Pola Korinnandmo tiratna outna timbiŋ rapar
Outna kam
Polna mɨn mbuŋa, Korinna ma auŋ aniac ian, na ma Akaiana pitrik waŋ ndeacrena, anna mon Girikna tiacarpaiknan. Na Pol, ma ndo ma Iesusna kammo Korin auŋ aniacmo outta tɨkca wiwitiatna ramoot, na ma an auŋ aniacmo Iesusna rɨtɨpaikta meikramtaɨrta tumbunna moa ŋgepatna. Na an mɨnna Pola min tɨkcarica, kabena auŋembmo aiŋa mona taŋri, na makukara an Korinnanda Iesusa rɨpacrena tumbunmo larurina. Ri, Pola gan timbiŋ rapara tirca, minmo iro laŋ neaŋ te, mina ndorita makukarmo wandoŋainandet.
Aintik Pola Korinnanda rɨpacrena laiplacarta rɨtɨpaca irik narica ma anna kakadmaiap. Moca mina tɨpemb kirarir laiŋga ŋgocrai nari. Na ma laŋtaŋgoarta tɨpemb kirarira momona kamb toprinan, na makukara meikramtaɨrmo larurenan, na mina Raraŋ Aetaniacna Ŋeroŋmo mba wattacarica mina tiŋara mona. Na ma mbendeina tɨp kirar laŋap tocmo mbopatna, na ainta reik laiŋga Ŋeroŋ Ratta wanaiŋa neaŋrenanmo, rɨtɨpacna meikramtaɨrmo neaŋrenanapa, menacrina meikramtaɨra mac nda ŋgepnanap.
Na an reikca muruŋa Korinnandmo makukara neaŋgatna, na Pola minmo kamb laiŋ topca minmo otaca mina Raraŋ Aetaniacmo mataua lamŋi rapaca mana toŋtoŋa matau raŋgaina. Na gan timbiŋ raparna inikna sapta 13, Pola kabena meikramtaɨra matŋina tɨpemb kirarirmo wandacrinan, na anna outna reac laŋa Raraŋ Aetaniaca ndona meikramtaɨrmo neaŋrenan. Na gan timbiŋ raparna sapta 13, Iesusa rɨpacrena laiplacar anna toŋgorenan.
Ne rɨtɨpacna laiplacara ne ndorita irembmo aŋgɨri ŋgepnake, ndorimo kai ipuŋ teac
1
(1—4)
Aku Pol, aku Karais Iesusna up aŋgɨrena ramoot, anna Raraŋ Aetaniacna toŋtoŋ mbuŋa ma aukmo up aŋgɨrena ramootta mona larapacatna. Aukapa kaka Sostenisap, Up 9.14, na 18.1, na 18.17, na Ro 1.7, na 10.12, na 1 Ko 6.11, na 2 Ti 1.9aŋga nenmo Korin auŋ aniac ndeacrena Raraŋ Aetaniacna Iesusna rɨtɨpaikta meikramtaɨrta tumbunmo aŋga gan timbiŋ rapara nena tiratna. Na Karais Iesusa ma nenmo moa Raraŋ Aetaniacna meikramtaɨr ndaruca, nenmo larapacrinan, na ne manan ŋgoin. Na ma nenapa an auŋembta meikramtaɨra muruŋa mina Karais Iesusna i mbuŋa rɨpacreke, na man mbuŋa ndori kotacna digina mbendeirena meikramtaɨrmo, ma minmo muruŋa larapacrina, ma nenapa aina muruŋna Kacoot. Ro 1.7, na 2 Ko 1.2Na aina Aet Raraŋ Aetaniacapa Kacoot Iesus Karaisa nenmo kadmaica nena iroar inkarmo moi wewettaca laŋ ndeacnandet.
Pol ma Raraŋ Aetaniacmo kam laŋ neaŋgatna
Na Karais Iesusna par mbuŋ tik, Raraŋ Aetaniaca nena nakadmaica, ma nenmo mataua morena, ainda moca aku memetmbaca nena ndamŋireke, aku ndona Raraŋ Aetaniacmo kam laŋ neaŋrena. 5-6  1 Ko 2.1-2, na 12.8, na 2 Ko 8.7, na 2 Ti 1.8, na KIEK 1.2Na aia mana kamma nenmo mbopatke, an kamma ndo nena iroar inkara moa paŋpaiŋiatna. Te, gan tiacarpaikna meikramtaɨra watnandet, ma nena eteacna watmo, moa gagrarena. Na aku Raraŋ Aetaniacmo kam laŋ maneaŋgat. Na Karaisna par mbuŋa, Raraŋ Aetaniac ma reac, reacna kirarirta iroara ma nenmo moa mɨnna tɨkca maeacreke, gaind tocna kirarir, kam matau mbopna kirarir, na reac, reaca matau lamŋina landamŋiar. Lk 17.30, na Pil 3.20, na 2 Te 1.7, na Ta 2.13, na 2 Pi 3.12Aintik mandeaca ne memetmbaca aina Kacoot Iesus Karaismo laru raekca tɨkna gagraca anna ndabirenanna, na ne Ŋeroŋ Ratna kakadmaina opotacmo mba matpiitndai. Pil 1.6, na Kol 1.22, na 1 Te 3.13, na 5.23Na Iesus Karaisa ma nenmo otaca moi paŋpaiŋica ne wɨtɨki gagraca, ne taŋi an mamamaina ra ndaru te, ne makukar kocor, an aina Kacoot Iesus Karaisna ra mbuŋa. Ais 49.7, na In 17.21, na 1 Ko 10.13, na 1 Te 5.24, na 1 Io 1.3Na Raraŋ Aetaniaca ma nenmo maacat, te, nenmo ndona Nuoc Iesus Karaisap nikinik iro kabe aŋgɨca manap eacna moca, na Iesus Karais ma aina Kacoot. Na Raraŋ Aetaniaca mo, ndopatna reik, ma mo mɨnna tɨknandet.
Korinna Iesusna rɨtɨpaikta meikramtaɨrta tumbuna, tɨpniŋa titacatna
10  Ro 12.16, na 2 Ko 13.11, na Pil 2.2, na 3.16, na 1 Pi 3.8Ne Iesusa rɨpacrena laiplacar, aku aina Kacoot Iesus Karaisna i mbuŋa, aku nenmo kam gargara gaindopnande, ne muruŋa iro kabe aŋgɨca kamkabe niŋgikca mo, na ne kai titaca tamtamma taŋ teac. Na ne muruŋa wiwit kabe ŋgoin ndeac, na ne muruŋa, iro kabe ndeac, na toŋtoŋ kabe ndeac. 11 Na ne aukna Iesusa rɨpacrena laiplacar, Koloena kamkabeara aukmo gaindopatna, ne ndorimo ipuŋga mboprena. 12  In 1.42, na Up 18.24-28, na 19.1, na 1 Ko 3.4Na an nena ainda ipuŋga mboprena kirarirta kambca nena muruŋna rɨkca aku gaindopnande, “Nena ndeida gaindoprena, ‘Aku Polnan.’ Na nena ndeida gaindoprena, ‘Aku Apolosnan.’ Na nena ndeida gaindoprena, ‘Aku Pitanan.’ Na nena ndeida gaindoprena, ‘Aku Karaisnan.’ ” 13 Ee! Kaica? Karais ma titaca waŋniŋ ndeacre ki, a? Na aku Pol, aku nen ŋgotacna moca ik nakeraca menacatnan ki, a? Na ne aukna i mbuŋa kɨtac puk aŋgɨatnan ki, a? 14  Up 18.8, na 19.29, na Ro 16.23Na nena rɨkca aku Kirispusapa Gaius, maniŋ niŋgikca aku maniŋmo kɨtac pukca moatna, na ramoot ianna mba mac moatke. Anna moca aku Raraŋ Aetaniacmo kam laŋ neaŋgatna. 15 Ainda moca ramoot ianna gainda kai mbop teac, “Aia Polna i mbuŋa kɨtac puk aŋgɨratna.” 16  1 Ko 16.15Gidik aku meikramtaɨr ndeidmo kɨtac puk neaŋgatna, an meikramtaɨra mina Stepanasna kac ndeacrenan. Na aku lamŋi ŋgocor, aku ndeidmo kɨtac puk neaŋgat, co, wanaiŋ. 17  Mt 28.19, na In 4.2, na 1 Ko 2.1, na 2.4, na 2.13, na 2 Pi 1.16Na Karais ma aukmo kɨtac pukca mo nake mba mbagɨricatnan. Wanaiŋ. Ma aukmo kam wembaŋ laŋ wiwitina mandacatna. Na aku kamb ndoprena ramtaɨrta kirara mba moatke. Wanaiŋ. Moca aku Karaisna keracatna ikmo, moi reac wanaiŋ toc ndacari nari.
Karais anna Raraŋ Aetaniacna gargar
18  Up 17.18, na Ro 1.16, na 1 Ko 2.14, na 15.2, na 2 Ko 4.3Anna gidik ŋgoin, meikramtaɨra kocnai topna morena meikramtaɨr, mina Karaisna ik nakeracatna kammo mina anmo ŋaŋaona paparuna kam toc ndamŋirena. Na Raraŋ Aetaniaca aimo mac nda aŋgɨrina meikramtaɨr, aia lamŋirena Karaisna ik nakeracatna kamma, anna Raraŋ Aetaniacna gargar. 19  Ais 29.14, na Ier 8.9Na Raraŋ Aetaniacna timbigta kapca gan kam ndopca eacrena, “Aku gan tiacarpaikna iro laiŋgap eacrena meikramtaɨrta landamŋimo, mo kecari te, an landamŋi aniacap eacrenanmo, moi kecarica mina wanaiŋ ndacarinande.” 20  Iop 12.17, na Ais 19.12, na 33.18, na 44.25, na Mt 11.25, na Lk 10.21, na Ro 1.20-21, na 1.28Na mandeaca, aia gan tiacarpaik ndeacrena meikramtaɨrmo aia minmo titocna kam ndopit? Na Tɨp Wandɨkca matau ŋgoinna lamŋirena ramtaɨrmo, aia minmo titoc ndopit? Na kamb puŋga ipuŋga mboprena ramtaɨrmo, aia min motocmo tit ndopit? Na Raraŋ Aetaniaca ma gan tiacarpaikna meikramtaɨrta landamŋiarmo, mo ŋgocraica mina ŋaŋaoca mbopekna kambta kirar toc.
21  Mt 11.25, na Lk 10.21, na Ro 1.20-21, na 1.28Na mana iroapa landamŋi laŋ manan mbuŋ tik, Raraŋ Aetaniaca aind ndamŋirena, mina ndorita landamŋi mbuŋ, co, gan tiacarpaikna meikramtaɨra manmo mba lamŋi mbe. Aintik Raraŋ Aetaniaca min mac nda aŋgɨna kabena taup mac moatna, anna, “An kam ŋaŋao mbuŋa.” Aia nenmo an ndoprena. Na meikramtaɨra anna waraca Raraŋ Aetaniaca rɨpac te, Raraŋ Aetaniaca minmo mac nda aŋgɨnande. 22  Mt 12.38, na Mk 8.11, na In 4.48, na Up 17.18, na 17.32Na Iudananda mina ndorimo ŋgagatraca watna nagagararena, na Giriknanda mina ndorimo landamŋi laiŋapa iro landamŋi aniacap aŋgɨna moca anna gagrarena. 23  Ais 8.14, na Mt 11.6, na In 6.60, na 6.66, na Ro 9.32, na 1 Ko 2.14, na Gal 5.11Na aia Karaisna ik nakeraca menacatna kamma Iudanaŋgepta iroar inkar minanmo, aoclatacna wautna kam kirara wiwitirinan. Na Iudana meikramtaɨr wanaiŋa anmo ŋaŋaoca mboprena kamna kirar ndamŋirena. 24  Ro 1.4, na 1.16, na 1 Ko 1.18, na Kol 2.3Na aia meikramtaɨr, Raraŋ Aetaniaca aina ŋgacrena kamma aia waracrina, na Iudananapa Giriknan toco waracrina, na aia lamŋirena, Karaisa ma Raraŋ Aetaniacna gargar, na ma mana iro landamŋi laŋ. 25  2 Ko 13.4Na gan tiacarpaikna meikramtaɨra, anmo gaind ndamŋirena, Raraŋ Aetaniacna iroar ndeida laiŋga wanaiŋ, anna ŋaŋao ŋgoin. Ri, an iroara meikramtaɨrta landamŋimo kocnaia tamuŋ ŋgoin ndeacrena. Na mina gaind ndamŋirena, Raraŋ Aetaniacna tɨpemb kirarir ndeida, Raraŋ Aetaniacmo wandacrena, ma gargara mɨnna wanaiŋ. Na mana an kirarirta gargara bagaraniac ŋgoin, meikramtaɨrta gargarmo kunda tamuŋ ŋgoin.
26  Mt 11.25, na In 7.48, na Ie 2.1-5Na ne Iesusa rɨpacrena laiplacar, ne lamŋirena, ŋgaua Raraŋ Aetaniaca nenmo aca ne Iesusna rɨtɨpaikta meikramtaɨrta tumbunna ndaruca eacri, na nena ndeida gan tiacarpaikna meikramtaɨrta lamnikca, landamŋiar anikta ramtaɨrta kirara eac ŋgocor. Na nena ndeida gagrar kocor. Na nena ndeida i aniacapna ramtaɨrta racaindpaiknanna wanaiŋ. 27  Mt 11.25, na Ie 2.5Na Raraŋ Aetaniacna larapacatna meikramtaɨr, mina kabena meikramtaɨrta lamnɨac ŋgoutta, mina iroara laiŋga wanaiŋ, na aintocna tɨpna kirar mbuŋa, Raraŋ Aetaniaca gan tiacarpaikna landamŋiarta meikramtaɨrmo, moi numbira monande. Na meikramtaɨr ndeida watreke, mina gagrar kocorta kirar ndeacrena, aintanmo Raraŋ Aetaniaca aŋgɨ te, gan tiacarpaikna gargarapna ramtaɨra moi numbira monande. 28 Na ma an iremb kocorta meikramtaɨrmo, ma aŋgɨnande, na an meikramtaɨrmo, ndeida watreke mina ndaekpemb koind, na mina reik ŋgocorta kirar. Na aintocna tɨpna kirarna kirara Raraŋ Aetaniaca an irembapa gagrar anikapnanmo, ma ainda morena, ma minmo aŋgɨri iriki kaŋgaukca tɨknande. 29  Ro 3.27, na Epe 2.9Ainda moca ramoot ianna Raraŋ Aetaniacna lamnɨacmo, ndona i aŋgɨri ŋgepna mɨnna wanaiŋ. 30  Ier 23.5-6, na In 17.19, na 2 Ko 5.21Na Raraŋ Aetaniac ma ndo nenmo aŋgɨca Karais Iesusap tɨkatna. Na aina moca Karaisa Raraŋ Aetaniacna iro laŋapa landamŋina ramoot ndarurina. Na Karais mbuŋ tɨk, Raraŋ Aetaniaca aimo moa aŋgɨra aia meikramtaɨr wandoik laiŋ ndaruca, ma aimo moa aia mana tɨpemb kirarir ratta raŋgairena. Na Karaisna aiŋ mbuŋ tik, Raraŋ Aetaniaca aimo Karais mbuŋ ŋgoikatna, na tɨp ŋgoreacna makukca aimo mac bubuocna mɨnna wanaiŋ. 31  Ier 9.23-24, na 2 Ko 10.17Aintik Raraŋ Aetaniaca toŋgorinanna, aia timbigta kap mboprina kirara raŋgairaŋ, “Na ramootta ndona i aŋgɨri ŋgepna ndop te, ma ndona ia kai aŋgɨ ŋgep teac, ma Kacootna imo aŋgɨri ŋgep.”

1:2 Up 9.14, na 18.1, na 18.17, na Ro 1.7, na 10.12, na 1 Ko 6.11, na 2 Ti 1.9

1:3 Ro 1.7, na 2 Ko 1.2

1:5-6 1 Ko 2.1-2, na 12.8, na 2 Ko 8.7, na 2 Ti 1.8, na KIEK 1.2

1:7 Lk 17.30, na Pil 3.20, na 2 Te 1.7, na Ta 2.13, na 2 Pi 3.12

1:8 Pil 1.6, na Kol 1.22, na 1 Te 3.13, na 5.23

1:9 Ais 49.7, na In 17.21, na 1 Ko 10.13, na 1 Te 5.24, na 1 Io 1.3

1:10 Ro 12.16, na 2 Ko 13.11, na Pil 2.2, na 3.16, na 1 Pi 3.8

1:12 In 1.42, na Up 18.24-28, na 19.1, na 1 Ko 3.4

1:14 Up 18.8, na 19.29, na Ro 16.23

1:16 1 Ko 16.15

1:17 Mt 28.19, na In 4.2, na 1 Ko 2.1, na 2.4, na 2.13, na 2 Pi 1.16

1:18 Up 17.18, na Ro 1.16, na 1 Ko 2.14, na 15.2, na 2 Ko 4.3

1:19 Ais 29.14, na Ier 8.9

1:20 Iop 12.17, na Ais 19.12, na 33.18, na 44.25, na Mt 11.25, na Lk 10.21, na Ro 1.20-21, na 1.28

1:21 Mt 11.25, na Lk 10.21, na Ro 1.20-21, na 1.28

1:22 Mt 12.38, na Mk 8.11, na In 4.48, na Up 17.18, na 17.32

1:23 Ais 8.14, na Mt 11.6, na In 6.60, na 6.66, na Ro 9.32, na 1 Ko 2.14, na Gal 5.11

1:24 Ro 1.4, na 1.16, na 1 Ko 1.18, na Kol 2.3

1:25 2 Ko 13.4

1:26 Mt 11.25, na In 7.48, na Ie 2.1-5

1:27 Mt 11.25, na Ie 2.5

1:29 Ro 3.27, na Epe 2.9

1:30 Ier 23.5-6, na In 17.19, na 2 Ko 5.21

1:31 Ier 9.23-24, na 2 Ko 10.17