ME KOLINITA ꞌIDI LETA ꞌEBWEUNA
PAULO ꞌIꞌETOLADINA
Paulo ꞌina gimi sakowasi Kolinita ꞌena tomota yaudi Yesu siemisena, ga ꞌipilisinedi ta ꞌisakowasi ꞌaina sena ꞌediya, ꞌenega bubuna toꞌumalidi siapwesa me Kolinita ꞌidi ekalesiya solanaya. Muliyega Paulo tetelidi ꞌinonona ga ꞌidi leta gete ꞌiꞌetoladina be ꞌaene ꞌigiepaepaludi. ꞌIdi toꞌumalinao getedi: siweyalidi mali boda be mali boda ꞌediya, ta ꞌebweu tai loelata toꞌumalina ꞌiguinuwena, ta sietaetala taudimo, toloina nina matanaya tauna nigeya Yesu ꞌana toemisa, ta ꞌaina tomota ꞌidi gimi yaubadao ꞌadi masula siꞌeꞌai, ta wate Yesu ꞌana tosimanao nigeya siꞌitaꞌiꞌita ꞌaiꞌailidi, ta ꞌInapwana ꞌina ꞌeꞌai tabu nigeya siꞌamaꞌamayabe.
Paulo wate ꞌiliꞌamina Yaluyaluwa Tabuna ꞌina eguyai toekalesiyao ꞌediya, taudi ꞌediyega sionaona mali ꞌenanega, be ꞌaidi yage siguinuwedi Yaluyaluwa Tabuna ꞌina waiwaiyega. Leta ꞌana ꞌebe losalowa ꞌena Paulo ꞌiliꞌamina toololimana be ꞌebwayadaita manudi.
1
Lokagutoki
1-2  * 1 Ko 6:11ꞌAboꞌagu Yaubada ꞌiesinuwegu be ꞌaene Yesu Keliso tetelina ꞌana tosimana, ꞌomi me Kolinita toekalesiyao ꞌimi leta gete tasidai Sositeni ꞌilemegu ga yaꞌetoladinawa, manuna ꞌomi niꞌatu Yesu Keliso ꞌigieꞌesasemi ga ꞌina boda esiesinuwadi ꞌediya waluguma ga wamiyami, taudi wate Yesu Keliso ꞌana esanega maꞌemiyao waꞌawaꞌawanoi, taudi sena maiboꞌana ꞌediyega maꞌedao ꞌida ꞌInapwana ꞌebweuna tuga, tauna Keliso. Ta ꞌida ꞌInapwana nina Yesu Keliso be Tamada Yaubada ꞌidi ꞌatenuwaꞌoleꞌole ꞌemiya ꞌenega wada miya gwausowala.
4-5  * Kol 1:3-4Onaꞌaiꞌaila, Yaubada ꞌiꞌatenuwa ꞌoleꞌoleyemi ga yage yauna boboꞌadi ꞌiꞌebwaꞌemi, nadigega ꞌimi ona boboꞌadi be ꞌimi mwalatoi boboꞌadi Yesu Keliso ꞌenega. ꞌEnega tuta yauyauna manumi yalokagutoki Yaubada ꞌenaya. Ta wate yalokalokagutokiyena manuna Keliso nina waꞌawaꞌaiꞌailena ga tetelina waemisena, ta wate Yaubada ꞌina ꞌebwaya boboꞌadi maiboꞌadi ꞌemiya simiyami, tuta gete wayamwayamwa ꞌida ꞌInapwana Yesu Keliso ꞌina apwesa limanama manuna. * Pi 1:6; 1 Te 3:13Manuna tauna ꞌigiegie paꞌalimi be ꞌana laba ꞌasiyata nina ꞌiila limanama.
* 1 Yo 1:3Onaꞌaiꞌaila Yaubada ma ꞌana emisa sinabwana, manuna ꞌibwauyemi ga natuna, tauna ꞌida ꞌInapwana Yesu Keliso, maꞌemi waegosigosiyana.
Geyaꞌabo weyala siapweapwesa toekalesiyao ꞌediya
10  * Pi 2:2Tasigwao, gete ꞌigu loguguya ꞌemiya ꞌida ꞌInapwana Yesu Keliso ꞌana esanega be ꞌaene wanuwanuwa leleleya be waona leleleya, ta esi geyaꞌabo waegewagewana nai waweyaweyalimi. 11  * Gu 18:24-28, 19:1-2Manuna ꞌaidi Kiloe ꞌina bodao niꞌatu sieonegu ꞌimi egewagewana manudi. 12 Manuna ꞌaimi wagwae, “ꞌAboꞌama Paulo ꞌina boda,” ta ꞌaimi wagwae, “ꞌAboꞌama Apolosa ꞌina boda,” ta ꞌaimi wagwae, “ꞌAboꞌama Pita ꞌina boda,” ta ꞌaimi wagwae, “ꞌAboꞌama Keliso ꞌina boda.”
13 Geyaꞌabo Keliso ꞌenega taweyaweyalida, manuna taunamo manumi sigiekelosena ga ꞌana esanega wabapitaiso, ta nigeya ꞌagu esanega. 14  * Gu 18:8ꞌIgu lokagutoki Yaubada ꞌenaya gete, manuna nigeya yaumi yagiegie bapitaisoemi. Nate namo Kilisipo be Geyo. 15 ꞌEnega geyaꞌabo waonaona be wagwaegwae, “ꞌAboꞌama Paulo ꞌina boda, manuna Paulo ꞌigiebapitaisoema.” 16  * 1 Ko 16:15Onaꞌaiꞌaila, taudi wate Sitipana ꞌina susu yagiebapitaisoedi. Nai taudi namo. 17  * 1 Ko 2:1-2, 5Manuna ꞌigu guinuwa Keliso ꞌiꞌebwaꞌegu tetela boboꞌana ꞌana loguguya namo manuna, ta nigeya giebapitaiso. Ta wate loguguya nina nigeya ꞌigu sinasinapuyega, ꞌabona nai Keliso ꞌina mwawasa kelose ꞌenaya tetelina yagienenetei.
Keliso ꞌina mwawasa kelose ꞌenaya
18  * Lo 1:16Onaꞌaiꞌaila, kelose tetelina taudi yaluyaluwadi mwawamwawasidi siꞌawa kabokaboei, ta esi ꞌaboꞌada taemisena ꞌaene Yaubada ꞌina waiwai tetela nina ꞌena ꞌimiyami, ga ꞌenega ꞌiꞌetoseyeda. 19  * Ais 29:14Gete manuna Buki Tabu ꞌena ꞌisimana, ꞌigwae,
“Taudi tomwalatoiyao be tosinasinapuyao ꞌidi nuwanuwa yaguitoyasedi be yaloesawalidi.”
20 ꞌEnega mwaꞌadega taudi tosinasinapuyao? nai taudi toeꞌitao? nai taudi tologuguyao gete tuga baleꞌuya simiyami? Onaꞌaiꞌaila, niꞌatu Yaubada ꞌidi sinasinapuyao ꞌiꞌawa yage besobesoedi. 21 Manuna sinasinapu baleꞌu geyaꞌabo saꞌi ꞌenega Yaubada tamwalamwalatoni.
Ta esi Yaubada ꞌina nuwanuwa, ta ꞌina tetela ꞌana loguguya namo ꞌenega, ꞌana toemisao ꞌaboꞌada ꞌiꞌetoseyeda. Tetela nina me baleꞌu sieyage besobesoena, 22  * Md 12:38; Gu 17:18manuna me Yudia nuwanuwadi ꞌebweu weꞌiweꞌiyaya sida ꞌita, ta taudi nigeya me Yudia sinasinapu siꞌebeꞌebesa, 23 ta ꞌaboꞌada esiya tetela nina taloguloguguyae, Keliso ꞌina mwawasa kelose ꞌenaya namo manuna, ga ꞌenega me Yudia siguitoyasena, ta wate mali bodao tetela nina siꞌawa yage besobesoena. 24 Ta esi ꞌaboꞌada Yaubada ꞌana toemisao ꞌiesinuweda, boda Yudia be mali boda ꞌediyega, ga Keliso ꞌenega Yaubada ꞌina waiwai ta ꞌina sinasinapu ꞌiꞌebwaꞌeda. 25 Manuna toꞌase Yaubada ꞌina guinuwa nenetana nai gidalina, tomota ꞌaboꞌada ꞌida waiwai sinabwadi ꞌiewaiwai sinedi.
26  * Md 11:25Ta tasigwao wanuwaꞌiꞌisi ꞌaene taudi Yaubada ꞌiesinuwedi ꞌemiyega yaudi nigeya baleꞌu ꞌana tomwalatoiyao, nai ꞌana toewaiwaiyao, nai ꞌana ꞌinapwanao, 27 ta esiya yaudi uwauwadi ꞌiesinuwedi, ga uwauwadi nidi baleꞌu ꞌana tosinasinapuyao sigie omayamayaedi, ta wate baleꞌu ꞌana tonenetao Yaubada ꞌiesinuwediya, ga taudi wate toewaiwaiyao siewaiwai sinedi. 28  * Ye 2:5Ta wate me baleꞌu Yaubada ꞌina guinuwao siꞌawa yage besobesoedi, ta saꞌi Yaubada ꞌina guinuwao ꞌediyega ꞌidi yage maiboꞌana ꞌiꞌausepaledi. 29 ꞌEnega nigeya ꞌebweu wate tomota sawesawenaya be ꞌionalaga Yaubada matanaya. 30  * Lo 3:22; Ep 1:7Manuna Yaubada tauna ꞌina guinuwega Yesu Keliso maꞌeda taeꞌebweu, ꞌenega Yaubada ꞌina sinasinapu Yesu nina ꞌisaꞌu balenaya ꞌedaya, manuna Yesu tauna ꞌitaliyaena manuda, ga ꞌenega ꞌigieꞌesaseda, ta ꞌigiepaepaluyeda.
31  * Yel 9:24; 2 Ko 10:17Buki Tabu ꞌina simana yage gete manuna ꞌigwae,
“ꞌAbo yaita nuwanuwana be ꞌilotuputupu, ꞌida ꞌInapwana namo ꞌida tupu.”

*1:1-2: 1 Ko 6:11

*1:4-5: Kol 1:3-4

*1:8: Pi 1:6; 1 Te 3:13

*1:9: 1 Yo 1:3

*1:10: Pi 2:2

*1:11: Gu 18:24-28, 19:1-2

*1:14: Gu 18:8

*1:16: 1 Ko 16:15

*1:17: 1 Ko 2:1-2, 5

*1:18: Lo 1:16

*1:19: Ais 29:14

*1:22: Md 12:38; Gu 17:18

*1:26: Md 11:25

*1:28: Ye 2:5

*1:30: Lo 3:22; Ep 1:7

*1:31: Yel 9:24; 2 Ko 10:17