A Ruana Raukea i Herea e
Ioanes
1
Mu lohoka nau, iau a bakovi dagi na lotu. A here lakea na ngatavine, ra Vure i vulakia, turana e huriki e tuna. A ngaru hateka mua. Pali i uka ma i iau kunana. E huriki ri lohoka na ngava muholi, ria ranga ri ngaru hateka mua, a vuhuna si lohoka vona a ngava muholi, si gi ramai vakaroro. A Vure, e Tamane hita, e Tuna e Isu Kristo ru gu rata kamumu hita, ru gu dodo hita, ru gu habi a nivalemu ne hita na naro muholi, na naro na nivangaru.
A Vinara na Nivangaru
* 3Ion 3-4A vivi hateka na tahuna a longo ranga ne huriki e tumu ri tabana ni ramai a nita muholi, i manga a hini e Tamane hita i vakuku hita si gi rata. * 1Ion 2:7Ngane, o kurabagu, a ngaru si gi vangaru. A vinara a herea, i uka ma a vinara karaba. A vinara iea si longoa hosi pali. Na tahuna si longototo a maka vinara na Vure, bara si vangaru. Pali a Vure i vakuku hita hosi si gi vangaru, lakea a ngaru mu gu longototo.
E Huriki a Pile ne Kristo
* 1Ion 4:1-3A bakovi ala kupo ri laho lae, ri takia e Isu Kristo, na tahuna i valai koea na malala, ta i uka ma i bele manga a bakovi. E rei a viri i tovo maea, ia a bakovi na taminga, a pile ne Kristo. Mu mata­doko, ma mu gu vakavelu a maki si leho tora hateka ni bole. A ngaru mu gu bole lobo a mapane mua. E huriki ri pe a nitovo ne Kristo, ri pagepolo lakea na ngava ranga, e huriki nga, a Vure i uka ma i made turane ria. Pali e huriki ri pesi tora ni muri mai a nitovo iea, e Tamana, e Tuna rua varago ru made turane ria. 10 I mavonga, e rei a bakovi ge valai ne mua, ge tovo na ngava vaperesi, naha ni taguia. Naha ni mata­karia na ruma ne mua, 11 a vuhuna e rei a viri ge tagui a bakovi maea, i koria na leho hale vona.
A Nilobona Ngava
12 A tahoka a ngava i kupo a ngaru ni vakalongo mua vona, pali a koi ni here kunana. A ngaru ni lakene mai mua, si gi vivi ni vamatai, ni tuverei.
13 A re tarimu a ngatavine. E huriki e tuna ri talo rike a haro kamumu vomu, re tarimu a Vure i vulakia.

*1:4: 3Ion 3-4

*1:5: 1Ion 2:7

*1:7: 1Ion 4:1-3