NAI 3 JOHANES YOM
1
GAIAS NUG UḎAT ENA HEUM
Da Johanes, da Kayaknu uḏat danab, da layalnab Gaias nahipnu nai iiḵu yaaṯem. Da genab nahipnu ool mauhṯe. O lai gamal, Na Kayak ele oiṯep, oiyak nahip amuam ena daaṯe dooṯem amu, amubia na keeke ohp̱a ena daaḵutnu Kayak unuqidṯem. Da lailad laa uḏin, na nai genabib dab meṯemnu, na genab haen oh nai genab waap̱a daanna oiṯem elenu maṯieg doyen, da ool gamag huanak ahom. Ao, dahilad nid ag haen oh nai genabib dim lamidna oiṯeb doyen amu da ool gamag ahak oḵai aoṯem, gamag ahak laa nug gamag ahak amu eḏidḵunu elele iiṯa.
O lai gamal, uḏat oh na ig lainḵad ehanadna heṯem amu na genab heṯem. Na ii uuṯem. Genab na laa ii doyadṯem amge na ag ele ehanadna, ena heṯem. Amu dilag ag kristen tamaniak amegp̱a na ahilagnu oot mauhak dooṯemnu ele madip̱ig. Amu danab amu ag goḵulagnu hebep̱eg amu Kayak Nug na danab amu aṯem ehanadḵutnu oo daaṯe bia ehanadḵut am ena. Danab amu ag Jesus Kristus onig binag humaglagnu, iiṯa aḏi gumadna goṯeb amu ag ahilagnu uḏat nob ii aoṯeb. Amunu ig danab amu ehanadḵunig am ena. Kobol amup̱a ig ag ele nai genabnu uḏat laip̱u heḵunig.
DAIOTREPIS AMU DEMITRIAS DILAH KOBOL
Da nai laa yen kristen tamaniak meṯami amge Daiotrepis, nug nuḵa keeke ohnu beḏu hume anuqṯe, nug da oḏel dab ii medaṯe. 10 Amunu da uḵe, ap̱a teḵul dayeb amu da nuhig hak miag ap̱i dooglag. Nug ihinignu nai mauhnoak, nai nau ele madiṯe ge nug nai amuib ii madiṯe. Iiṯa, nug ig lainḵad ele ehanaṯa, laugp̱a diia ii goṯe, am danab ag ehanadḵulagnu heṯeb amu nug aib awa aṯe. Nug anam haaha, laa ag ig lainḵad ehanadḵulagnu oolag daaṯe ele amu, nug ag kristen tamaniakp̱anu ele lamadṯe.
11 O lai gamal, kobol nau aib dim lamidme. Na kobol tutuḵu ena amu dim lamiṯe! Laa nug kobol ena heṯe amu nug Kayak ele laip̱u daaṯep. Am laa nug kobol naup̱a oiṯe amu nug Kayak ele laip̱u iinab daaṯep. 12 Demitrias nug kobol ena heṯe amunu danab oh ag nug binag meṯeb. Nai genab am ele nug onig hume, aṯan teṯe. Ig ele nug binag meṯem amu na dooṯem, ihinig nai amu genab.
BAG QAK NAI LAALA
13 Da keeke kuḏum yaaḵulnu daaṯe amge da uḏugp̱a yaaḵulnu ool ii daaṯe. 14 Da paha na gumiṯe goḵulnu dab meṯem. Da gumiṯe gop̱i, na da ele nug iḏu anidḏaḏa, nai maṯignih. 15 Kayaknu maḏoḏ nahipp̱a daaḵunu ool daaṯe. Na laipad ip̱a daaṯeb ele, ag na humidṯeb. Amu na dahil humiṯak imu i lainṯad oh ap̱a daaṯeb ele amu, ag onilag diin, ap̱e doyeg!