Yudidi
Mbuga ogoha gilibu ngarunaga nemandi ogo
Yudidi mbuga ogoha howa te gilibu ngagome Yuda wali agali bibahende bo wahai halu amo lolebiyagobi waitigi giha howa ti bo wahai holebiyagobi nga. Ani bule biyagola wali bayale mbira mini Yudidi berenego ibugua hongo howaore Ngode Datagaliwabenaga hame ngago talialu biraabo haga berene. Ai ogoni ibugua mini mbiraore hongo howa wialu Ngode Datagaliwabe ibugua ibunaga wali agali dara halu ti heba mandagi howa waitigi giha haru dai bulebira lo manda bu berene. Ani biruwa Yudidi ibugua waitigi bope halu wayali holiya hongo ngibe lalu Ngode Datagaliwabehondo bi lene.
Mbuga ogoha howa te ledagome wali agali lawai halu leda.
Yuda wali agali homai holene kaware winigo
1
(Be 1.1–7.32)
Nebugadenesahanda Kini Abagasadala wai binigo ogo
Nebugadenesa ibu kini henego mali homberia (12) Asiria dindiha Niniba tano timbuni wiagoria heagola Kini Abagasada ibugua tano timbuni Egebadana wiagoria howa Midia dindi handaya ho hene. Kini Abagasadahanda wai pabe timbuni Egebadana tano bu mabu bini. Tigua ege to̱le̱ podaganeme hariha ege to̱le̱ hearu podaga bini. Ege to̱le̱ podenego timbuninaga manda mida tebira wialu leneha manda mida mbirani bolanguahe podo wini. Ege pabe ogoni bima irigi halu daliganaga mida manda pira tebirani duria (35) wialu pabe tohenaga manda mida pira kirani duria (25) wini. Pabe neneni ami agali mamage howa handa a̱i̱na̱i̱ holene emene daligabi gimbu bima irigi howa helaga bini. Anda daliga ami bu helaga biyago andane dindiha tanonaga wai pabe panga timbuni dugua haga bini. Mamagealinaga anda daliga ogoninaga manda mida pira duria (50) wialu manda arane timbuninaga manda mida pira tebira (30) wini. Ai tanoha panga haraba daliganaga manda mida pira tebirani duria (35) wialu arane yangalenaga ami agali mandagi tidiyu tagira pelo manda buwa arane timbuni manda mida pira kira (20) wini.
Ai horo ogoningi Asirianaga Kini Nebugadenesa ibugua Abagasadala dindi tigabi Lagese tanonaga gibuni wiagoria wai bini. Wali agali dewaore hari bare wiagoha paliaga hearuhabi iba tebira Taigirisi Yuberedisi Hidasabeseru ange ange paliaga hearubi dindi tigabi Kini Ariogo Elama dindi haru haga heago ibugua handaya ho haga hearubi tigua Kini Abagasada biamogo bialu wai bini. Ami agali dewaore Kaladea ami agali pelemule ibu ngoai hene.
Ani biyagola Nebugadenesa Asiria wali agalinaga kini ibugua Pesia dindiha hearubi wali agali amu ni paliragoha hearubi tihondo bi lo pelene. Bi ogoni dindi Silisiaha hearubi Damasagasaha hearubi Lebanono dindiha hearubi Lebanono mendehayagi hearubi iba solowara timbuni bedago ange ange paluyu pedarubi Hari Kamelo kago andaneha paluyu pedarubi Gileada dindiha palearubi Galili Daligaha palearubi Yaserili dindi tigabi wiagoha palearubi ti bibahendehondo bi lo pelai hene. Ani bialu Samaria dindiha hearubi wali agali maru Yodana iba doma mendehayagi hearubi unura puabo halu Yarusalemeha hearubi Bedaniha hearubi Kelesaha hearubi Kadeseha hearubi ti bibahendehondo bi mbira ogobi dege dege lo pelai hene. Ani bialu Iyibi iba pedagoria bi puiri halu unura Tabanese tano ngagoria puabo halu Lamese ngagoria bolangua halu Gesono dindi hobane ngagoria anda pene. 10 Ani bialu bi wai-o ogoni pu dege bialu Tanisi tano tagira pialu Membisi tano ngago bolangua halu Iyibi dindiha bibahende piai halu Idiobia dindila tubari ngagoria wai-o bolangua hene. 11 Anigo ai wali agali dindi uruniha palearume ti bi ogoni hale halu Kini Nebugadenesa biamogo bialu wai bu pu nabi wahai hene. Tigua mitangi bu handalu hemiria ibuni hangume wai bialu wayali naholebirago manda bialu tigua ibuhondo gi nahe howa wai nape wahai ho hene. Ani manda bu howa agali bi yalu wai-o ibiyaru mo ko howa mo ngubia halu bameore daibilaga bini.
12 Anidagua biyayagola Nebugadenesa ibugua wali agali dindi uruniha hearuhondo keba ho hene. Ibugua lalu, I̱ agali timbuniore kogo heneneore i̱ninaga minini howaore larogo i̱na wali agali dindi uruniha karu pani nelo mialu i̱ninaga hongome bo wahai holebero. I̱na Silisia dindi bibahendeni karu bo wahai halu Damasagasa dindiha karubi Siria dindiha karubi bo wahai halu Moaba dindihabi Amono dindiha karubi Yuda dindiha karubi Iyibi dindiha karubi bibahende bo wahai hama puabo halu iba solowara kira bedago labo angeni bama tagira polebero, lene.
13 Ai Nebugadenesa ibu mali pira mbirani karia (17) kini henego ai mali ogoninaga ibugua kini Abagasadala wai bini. Wai bialu ibugua kini Abagasada heba ibunaga ami agali nogo hosini biruwa wai biaga hearubi maru garo nogo hosime gililagani howa wai biaga hearubi bibahende bope halu bo wahaiore hene. 14 Nebugadenesahanda Kini Abagasada dindiha tano wiaru damene bibahende ibu karulaiore hene. Ani bialu tano timbuni Egebadana wiagoria anda puwa ami agali mamage haga anda daliga bima irigi hene heagoha ti anda pialu karulai hene. Ani bialu mbirale magedi hamani wiaru page mo yai halu bini. Ani bialu ibugua tano ogoni mo ko halu bo giala holebiyagola tano biago ko hai halu mo ngubia ho ngelene. 15 Nebugadenesahanda Kini Abagasada Lagese tano kawareni hari bare mbira wiagoha warahana howa minu yania hene. Minuyu howa ibunaga yandare luni yiagome Abagasada nogoba howa bo home lalu anidagua biyagome Abagasadanaga hongo bo ereba hai halu bini. 16 Ani biai halu Nebugadenesa halu ibunaga ami agali dewaore biaru heba tano timbuni Niniba dai bini. Dai bu howa tigua turu halu tomo timbuni dawa nadege bialu horo handari mbirani pira kira (120) hene.