1 Aitiutiu tale kosa ateva, Vau palepale ghe gheleila eunaakookoo me kosa akapa ateva. 2 Me kosa akapa ateva karika ghe tokatoka nongina ita taataraia ghaine, karika. Ghe nim tokatoka me taataraane isaa ppae. Karika righi voto etana, saurrom ateva ghe aakou epona tale malionge ateva, me spiriti eteva ta God ghe aikasuaa epona tale manu eteva.

3 Me God ghe uela va, “Tau vella mallanga ateva emae.” Me ghe mallangala. 4 Me God ghe tarala va mallanga ateva masina ia, me ghe polala mallanga ateva tale saurrom ateva. 5 Mallanga ateva ghe aseala va “llaa ia”, me saurrom ateva ghe aseala va “voo ia”. Ghe voola me ghe paila, ia o nau eteva aitiutiu ia.

6 Me God ghe uela va, “Tau vella ailongota ngateva easo eailongota manu ngepona tale manu ngeuu.” 7 Ia avalua o me God ghe gheleila ailongota ngateva me ghe longota velu saela manu ngepona tale manu ngeuu, me isaa o voto ghe lutula. 8 Ailongota ngateva ghe aseala va “elomarase”. Me ghe voola me ghe paila, ia o nau eteva aiaaghaluene ia.

9 Me God ghe uela va, “Tau vella manu tale pake ngelomarase elao aitaua tale kativilau pai, me tau vella kosa ateva ematia.” Me isaa o voto ghe lutula. 10 God ghe asela mati etivilau va “kosa ia,” me pai etivilau manu etoa laghe lao aitaua sio etana, ghe aseala va “manu ia.” Me God ghe tarala va masina.

11 Vara me God ghe uela va, “Tau vella kosa ateva eaapinosa asease voto epiipinosa tale kosa ateva, nongina voto ghauna ekuukuneaa katuna, me ai etoa la kuukuneaa ue ngai, me isaa o asease voto epiipinosa la tani kuneaa ueira.” Me isaa o voto ghe lutula. 12 Kosa ateva ghe aapinosa asease voto epiipinosa tale kosa ateva, nongina voto ghauna ekuukuneaa katuna, me ai etoa la kuukuneaa ue ngai, me isaa o asease voto epiipinosa la kuneaa ueira. Me God ghe tarala va masina. 13 Me ghe voola me ghe paila, ia o nau eteva aiaakotolu ia.

14 Me God ghe uela va, “Tau vella mallanga atoa elomarase tani pola llaa ngateva tale voo ngateva, me tau vellaluela lalu uungu tani aimatoonga nau etoa me ninamanama atoa me mene asease nau etoa tale kateae ninamanama, 15 me tau vellaluela lalu mallanga tale ailongota ngateva elomarase tani tau mallanga tale kosa ateva.” Me isaa o voto ghe lutula. 16 God ghe gheleila ghalua kinatama mallanga, namu ngateva mallanga tani aitara ella, me ghauna ateva tani aitara eleivoo. Me ghe ghelei teela katto atoa. 17 God ghe atokailaluela tale ailongota ngateva elomarase tani tau lao mallanga tale kosa ateva, 18 tani aitara ella me eleivoo, me tani pola mallanga ateva tale saurrom ateva. Me God ghe tarala va masina. 19 Me ghe voola me ghe paila, ia o nau eteva aiaaghaatane ia.

20 Me God ghe uela va, “Tau vella manu eteva eaoroi asease voto atoa maulue ila, me tau vella ghila atoa la loo longoti tale ailongota ngateva elomarase.” 21 God ghe ghelei ekapala asease voto atoa maulue ila tale manu etoa, namuu ila nongina rao atoa me ghauna ila nongina kko atoa, me mene asease voto atoa la aikasuaa tale manu, la alutu natuira nongina ila, me asease ghila atoa la looloo, la alutu natuira nongina ila. Me God ghe tarala va masina. 22 God ghe arangiseilala me ghe uela va, “Am aiessui me am oroi, me am apasu manu eteva, me tau vella ghila atoa la oroi tale kosa ateva.” 23 Me ghe voola me ghe paila, ia o nau eteva aiaaghalimane ia.

24 Me God ghe uela va, “Tau vella kosa ateva epasu tale asease ghaata kkena atoa, namuu ila me ghauna ila, la tani alutu natuira nongina ila, me mene kasina asease voto eaikasuaa see epona tale kosa ateva, me llo ghaata kkena aue la ghaaitara, me llo karika.” Me isaa o voto ghe lutula. 25 God ghe gheleila llo ghaata kkena karika pei niaaitara va la tani alutu nongina ila, llo ghaata kkena pei niaaitara la tani alutu nongina ila, me ila akapa voto atoa la ghaikasuaa epona tale kosa ateva, la tani alutu nongina ila. Me God ghe tarala va masina.

26 Me God ghe uela va, “Ita* Ita oroieili malloeana ta Hibru: 1. God, Iesu me Spirit Manga ateva. 2. God ie nonga kingi ia, me ghe gheleila kosa ateva. 3. God me lo atoa la tokatoka teeia epona liu. ghelei taumattu tale tootooita, nongina ita, me tau vellala la ghaitaraa kko atoa elamana, me ghila atoa elomarase, me llo ghaata kkena pei niaitaraa tale kosa ateva, me tale kosa akapa ateva, me isaa akapaaili asease voto atoa la aaikasuaa tale kosa ateva.”

28 Me God ghe arangiseilaluela me ghe uela va, “Amalu aiessui, me am oroi, me am apasu kosa ateva, me amalu aitarainia. Amalu aitaraa kko atoa elamana, me ghila atoa elomarase, me isaa akapaaili voto maulue la aaikasuaa epona tale kosa ateva.”

29 Vara me God ghe uela etairarua va, “Tarala, ngatautau aatu isaa akapaaili voto ghauna ekuukuneaa katuna, me ai etoa la kuukuneaa ue ngai epona tale kosa akapa ateva, me isaa akapaaili ai ekuukuneaa katuna. Isaa o voto eaneimalua inana. 30 Me tale ghaata kkena atoa tale kosa ateva, me isaa akapa ghila atoa elomarase, me ila akapa voto atoa maulue ila la aikasuaa epona tale kosa ateva, me voto akapaaili maulue etana, atautau aatu asease uru ngai etoa me rarrasa atoa va la nama.” Me isaa o voto ghe lutula.

31 God ghe tarala isaa akapa voto ghe gheleila, me ghe tarala va masinaaili. Me ghe voola me ghe paila, ia o nau eteva aiaaghaonomina ia.