1 Sa Paulus sën Anutu ggooin sa raḳ in bë sa natu Kerisi Yesu yi sinarë lo. Alu hil arid Timoti ḳevu ḳapiya sënë yök vu ham sën Kerisi-yi-alam vu Korint aga, gevu Anutu-yi-alam pin sën denedo yoh vu distrik Akaya pin lo. 2 Hil Amad Anutu luho Mehöböp Yesu Kerisi degevonġ hir semusemu nök gëp geving ham beham ayomin gëp revuh.

3 Hil ġaḳo hil Mehöböp Yesu Kerisi Ama Anutu arë jaḳ, in yi Anutu, mehö kwa vonġinsën los aye semusën ala. 4 He nado los nġaa maggin medeġinengin he panġsën rëḳ Anutu nesemu aye in he. Yö medo nevonġ nebë saga, om he nġo ayoh vu bë rëḳ semu ayemin in alam sën denedo loḳ maggin ayo lo, nabë sën Anutu nesemu aye in he agi. 5 In vanë aggagga sën töḳ vu Yesu lo töḳ vu he panġsën, rëḳ mu yiḳ Kerisi aye semusën nedo ving he nebë saga ving. 6 Nġaa maggin töḳ vu he in bë gevonġ beham ayomin sepëp beham nom vu Anutu. Log Anutu semu aye in he behe ayomin sepëp in bë gevonġ beham ayomin sepëp jaḳ doḳ buk sën ham kwerë maggin nabë he lo, bemëm ham bare niwëëk. 7 He kwamin nevo ham behe raḳ ni vorot bë ham rëḳ gweḳo maggin nabë sën he, om Anutu rëḳ gevonġ beham ayomin sepëp jaḳ geving nabë he.

8 Arig lo, nġaa maggin sën töḳ vu he ggëp distrik Asia* lo, saga he su ayoh vu bë adah vun in ham rë. Gaḳ vasap he panġsën medeġinengin he ahon rot kesuu behe kwamin nevo bë maḳ he su rëḳ medo vesamin rë. 9 Nġaa saga töḳ vu he rot behe kwamin vo bë he rëḳ malamin nama yönon. Rëḳ he raḳ ni bë nġaa nebë saga netöḳ vu he in bë he jaḳ ni nabë he nimin wëëk su yoh vu bë adoḳ vu he rë, om hil ġetunġ malad in Anutu timu sën nenër balam-diiḳsën denekedi raḳ yah lo. 10 Anutu ḳo he vër in nġaa saga gehe su adiiḳ rë, gerëḳ geḳo he vër nabë saga gökin. Yönon, he nehetunġ malamin in yi yö timu bë rëḳ geḳo he vër in nġaa vahi pin gök gökin nabë saga. 11 Om hameḳ najom jaḳ in doḳ vu he geving. Nabë sënë in Anutu genġo alam nġahiseḳë hir jomraḳsën medoḳ vu he, behe doḳ vu alam nġahiseḳë bemëm kwaj vesa vu Anutu in he.

12 He kwamin vesa in nġaa sënë behe raḳ ni bë yönon. Sënë nebë: He su kwamin nevo bë alam debo nġaa doḳ nah he huk rë, gaḳ Anutu og neloḳ vu he, gehe nehevonġ nġaa niröp los ġaġek anon sën Anutu vonġ vu he lo vu ham los alam pin. 13 Gehe su neḳevu ġaġek peggirinsën malah ġaġek vun in ham rë, gaḳ he neḳevu meneggëp ranġah in bë ham natevin beham jaḳ degwa ni. 14 Ham nġo raḳ he ġaġek vahi ni ggovek beham kwamin vesa in he nebë sën he rëḳ kwamin vesa in ham doḳ buk sën hil Mehöböp Yesu duḳ nom lo. 15 Sa kwaġ nevo ġaġek saga gesayoġ kehe sa vorot bë senök vu ham, besa ġevonġ beham kwamin vesa natu beron luu rë, rëḳ ma. 16 Wirek og sa kwaġ nevo bë senök geto ham nyëġ loḳ mëm sena Masedonia. Log nabë sa vu sagu mesenom, og sëḳ nom ġeto ham nyëġ gökin, loḳ mëm ham gweli sa na aggata besenah Yudea. 17 Rëḳ ma gesa su yoh vu rë. Ma ham kwamin nevo bë senër bë sëḳ nök rëḳ ma gesenġo nër jeggin jeggin gesa su kwaġ nevo nivesa rë? Ma ham kwamin nevo bë sa nanër nebë sa ġevonġ nġaa, loḳ ma gesa nehaḳo seggi seggi nebë alam-dob-yi? 18 Ma! Anutu mehö ġaġek anon degwa, om sa nebë saga ving. Sa su nayoġek los nanër ma loḳ ti rë. 19 In Anutu Nalu Kerisi Yesu sën alu Silvanus* geTimoti behe netateḳin yi degwa vu ham lo su nenër ġaġek luu loḳ ti rë, gaḳ yiḳ nenër yönon mu. 20 In ġaġek pin sën Anutu joo lo, og degwa los anon neggëp vu Yesu yö timu, om mëm hil ġaḳo Anutu arë jaḳ behil angoġekin nabë Anutu og mehö nenër ġaġek anon mu. In Yesu vonġ banon raḳ. 21 Yiḳ Anutu saga sën nër ving vu he gevu ham bë hil atu Kerisi-yi-alam yönon lo, lob ggooin hil raḳ in bë hil ġevonġ yi huk. 22 Log vonġ yi Anon Vabuung vu hil vorot in bë tato ranġah nabë hil atu yi alam ggovek ya, gAnon Vabuung sënë nedo loḳ hil ayod in bë tato nabë Anutu yi ġaġek sën geḳo hil nah vu yi lo rëḳ anon jaḳ yönon.

23 Nabë sa hekuung raḳ, og Anutu rëḳ gelë lob ngis sa mesa nadiiḳ. Rëḳ ma gesenër yönon rot bë sa su bë ġevonġ beham nimin namum in nġaa nipaya sën ham nevonġ lo rë, om sën sa su yök Korint pevis rë. 24 He su atu ham vonġvingsën ala rë, gaḳ ham nġo vonġ ving Anutu niwëëk vorot menedo, rëḳ he bë adoḳ vu ham in ham kwamin vesa in Anutu.