1 Isaa o voto ghe lutula tale nau Serksis ghe aitaraala kateva ai me ghaluengaulu ghaitu (127) provinsi, ghe tiitiuaa eIndia me ghe laa ruuruu eItiopia. 2 Isaa o nau, ghe tokatoka tale masaliki taatara eSusa, me ghe aitaraa isaa o provinsi. 3 Me tale aiaakotonna ateae ninamanama tale aitaraane, ghe gheleila kinatama ninamanama ateva ta kapuna namu ngatoa tale gavmani me mene katoa namuu. Ghe kolo teela namuu ta tau ngaiuvii etoa ePersia me eMidia, me gavana atoa me namu ngatoa tale kateva kateva provinsi.

4 Ia o ninamanama ateae ghe tokala ghaonomo (6) ulana, me ghe apsungaala peipeina me asease peina atoa etaira, me masi voto atoa ghe apasunga va ia namuu ia. 5 Emuli tale ia o ninamanama, ghe gheleila mene kateva ninamanama, ghe roola ghaitu (7) nau, elome tale masalikina ateva. Ghe kolo akapaailila taumattu eSusa, tau peipeina atoa me lo atoa karika righi peina. 6 Tale liu ninamanama masi kalio atoa, usousoana me savuluvulungana, laghe tulu vukala saela tale oasa usousoana me ghuaghuanna tale aituei oasa ghelei tale silva epona tale suena ghelei tale masi ngatu ravaravaiena. Laghe gheleila aikasukasu tale asease masi ngatu ravaravaiena, me aitokatoka atoa laghe gheleila tale silva me golo. 7 Laghe ropiropi uaeni tale asease talo airopiropi gheleila tale golo, me king ghe taula oroieili uaeni laghe ropiropi. 8 King ghe tau lao sio inangari ta tau ngai nongonongo anna va la tau lao tale aloannaaira lo atoa la mae sio tale ninamanama ateva.

9 Kuin Vasti tee ghe gheegheleila paka ninamanama ateae ta vause atoa elome tanganuena King Serksis.

10 Ta ghaituna (7) ateva nau tale ia o ninamanama ateae, King Serksis ghe ropila oroi uaeni me ghe masimasi saasakiaala, me eghe uela ta Mehuman, Bista, Abona, Bikta, Abakta, Sita, me Kakas, ghaitu taumattu kaakati ghe uungu etana. 11 Ghe sungilala tani laa kolo Kuin Vasti, eatoka unna kou nguru eteva kuin me emae etana. King ghe aloanna va taumattu ngatoa me lo atoa taumattu tarane ila la tara masi taataraane Kuin ta taataraane masesekanaaili. 12 Nau laghe auliaala inangari ta Kuin Vasti, kuin ghe ratila. Isaa o llo ghe gheleila king ghe sessaieiliela etana.

13 Gheeleiaane king tani kolo ta lo atoa la kilakila inangari niloeloe me karika la ghaaimassiaa tani loe king tale inangari nipaopao me masi nitoka. Liuna avalua o me ghe suula inangari ta kapuna tau ngalomasaanga atoa sa ateva la gheleia ta Kuin Vasti. 14 Arari taumattu isaa toko: Kasena, Seta, Atmata, Tasis, Meres, Masena, me Memukan. Ghaitu (7) tau ngai uungu oia, ila ghe loeloe king tale inangari nipaopao matuutuliena ila me tarane ila tani tingina ta matana king.

15 King ghe kolomilalal va, “Sa ateva ita gheleia ta Kuin Vasti, me saa karavusu eteva ita tau lao etana? Ta kuin karika ghe nongo usilaala inangarighi.”

16 Memukan ghe liula inangari king elome ta mataira namu ngatoa me matuutuliena atoa taumattu. Ghe uela va, “Karika va ange gheelei nonga etam, king, ta ange gheleiela kapum taumattu matuutuliena me tarane me tee taumattu elome tale provinsi etoa. 17 Me vause akapa atoa karika aue la oneoneaa taitaniira atoa me aue la ue va va King Serksis ghe aulia ngasarasarakanala ta Kuin Vasti va la maeainia etana me karika ghe annala. 18 Me ia o nau eteva ghe tam ruu, aue vause atoa matuutulienaila me tarane ila ePesia me Midia aue la nonga sa ateva Kuin Vasti ghe gheleila, me ghe tam nongo usilaa king. Ila tee aue la tam nongo usilaa taitaniira atoa. Karika aue righi airuuruu tale nitam nongo usilaa.

19 “Arova umasimasi, king, ami annaa va upiti tikirighi uru ngai tale inangari nipaopao nge Pesia me Midia, karika la mene aikolikoliaa, va Kuin Vasti karika emene mae taraio. Utau lao ninamu ngateva ta kateva ppae vause gheeleiaane mene masina ta Vasti. 20 Nau inangarim elao see tale taumattu ngakapa atoa tale provinsi, aue lo atoa vause tue peipeina ila me lo atoa karika aue la oneoneaa taitaniira atoa.”

21 King me kapuna taumattu matuutuliena me tarane laghe annaala va inangari Memukan masina, me ghe usilaala. 22 Me king ghe pitila uru ngai etikirighi, ghe lao akapa see sio tale isaa akapa patu nganua ghe aitaraa me tale samasamaaira va taita atoa la muemuea elome tanganueira.