Galesia
Polohanda Keriso hameigini Galesiani hearuhondo beba ogo gilibu wia hene
Mbuga ogoha gilibu ngarunaga nemandi ogo
Yasunaga Bi Mana Debene lamiyagola loyogo lalu Yu wali agali ndo tara tara hearume hale howa turu halu yu tiga bini. Yu tiga biyagola agali marume Ngode Datagaliwabe mana henene ngadagua ndo lawai halu lalu, Ai Keriso hameigini heneneore hole Mosese heneyangi Mana lowini ngadagua bulene nga, lene. Ani lawai halu ka layago hale howa Polohanda lalu, Ani bulene nawiore. Holene gahenge yule Kerisohondo mini mbiraore hangu wulene nga. Ani birimiyagua Ngode Datagaliwabehanda, Í̠ mini tigabiwi ke, lolebira, lalu gilibu wia hene.
Ngode Datagaliwabe mana henene ngadagua ndo lawai haga biarume wali agali hariga naleagoha haru peneni mini mbiraore wulene harigani haru dai bulenaga Polohanda beba ogoni Keriso hameigini Galesiani hearuhondo gilibu wia hene. Ani gilibu wia halu howa lalu, I̱ abosolo harudagoni pigane dindi agalime olalu i̱hondo, Í̠ biabe ogoni bia, lene ndo biabe ogoni i̱na buliya Ngode Datagaliwabe ibunime olene, lalu lo winigo nga.
Ani lowa Ngode Datagaliwabehanda iname ibuhondo mini mbiraore weramago hangu hondowa, Tí mini tigabiwi kami, laga lalu bi ogoninaga hongo howa lo yanga lalu leda. Ani lowa lamaro bialu lalu, Mini mbiraore weramagome gubalini holene yu anda ibiragola gubalini holeneni geho howa Keriso hameiginime bulenebi lolenebi aguada lalu bialu holeberama, lene.
Bu̱lu̱ baga buwa kuni gilibu ngago
1.1-10
Gili binigonaga irane 1.11–2.21
Polo ibu abosolo helo Ngode Datagaliwabehanda olenego 3.1–4.31
Ngode Datagaliwabehanda ina biamogo bulene nawi howa biamogo bia hagagonaga bi mana debene ngago 5.1–6.10
Garabaya ale hemaria golope henego iname bialu holene 6.11-18
Lamaro bialu lenego
1
I̱ Polo. I̱ abosolo agali holiya wali agalime i̱ olalu, Ha, lene ndo. Tigua i̱ dabo helenebi ndo. Aba Ngode Datagaliwabehanda Yasu homayagola mo heya henego ibubi Yasu Kerisobi libugua i̱ abosolo holiya dabo helene. Ga 1.11-12 Keriso hameigini i̱ heba oali kamarume Keriso hameigini Galesiani ngoai haga bidamiruhondo, Tí mitangi bu kama, lalu beba ogo gilibu wia harama.
Ina Aba Ngode Datagaliwabebi Anduane Homogo Yasu Kerisobi libugua tíhondo biamogo bia holenebi mo palia holenebi ngilo hamelo ko. Lm 1.7, Pb 1.2
Ina Aba Ngode Datagaliwabehanda hamelo henedagua iname ko birimagonaga Keriso ibugua homo aribia hene. Áyu ko bu ngarume ina dariba kagonaga ibugua ina golope hole ani bini. Lm 4.25, Ga 2.20, 1 Ti 2.6, Ta 2.14, Hi 2.5, 1 Yo 5.19 Ogoninaga iname Ngode Datagaliwabe mini yaraga haabo halu holene ngago aniore bimi̱ya.
Bi Mana Debene mbiraore hangu ngago ogo
Kerisonaga biamogo bia holeneme Ngode Datagaliwabehanda tí olayago tígua ibu abaleore wahalu bi mana mende hale hole poramigo i̱ mogolo ko. Bi Mana Debene mende nawiore lalu langerogoni irane ogo. Wali agali maru karume tí mini kira wu halimulo Kerisonaga Bi Mana Debene mo tara hole manda bialu ka. Ab 15.1, 15.24, 2 Ko 2.17, 11.4, 11.13 Iname Bi Mana Debene ala langirimagobi ndo maha ina mbiralimebi dahuliya andaga howa dahuliyalimebi bi mana mende ale langirimayagua ogoni ibuhondo, Heli dindi pu, lolene wulebira. 1 Ko 16.22 Ala iname larimadagua áyubi i̱na lone larogo. Mbiralime Bi Mana Debene ala yu tiga birimigobi ndo mana mende ale tíhondo langiyiyagua ogoni ibuhondo, Heli dindi pu, lolene wulebira. Man 4.2, Min 30.6, Mo 22.18-19
10 Wali agalime i̱hondo turu helonaga bi larobe. Aninaga ndo laro. Ngode Datagaliwabehanda i̱hondo turu helo hamelo ko. Wali agalime i̱ hame lelo manda berobe. I̱na wali agalime i̱ hame lelo manda bu haabo kole nde i̱ Kerisonaga biabe bia haga ndo kole. 1 Te 2.4, Ya 4.4, 1 Yo 3.19
Polo ibu abosolo henego te ogo
11 I̱ hamene mbaliniru bi o langerogo hale halimu. Bi Mana Debene i̱na langigi biruligo agalinaga ndo. Md 16.17, 1 Ko 15.1 12 Agali mbirame i̱ langini ndo. Mbiralime i̱ lawai henebi ndo. Yasu Keriso ibunime i̱ walia haya. 1 Ko 15.1-3, Ga 1.1, Eb 3.3
13 Ala i̱na Yu wali agalinaga manani howa bialu harugo te langiyago tí hale harimi. Ngode Datagaliwabenaga wali agali heneru i̱na ti dara nahe howa mo tandaga halu bo wahai hole manda buwa hongo howa bialu haru. Ab 8.3, 9.1, 22.4-5, 26.9-11, 1 Ti 1.13 14 Yu agali maru i̱ mandagiali hearume Yu wali agalinaga manani henedagua ndo i̱na ti bolangua halu mamali mana gibi wiarubi bialu harugoni. Ab 22.3, 26.9, Pb 3.6
15 Ngode Datagaliwabehanda dara howa biamogo bia hole lowa i̱ ai̱yahanda i̱ nataba heneha ibugua i̱ dabowa ibunaga biabe bia haga holiya loma bia ho heleneya. Ais 49.1, Yar 1.5, 49.1, Ab 9.15, Lm 1.1 16 Yu wali agali ndo wali agali tara tarahondo i̱na Bi Mana Debene lamuliyanaga Ngode Datagaliwabehanda ibu Igini i̱na de hondoliya ha pani helaya. Ani helayagola agali maru hearuhondo i̱ agua buadabe lalu te nale haru. Lm 11.13, 2 Ko 4.6, Ga 2.7 17  Abosolo agali ala hene Yarusalemeni hearu ti hearia i̱ de hondo nape i̱ Arebia dindi ala pialu mani Damasagasa dai biru. 18 Dai buwa mali tebira halu i̱ Yarusaleme Pida hearia te lole puwa ibula Sarere kira agima ho hariba. Yo 1.42, Ab 9.26-30 19 Ogoriani abosolo agali maru i̱ de nahende Anduane Homogo hamene Yamese dege hearia de handaru. Md 13.55
20 Ani biru lalu tíhondo bi gilibu wia harogoni tindule lalu mbira gili nabi tigatigaore gili berogo Ngode Datagaliwabe ibu de hendeda.
21 Emene howa i̱na Siriabi Silisiabi puwa uruniha ibaga bu haru. Ab 9.30 22 Ogoningi Keriso hameigini Yudiaha bu haga hearume i̱ de nahende hene. 23 Tigua wali agali marume te layago dege hale ho hene. Te layago ogo. Agali mbira ala ina mo tandaga halu Yasuhondo mini mbiraore wulenenaga mana ala mo wahai hole haga biagome áyu lone ibuni Yasunaga bi mana lamialu ka, layago hale ho heneya. 24 Anigo Ngode Datagaliwabehanda i̱hondo biyiyago mitangi bialu tigua ibunaga mini yaraga halu hene.

1:1: Ga 1.11-12

1:3: Lm 1.7, Pb 1.2

1:4: Lm 4.25, Ga 2.20, 1 Ti 2.6, Ta 2.14, Hi 2.5, 1 Yo 5.19

1:7: Ab 15.1, 15.24, 2 Ko 2.17, 11.4, 11.13

1:8: 1 Ko 16.22

1:9: Man 4.2, Min 30.6, Mo 22.18-19

1:10: 1 Te 2.4, Ya 4.4, 1 Yo 3.19

1:11: Md 16.17, 1 Ko 15.1

1:12: 1 Ko 15.1-3, Ga 1.1, Eb 3.3

1:13: Ab 8.3, 9.1, 22.4-5, 26.9-11, 1 Ti 1.13

1:14: Ab 22.3, 26.9, Pb 3.6

1:15: Ais 49.1, Yar 1.5, 49.1, Ab 9.15, Lm 1.1

1:16: Lm 11.13, 2 Ko 4.6, Ga 2.7

1:18: Yo 1.42, Ab 9.26-30

1:19: Md 13.55

1:21: Ab 9.30