KING TAUDIA EDIA BUKA IHARUANA
1
Ahasaia ia mase
Ahaba ia mase murinai, Moaba taudia ese Israela taudia idia dagedage henia.
Unai neganai Ahasaia, Israela ena king ese iena ruma ena ataiai uindo dekena amo ia moru diho, vadaeni mai gorere dikana ia hekure noho. Unai dainai ia ese hereva gwauraia taudia haida ia siaia, ia gwau, “Umui lao, Bala Sebuba, Pilistia taudia edia hanua Ekarona ena dirava do umui nanadaia, inai gorere dekena amo do lau mauri o lasi.”
To Lohiabada ena aneru ese Elia, Tisebe tauna, ia hereva henia, ia gwau, “Oi toreisi, oi lao, Samaria ena king Ahasaia ena hereva gwauraia taudia danu do oi hedavari, bona idia do oi nanadaia, ‘Badina dahaka Bala Sebuba, Ekarona ena dirava henanadaia totona do umui lao? Israela dekenai Dirava ta ia noho lasi, a? Umui giroa lou, king Ahasaia do umui hamaoroa, Lohiabada ese inai bamona ia hereva, ia gwau: Oi hekure noho gabuna dekena amo do oi toreisi lou lasi. Do oi mase momokani.’ ”
Unai dainai Elia ia lao.
Iena hereva gwauraia taudia be king dekenai idia giroa lou, vadaeni Ahasaia ese idia ia nanadaia, ia gwau, “Badina dahaka umui giroa mai haraga?”
Idia haere, idia gwau, “Tau ta ia mai, ai danu ia hedavari, bona ia ese ai ia hamaoroa, ia gwau, ‘King Ahasaia, umui ia siaia tauna, dekenai do umui giroa lou, do umui hamaoroa, umui gwau: Lohiabada be inai bamona ia gwau: Badina dahaka Ekarona ena dirava, Bala Sebuba henanadaia totona oiemu hesiai taudia oi siaia noho? Israela dekenai Dirava ta ia noho lasi, a? Unai dainai oi hekure noho gabuna dekena amo do oi toreisi lou lasi, to do oi mase momokani.’ ”
Ahasaia ese idia ia nanadaia, ia gwau, “Unai umui dekenai ia hedavari, bona unai bamona ia hereva tauna ena toana be dahaka bamona?”
Idia ese Ahasaia dekenai idia haere, idia gwau, “Iena dabua be huina dekena amo ia karaia, bona iena gaba dekenai be boromakau ena kopina gauna ia kwatua.”
King Ahasaia ia gwau, “Unai be Elia, Tisebe tauna.”
Vadaeni Ahasaia ese tuari biaguna ta, mai tuari taudia 50 danu ia siaia, Elia do idia abia totona. Tuari biaguna ese Elia ia davaria, ia be ororo ta ena latanai ia helai. Tuari tauna ese ia hereva henia, ia gwau, “Dirava ena tau e, king Ahasaia ese oi ia oda henia, do oi diho mai!”
10 To Elia ese ia gwau, “Bema lau be Dirava ena tau, lahi be guba dekena amo do ia diho mai, oi bona oiemu tau 50 do ia gabua ore.” Vadaeni nega tamona, lahi ia diho, unai tuari biaguna mai ena tuari taudia ia alaia mase.
11 Vadaeni king Ahasaia ese tuari biaguna ma ta Elia dekenai ia siaia, mai tuari taudia ma 50 danu. Idia be Elia dekenai idia daekau lao, bona tuari biaguna ese Elia ia hereva henia, ia gwau, “Dirava ena tau e, king Ahasaia ese oi ia oda henia, maoromaoro do oi diho mai!”
12 To Elia ia gwau, “Bema lau be Dirava ena tau, lahi be guba dekena amo do ia diho mai, oi bona oiemu tau 50 do ia gabua ore.” Vadaeni nega tamona, lahi ia diho, unai tuari biaguna mai ena tuari taudia ia alaia mase.
13 Vadaeni king Ahasaia ese nega ihatoina tuari biaguna ma ta Elia dekenai ia siaia, mai tuari taudia ma 50 danu. Tuari biaguna be ororo dekenai ia daekau, Elia ena vairana dekenai ia tui diho, ia noinoi, ia gwau, “Dirava ena tau e, mani emu kara lau bona egu tuari taudia dekenai do oi bogahisihisi henia. Aiemai mauri do oi laloa, ai do oi hamauria! 14 Unai tuari biagudia ruaosi, mai edia tuari taudia ibounai be lahi guba dekena amo ese idia ia gabua ore. To mani emu kara lau dekenai do oi bogahisihisi!”
15 Lohiabada ena aneru ese Elia ia hamaoroa, ia gwau, “Tuari biaguna danu do oi lao, bona do oi gari lasi.”
Vadaeni Elia be tuari biaguna danu king Ahasaia dekenai ia lao.
16 Elia ese king ia hamaoroa, ia gwau, “Oi ese hesiai taudia oi siaia, Ekarona ena dirava Bala Sebuba do idia nanadaia totona. Oi laloa Dirava be Israela dekenai ia noho lasi, vadaeni oi nanadaia lasi, a? Oiemu gorere do ia namo lou lasi, oi be do oi mase!”
17 Ahasaia ia mase, Lohiabada ena hereva Elia ena uduna dekena amo ia gwauraia hegeregerena. Ahasaia be mai ena natuna tau ta lasi. Unai dainai iena tadina Iorama ese Ahasaia ena gabu dekenai king dagi ia abia. Iorama ese Israela king dagi ia karaia hamatamaia neganai, Iehorama Iehosapata, Iuda ena king ese lagani ta mai kahana Iuda ia naria vadaeni.
18 King Ahasaia ena kara oredia edia sivarai be Israela Ena King Edia Sivarai Buka lalonai idia torea vadaeni.