Pauro Yaromi Munom Ganom I Garesia Ari Yokamai Boi Erome
Garesia i akai ori dumie. Ena Garesia suna tei iki birom ori munmane dumie. Koma Pauro furo iki birom ori Garesia suna dungui dungui tei furo gunom kam di mari de erongoro ena ari munmane Yesu fi ki si teimie. Pauro ka epe dume: “Ne yokamai Yesu towane fi ki si towainga ena yo tere moraime,” di eromba okome Yura ari suwo koropane uro Pauro ka dungua bei niki de tere “Ne yokamai Yesu fi ki si tere te Mose kam dungua ama dourom borainga ena yo tere moraime,” epe Garesia ari di ereime. Te yokamai uro “Ne yokamai ganom guwo dungua mapunom ama dourom boiyo!” ama epe di ereime.
Ena yokamai ka epe nuwi si ereinga Pauro niki ori wom de fi erere ena munom ganom i Garesia ari boi erome. Pauro bei moiro “No yokamai furo Mose ka dungua ama dourom borapunga ena yo tere morapunga ena Kirisito goingua i tai noromanga tai duwangoro te Yai Gumam no bianom bepunga kore dekename,” epe di erome. Ena Pauro Garesia ari niki de fi erere “Ne yokamai ari ka kasu nuwi si ereinga ma dere Yesu kon kawom inako dero dourom boiyo!” epe di erome. Pauro ka munom ganom i Garesia ari epe boi erome.
1
Na Yesu nawi dongua fuka yai Pauro ne yokamai munom i boi ereiye. Ari yokamai gunom boi narere nawi dekeime. Tamanume. Yesu Kirisito Nem Yai Gumam gere nawi deipire. Kirisito yono akaiyomdi tei arerongua kakom tei Yai Gumam bei moiro urom yaungua yaromi moime. Ena te na arinama muruwo na moiki tei ama moinga yokamai “O” di nareinga ena na munom i boi ne Yesu fi ki si teinga yokama Garesia ikinom akainomdi moingi tei de ereiye.* Gar 1:11-12 Ena na ka make ei erere “O, Nenom Yai Gumam te no Ari Wanopanom Yesu Kirisito yo, ne surai bei moiro Garesia ari yokamai bei nokapu de erere te amine eire bei ereiyo!” diro ka make ei ereiye.* Ro 1:7; Fir 1:2 Kirisito yaromi “Na furo ari yokamai bianom beinga kore dowaikoro yokamai furo ari mapunom niki dongua epena mangi tawa beingamere epe beikenaime,” diro nonon Nenom Yai Gumam finguamere epe dourom boiro goi norome.* Gar 2:20; 1 Ti 2:6; Tai 2:14; 1 Yo 5:19 Ena iran i no yokamai Yai Gumam kam kakom kakom akire di tero morapune. I kawom.
Yai Gumam gunom kam towane wom i nokapu dume
Aiya! Ne yokama kene kene eire Yai Gumam “Kirisito ne yokamai bei nokapu de erowame,” dungua unom boi erongua yaromi ma de tere gunom kam ta dourom boinga ena na ganam nouro dume. Te gunom kam ta i gunom kam kawom dikeme. Tamanume. Ari suwo koropane ne yokamai inokore einga bei unanan de erere Kirisito gunom kam awa tere di mari deinga ena ka dinga i gunom kam kawom dikengua ena na “Gunom kam ta i kawom dikeme,” di ereiye.* Ap 15:1, 24 Ena no yokamai boro kamundi nuwi kokonan gan ta uro gunom kam koma no yokamai di mari de eropungamere epe dikenangua ka kasu i di mari de erowapunga ena no yokamai guwom akai napunga faime.* 1 Ko 16:22 Ena koma no yokamai ka mora di de eropungamere epe wom epena na tokoi di erowaiye. Ena yai ta uro gunom kam ta ne yokamai koma firo ikeinga kam i di mari de erowangua ena yaromi guwom akai nangua i faime. 10 Te ta bengoro na ka i epe diye? Na “Ari yokamai mun fi narowaime,” diro ka i epe diyo? Tamanume. Yai Gumam “Na mapunom beika i nokapu dume,” di narowangua ena na mun firaiye. Kawom, na “Ari yokamai mun fi narowaime,” diro kokonan beikeiye. Te na “Ari yokamai mun fi narowaime,” diro kokonan bei moraika ena na Kirisito nuwi kokonan gan moikenaiye.* 1 Te 2:4
Yai Gumam bei moiro Pauro awi dongoro gunom kam di mari dome
11 Ena, na arinama yokamao, na ka ta di erowaiye. Gunom kam i na di mari de ereika i yai towane ta i mari de narekeme dekeme.* Mt 16:17 12 Kawom, yai ta uro gunom kam i di mari de narekeme. Te yai ta ka i nuwi si narekemba Yesu Kirisito yaromi nenen ka i na di mari de narome.* Gar 1:1
13 Ena te ne yokama mora finga koma na Yura ari yokamai mapunonom dourom boiro “Ari Yai Gumam fi ki si teinga yokamai muruwo bei niki de ereikoro goraime,” di firo ena bei niki ori wom de ereiye.* Ap 8:3 14 Te arinama kora gaima yokamai moingi suna tei na moiro bire ime de ereiye. Na Yura ari yokamai mapunonom kawom dourom boipa kora gaima yokamai munmane wom kawom dourom boikeime. Te na awanama yokamai mapunonom muruwo erowai tero dourom boiye. Na epe beika ena ne yokamai mora fingai kakom tei na gunom kam dourom boikeipa* Ap 22:3 15 te koma na manam ama na kui nekengua kakom tei Yai Gumam na gunom boi narere ena okome bei nokapu de narere na unam boi narome. Iran i yaromi nenen fingua kakom tei* Ais 49:1; Yer 1:5; Ro 1:1 16 “Na furo ari Yura ari moikeinga yokamai koro koro moingi tei furo gunom kam di mari dowame,” diro yaromi wam i imari de narome. Imari de narongoro ena na furo ari suwo koropane ka mina wako erekeiye. Tamanume.* Ap 9:3-6 17 Te “Na fu Yerusarem tei furo ari koma Yesu ewi dongua finga yokamai kanaiye,” diro kuiye. Kuipa na kene kene eire ikinom akainom Arepia tei fure te okome inako dero iki birom ori Damasusi fuiye.
18 Ena okome noniki suraiye fu dongoro ena na “Pita kanaiye,” diro fu Yerusarem tei furo na yaromi gere moipuka aro kakom okonom koro koro muruwo te kaunom koro wo moipuiye.* Ap 9:26 19 Te na ari ewi dongua finga yokamai munmane kankeiye. Na furo Yemesi yaromi no Ari Wanopanom emerom te Pita ama kaniye.* Mt 13:55 20 Ena ka i epena na ne yokama di mari de ereika Yai Gumam mora fimia na ne yokamai kasu di erekeiye. 21 Ena okome na fu ikinom akainom Siria te ikinom akainom ta Sirisia tei fuiye.* Ap 9:30 22 Ena kakom tei ari Kirisito fi ki si teinga Yuria tei moinga yokamai na gumanam ama na kankeimie. 23 Yokamai ka towane epe finga “Koma yai i nonon noingua yaromi epena ari yokamai ‘Kirisito fi ki si teiyo!’ diro di mari de erome. Te koma ari Kirisito fi ki si teinga yokamai bei niki de erome,” epe dime. 24 Ena yokamai ka i finga Yai Gumam epe na bei nokapu de narongua ena Yai Gumam kam akire dime.

*1:2: Gar 1:11-12

*1:3: Ro 1:7; Fir 1:2

*1:4: Gar 2:20; 1 Ti 2:6; Tai 2:14; 1 Yo 5:19

*1:7: Ap 15:1, 24

*1:8: 1 Ko 16:22

*1:10: 1 Te 2:4

*1:11: Mt 16:17

*1:12: Gar 1:1

*1:13: Ap 8:3

*1:14: Ap 22:3

*1:15: Ais 49:1; Yer 1:5; Ro 1:1

*1:16: Ap 9:3-6

*1:18: Ap 9:26

*1:19: Mt 13:55

*1:21: Ap 9:30