŋi öne qahö bisimapmö, paris kambu-urupŋi yeŋgöra köuluköba kusum eŋgiba uruŋini kuŋguba nupŋinaŋgö areŋini eŋgiba goro qambaŋ qakŋe galöm köla mindiŋgöm eŋgimakŋa.