PAULO ENA REVAREVA
FILEMONA
DEKENAI
1
Lau Paulo, Keriso Iesu dainai, dibura ruma dekenai lau noho, bona iseda varavara Timoteo ese inai revareva ai torea noho. Aiemai varavara bona gaukara hebou tauna Filemona, oi dekenai inai revareva ai siaia. Ma danu ekalesia oreana oiemu ruma dekenai idia hebou noho, iseda taihuna Apia bona aiemai turana namona Dirava ena tuari lalonai, Arekipo, idia danu totona inai revareva ai torea inai.
Ai ura iseda Tamana Dirava bona iseda Lohiabada Iesu Keriso ese hariharibada bona maino umui dekenai do idia henia.
Filemona ena lalokau bona abidadama
Filemona e, lau guriguri negadia ibounai, oiemu ladana lau gwauraia bona Dirava lau tanikiu henia. Badina be oiemu sivarai lau kamonai, oi ese Dirava ena taudia oi lalokau henia, bona oi ese Lohiabada Iesu oi abidadama henia noho. Oi be aiemai turana, badina be iseda abidadama be tamona. Unai dainai lauegu guriguri be inai abidadama ese aonega bada oiemu lalona dekenai do ia havaraia, vadaeni do oi diba momokani dahaka gau namodia Keriso Iesu dekena amo ita davaria noho. Oibe, lauegu tadina e, Keristani taudia ibounai oi lalokau henia bada dainai, idia edia lalona oi hagoadaia noho. Unai bamona oi karaia dainai, lau be lau moale, bona egu lalona ia namo noho.
Filemona ese Onesimo do ia abia lou be namo
Lau be inai bamona lau laloa: Oi be lauegu tadina, Keriso lalonai ita noho dainai. Unai dainai oi lau oda henia diba, kara ta do oi karaia. To oi lau lalokau henia dainai, oi do lau oda henia lasi, to oi do lau noia sibona. Oibe, lau be Paulo, lau be tau badana, bona Keriso Iesu dainai dibura ruma dekenai lau idia koua vadaeni. 10 Lauegu noinoi be inai: Onesimo, lauegu natuna Keriso lalonai, be mani emu kara do oi bogahisihisi henia. Lau be dibura ruma lalonai lau noho neganai, ia dekenai lau hadibaia dainai, abidadama ia davaria, vadaeni lau be iena tamana, Keriso lalonai. 11 Gunaguna Onesimo ena hesiai gaukara be namo lasi momokani oi dekenai, to harihari iena hesiai gaukara be namo momokani, oi dekenai, bona lau dekenai danu.
12 Lau ese ia lau siaia lou oi dekenai inai. Mani emu kara do oi abia dae, badina be lauegu kudouna danu be ia lalonai ia noho. 13 Lauegu ura korikori be ia do lau dogoatao, vadaeni dibura ruma lalonai Sivarai Namona dainai lau noho neganai, ia ese lau do ia durua noho. Unai dekena amo ia ese oiemu gabu do ia abia bamona, lau durua totona. 14 To bema oiemu gwaumaoro lau abia guna lasi neganai, ia do lau dogoatao lasi. Lau ura lasi oi do lau oda henia. Lasi momokani. Lau ura be oiemu ura dainai inai kara namona do oi karaia.
15 Onesimo ese oi ia rakatania nega sisina sibona. Sedira, unai kara ia vara dainai, oi ese ia do oi abia lou, bona oi dekenai do ia noho nega ibounai. 16 Badina harihari Onesimo be hesiai mai guia danu tauna sibona lasi. Lasi, hari ia ese inai hesiai dagi ia hereaia vadaeni. Ia be varavara ta, iseda lalokau tauna, Keriso lalonai. Ia lau laloa bada. Oi danu ese ia do oi laloa bada, badina ia be oiemu hesiai tauna namona ta, bona oiemu varavara namona ta danu, Lohiabada lalonai!
17 Lau be oiemu turana oi gwau, ani? Unai dainai Onesimo mani do oi abia dae, lau do oi abia dae hegeregerena. 18 To bema gunaguna Onesimo ese oi ia hadikaia, o oi dekena amo ia abiatorehai neganai, iena abiatorehai be lauegu ladana dekenai do oi atoa. 19 Lau Paulo ese, lau sibona egu ladana lau torea inai, unai abiatorehai ena davana ibounai oi dekenai do lau henia.
To momokani, oi be mai oiemu abiatorehai lau dekena amo, ani? Badina be oiemu mauri be lau dainai oi davaria, ani? To unai davana be do lau tahua lasi. 20 Unai dainai, lauegu tadina e, mani emu kara egu noinoi do oi abia dae, Lohiabada ena ladana dainai. Lauegu lalona do oi hamoalea, Keriso lalonai ita be tadikaka dainai.
21 Lau diba momokani, oi ese egu hereva do oi kamonai henia. Unai dainai inai revareva oi dekenai lau torea noho. Lau diba oiemu kara Onesimo dekenai be do ia namo, bona egu noinoi gauna do ia hereaia danu. 22 Ma egu hereva ta danu be inai: Lauegu daiutu ta do oi abia hegaegae lau totona. Badina be lau abidadama henia gauna be inai: Dirava ese umui emui guriguri do ia kamonai henia, bona umui dekenai do lau mai dalana, be ia ese do ia kehoa.
Bamahuta herevadia
23 Lauegu bamona Epafra, Keriso Iesu dainai lau danu dibura ruma lalonai ia noho, ia ese oi ia hanamoa noho. 24 Mareko bona Arisitako bona Dema bona Luka, lau danu idia gaukara hebou noho, idia ese danu oi idia hanamoa noho.
25 Lohiabada Iesu Keriso ena hariharibada, be umui emui lauma dekenai do ia noho. Amen.