2 Yone
2 Yone sawi one mahemakapukusa someane oyapo.
Yone rea maiya amo, aporo metakira fana Keresoraka risia amo, Keresomo kakaro someane metakarikia, ipu namina kotafe someane some karaka risiapo. Yonemo paroaka someraka aporoane ararehokopo, aisapo.
Arirakano sawi wo Yonemo ipi yanoane popasafapo. Yonemo ipi yanoane faremarekea úyaka popasapo. Ano aporo sisima Keresoa paosa aporo hinamo asekea rea aporopo, aíyaka ipiane popasapo.
2 Yone sawia some kepo parakuraka popasane oyapo.
1:1-3 Sawi popana one Yonemo kepomarekea popasapo.
1:4-6 Kakaro someane soko himu tumurumo hemakapurane soko Yonemo someaka popasapo.
1:7-11 Kotafe somera aporoane pasimaka ararehokopo, aíyaka Yonemo somesapo.
1:12-13 Yonemo makata someaka popahokosane o farakanapo.
1
Kakaro somerane soko, himu tumurumo hemakapurane soko Yonemo somesane oyapo.
Hinamo* Hinamoane takume someamo kepoane Yasu Keresoa paosa aporo hinamo sose hakása sarimaraka risikinapo. Hokosa asíane Keresoa paosa aporo hinamo ayapo. né Kotimo murikimasapo. Néaki soko nómo hokosaki soko nōmo sawi one poparaka makerakanapo. Pipu ano sisimaraka reke Keresoa paosa aporo hinamo asekea reane anosasamo, reaki sawi one poparaka makerakanapo. Reane nōmo himu tumurumo hemakapurakanapo. Arirakano kakaro someane kaikia hemakapura aporo hinamo i suane soko nōmo himu tumurumo hemakapurakanapo.
Maiya suamo Kotimo kakaro someane isiapo kakimaka yaiya hemakapukua risikinapo. Kakaro someane soko, aporo hinamo meta himu tumurumo hemakapurane soko, isiapo kekemaraka risikinapo. Kekemaraka risike Kotipe ipi hokosa Yasu Kereso tetapō yaku hemakapukua ararenane soko kamenakanane soko auaraka risirane soko isuaki kakasimo hemakapurakaripo.
Kakaro somerane soko, kakaro himu tumurumo hemakapurane soko amo kepoane oyapo.
“Kakaro someane kakimaka risikianie.” Aíyaka Atamo somesapo. Somesasamo nómo hokosa metakiramo kakaro someane kakimaka risikinapakano nōmo kaikia seserakanapo. Asiamo hinamo, neaki somemane kawe haku somehoko nōmo poparakanafapo. Kepomarekea Keresoa paosa maiya amo somemane some kasa hakása nine reaki poparakanapo. Yumo somemaneane nōmo efera hunia poparaka, “Repo namina yia Keresoa paosa aporo hinamoane himu tumurumo hemakapukua risikianie.” Aíyaka nōmo poparakanapo.
Popasa amo kepoane oyapo. Repo namina yia Keresoa paosa aporo hinamoane himu tumurumo hemakapukua risikino, Kotimo somemane maresane kakaro kakiamara ayapo. Repo namina yia Keresoa paosa aporo hinamoane himu tumurumo hemakapukua risikianie. Aíyaka somesane re Keresoa paosa sereamo kaisiapo.
“Keresoaki yununa aporomo some kakako koraka risikinapo,” aisane oyapo.
Kotafe some kará aporo hauaka sua koraka risike kotafe someane some karápo. Ipu someraka, “Yasu Kereso hauaka wo aporomano kau maka pesafapo.” Aíyaka ipu kotafe some karapo. Namina kotafe some karaka risike ipu Keresoaki yunuraka risira aporoane ayapo. Asiamo Keresoaki yununa aporoane repo kekemanapaka asekeanie. Repo Keresopoko rakisiakipoko epo makata ropo reaki kakakosaposane metakarirapaka asekeanie. Makata ropo su mokoakosakipoko kotafe someane repo kakimakopo.
Arirakano aporo metamo Keresomo some kasane metakarikia ipu hemakapusua aeyaka some meta paoraka some karakano aporoane Kotiyaki rekenafapo. Arirakano Keresomo some kasane metakarirafaraka someane kakimara aporoaki Ata Kotiane soko ipi hokosa Yasu Keresoane soko hakāsa rekenapo.
10 Arirakano aporo metamo Keresomo someane metakarikia some haku kakako perakano aporoaki repo “Maeo,” aihokopo. Eane tereraka pasimaka repo apea karikia pukupo. 11 Asiamo kotafe some kará aporoane repo maeaka pasimaka repo apea karikia purakanone, aporoamo watikiaka rakirane repo soko hakása nineraka hemakapukua watikiaka rakirakanapo. Watikiaka rakirapaka kotafe some kará aporoane pasimaka repo apea karikia pukupo.
Yonemo ayapa aisane oyapo.
12 Nōmo some metakira soko reaki somehokosane kakenapo. Kaya nine someane nōmo hokonomo poparaka makeakosafapo. Arirakano ano re arisia kimisi peraka isu isina hakāsa sarimaraka toke, reaki somehokosapo. Isina hakāsa sarimaraka toke sesehokosapo. 13 Nómo apumo Apu airakane takume someamo kepoane Keresoa paosa aporo hinamo sose meta á sarimaraka risikinapo. hokosa Kotimo murikimasa amo reaki ayaparakanapo.

*1:1: Hinamoane takume someamo kepoane Yasu Keresoa paosa aporo hinamo sose hakása sarimaraka risikinapo. Hokosa asíane Keresoa paosa aporo hinamo ayapo.

1:13: Apu airakane takume someamo kepoane Keresoa paosa aporo hinamo sose meta á sarimaraka risikinapo.