Daniele
Mbuga ogoniha gilibu ngarunaga nemandi ogo
Danielenaga mbuga ogoha bi te dunini waragaria lo wialu emaga hendenenaga bi te maria lo wialu bida. Bi te ogoni Yuda wali agali ti genda heba heangi tini mo hongo helonaga mbuga ogoni gili bini. Bi ogonime wali agali ti Ngode Datagaliwabe heba mandagiore haabo haga kago manda bilonagabi mani Ngode Datagaliwabehanda tinaga genda yu karu mo wahai halu ti biamogo biaga kago manda bilonagabi gilibu nga.
Danielenaga mbuga ogoniha bi irane kiranaga gilibu winigo nga.
Mbira
Be 1–6 Be uruniha howa Danielebi ibunaga nenegerubi tinaga waitigi hearume ti mo ko halu bo wahole bialu hene. Ani biyaria tigua Ngode Datagaliwabeore hongo howa yu tigabu haabo halu mini mbiraore hongohe wu hene. Tigua mana lehe mbira nabi hogorale bialu heagola tinaga waitigi biarume ti mo ko hole bialu henedaruni bibe nahe hene.
Mende
Be 7–12 Be uruniha Daniele ibugua emaga hendeneru garea lo nga. Horo uruni henedangi dindi timbuni wali agali dewa pale Ngode Datagaliwabe mitangi nabiaga hearume ti hongoheore hene. Tigua Ngode Datagaliwabenaga wali agali balu bo biba habehe hene. Anigo de gandeba walia hayadagome nde Ngode Datagaliwabehanda waitigi uruninaga hongo bope halu ibunaga wali agali haru tagira poragola ti bayale holebira lalu walia hene.
Bu̱lu̱ baga buwa kuni gilibu ngago
1.1–6.28
Danielebi ibunaga nenegerubi 7.1-12
Daniele ibugua emaga hendeneru
7.1-28
Nogo ale tara tara maria hendenego
8.1–9.27
Nogo sibi wangabebi meme wangabebi hendenego
10.1–11.45
Dahuliyali mbiralime Danielehondo lamigi biniru
12.1-13
Hamaro bulene tu holebiragonaga
Danielebi ibunaga nenege tebirarubi bi te ngago (1.1–6.28)
1
Yuda igiri maru kini andagaha henego ogo
Yahoiagimi ibu Yuda wali agalinaga kini mali tebira heagola Babilono dindinaga Kini Nebugadenesa ibugua Yarusaleme tano wiagoria ibunaga ami agalirume waranda howa wai bule ho mabu bupe hene. 2 Kin 24.1, 2 Bit 36.5-7 Anduane Homogohanda Kini Nebugadenesa ibugua Yudanaga Kini Yahoiagimibi Yuda wali agali dewalibi minalu gabo beru beledirubi Anduane Homogonaga andaha winiyaru bibahende mo yai helene. Ani biyagola Kini Nebugadenesa ibugua wali agali minayaru haru pialu mbirale mo yayaru bibahende ibunaga damaru andaha wule mo yalu Babilono dindi pene. 2 Kin 20.17-18, 24.10-16, 2 Bit 36.10, Ais 29.7-8
Ani bialu howa Kini Nebugadenesa ibugua ami agali haguane Asabenasa ibuhondo lalu, Yuda igiri karuni aria maru Kini Yahoiagimi andaga henebi agali haguaneru andagaha henebi uruni aria maru dabalu haru ibabe, lene. Ibugua lalu, Huliya igiri tingini denguiru mo ko nahe bayale do mbaraleni howa sigulu bene manda maru abale mibehego handalu dababe, lalu lamini. Igiri uruni kini andagaha biabe bialu helolenaga ani dabene. Dabo helowa Asabenasa ibugua igiri uruni Babilono bi lalu bebaru daga lelobi gili bilobi lawai hole dabene. Ani heagola kini ibugua lalu, Igiri uruni ti agali ibunaga biabe bialu ibu andagaha hagane hearu heba ti iba tomobi mandagi nagadagua nalu helo. Igiri uruni ti mali tebira sigulu bialu howa biai haragola kini ibu andagaha ibunaga biabe bia halu helo, lene.
Asabenasa ibugua igiri dabayaru aria Yuda igiri mariali dabo helene. Tinaga mini Daniele mbira Hananaia mende Misaele tebone Asaraia mane uruni dabo helene. Ani heagola Asabenasa ibugua tinaga mini gahenge wia aribia haga bialu uru wigi bini. Daniele ibu mini Beledesasa wini. Hananaia ibu mini Sadaraga wialu Misaele ibu mini Misaga wialu Asaraia ibu mini Abedenego wigi bini.
Kini andaga howa tomo ibabi migi biyagola Daniele ibu nanaga hene. Ibugua mitangi bialu tomo waini ibaru nayagua ogonime Ngode Datagaliwabenaga deni ibu dodohe holigonaga ibu ilili bialu nanole manda bini. Daniele ibugua tomo waini ibaru nanaga henedago irane agali kini ogoni dindiha dama hearunaga loma binibi mende nde ibugua tomo uruni nayagua ibugua kininaga bi larago bibahende hale hai hole lalu walia holeyane nane wahene bada. Ani howa ibugua agali haguane Asabenasahondo ibu tomo tara maru ngaru noliya ngibehebe lalu hale hene. Ese 4.13, Hos 9.3 Ani hale hayagola Ngode Datagaliwabehanda Asabenasa ibugua Daniele dara helo biamogo bini. Pig 39.21 10 Ani biyagola ibugua gi howa Danielehondo lalu, Kini ibunime tomo uruniore nalimu lalu dabo ngiyago i̱ giho kogoni. Irane kini ibugua handalu karia igiri maru tí haru mandagi ibini biaru tinaga tingini bayale halu hondowa tínaga ko hayagua nde i̱ homoliya bo waholobadago, lene.
11 Ani lowa Asabenasahanda Daniele Hananaia Misaele Asaraia imaru handaya ho helonaga agali mbira dabo helene. Ai Daniele ibugua agali ogoni hearia puwa lalu, 12 Í̠na inahondo ogodagua bia handabelo hame ledo. Ina tomo tara nemaru iba ibuniru hangu nalu holoma̱ya horo pira hangu henge ngi. 13 Ani kamagola inanaga tinginibi igiri tomo kini andagaha nagane karubi inanaga tingini handa handa beregola inabi nde ti ale degedabe be inanaga tingini obiyadabe handabelo. Ani hondowa mani í̠na inahondo bule winidago biai habelo, lene. 14 Kininaga haru haga agali biagome Danielehanda bi ogoni layagoni karulapeda lowa anidagua bini. 15 Anidagua buwa ai horo pira biago howa agali haru haga biagome igiri mariali biarunaga tingini bayaleore hongohe igiri maru kinihanda tomo nalimu lene nalu hagarubi ndo bolangua ho hearia hendene. 16 Ani hondowa agali haru haga biagome tomo bayale tarabi waini ibabi kinihanda mibe lene biaru nami wahalu Danielebi ibunaga nenege tebirali biarubi ti tomo nelo nema wiarubi iba henene wiarubi mialu hene. 17 Ai Danielebi ibunaga nenege tebirali biarubi ti Ngode Datagaliwabehanda biamogo bialu mini manda bayale talebu miyagola tinaga sigulu biyago bayale hangu bialu tinaga manda timbuniwi hene. Tinaga manda tara tara lawai hayaru bibahende manda biai hene. Anibi heagola Ngode Datagaliwabehanda emaga hendeneru baya hangu tale bilo manda bogaru mugube Danielehondo mini.
18 Ai igiri bibahende biaru kinihanda mali tebira sigulu balu halimu layaru bai hayagola Asabenasa ibugua kini ibuni hearia haru piau hene. 19 Ani piyagola kini biagome handalu hearia Daniele Hananaia Misaele Asaraia imarunaga manda timbuni igiri maru biarunaga manda bolanguahe heago hendene. Ani hondowa kini ibugua igiri uruni ibunaga biabe bialu helo dabo helene. 20 Ani buwa ibugua igiri biaruhondo bi maru hale haga buwa ba handalu hearia igiri mariali biarunaga manda timbuniore howa ibunaga Babilono dindiha agali manda timbunibi hearunaga manda biaru bibahende bolangua hai hearia hendene. Igiri uruninaga manda ti baba nakarulapeore hearia hendene. 1 Kin 10.1 21 Daniele ibugua kininaga biabe bialu luore ho wahene. Ani bialu heane dege Babilononaga kini gahenge mbira mini Sairusi ibu kini ho aribia hene.

1:1: 2 Kin 24.1, 2 Bit 36.5-7

1:2: 2 Kin 20.17-18, 24.10-16, 2 Bit 36.10, Ais 29.7-8

1:8: Ese 4.13, Hos 9.3

1:9: Pig 39.21

1:20: 1 Kin 10.1