Poloni Iye Timoti Pipia Kumbe Lepa Topa Tirimu Ungumu
1 Timoti
I Ungu Torumumunga Ungu Pulu Mare
Poloni Kraistinga imbo Efesus kombuna moloringima Timoti tapu tepa nokopili nimbe yu purumu. Anjo molopalie Timoti Kraistinga imboma tapu tepa nokopa kondombalo mele mane tipelie i pipiamu topa mundurumu.
Goteni enonga tapu iyema toya toko molangei nimbe enge tipili.
Poloni Timotindo Nunge Ulu Tenioma Kinye Kraistinga Imbomani Ulu Tengema Kinye Wamongo Nokoko Kondowi Nimu Ungu Mare
1
Poloni i pipiamu tombaindo oi pulu polopa torumu ungumu
Na Pol, Jisasi Kraistini nanga kongonomu tendepuwi nimbe lipe mundurumu iyemu. Lino Tepa Lipe Mindili Nolemala Aulkena Wendo Ltimu Gote kinye lino paa tepa kondombalo nimbo konopu tipo nokopo moromolo iye Kraist Jisasi kinye na kanoko liko i kongonomu tendepuwi ningilina aku tepo andopo nimbo tiro iyemuni nu Kraistinga iyemu molko kondani nimbo nani nu nokoro, nu kinye ilto Kraistinga iye talo morombolomunga nu nanga kandi malo Timoti i pipiamu topo tiro. Lapa Gote kinye linonga Awili Kraist Jisasi taloni nu kinye konopu noiko teko kondoko, nuni wali te ulu mare teko kenjinio kinye nu kondo kolko mindili nani naa ningo, nu konopu ame topili taka liko molani nengili.
Ungu kolo tolima mane tirimele imbomani nimele unguma naa pilipo umbulu timolo ungumu
Nani kombu Masedonia provins pumboindo nu enge nimbo walipo pilipolio kombu awili Efesus molani niu kano mele kinye nu akuna we molani nio. Iye mareni akuna kolo toko ungu lupema mane tiko moromele kani akuna we molko kano iyemando aku ulu naa teaio niwi nimbo nu walipo pilto. Aku iyemani Juda imbomanga kangema toko anda kolepalemanga imbima tule teko toko kau moromele ungumani enonga konopuma topa beambo tipe, ungumanga pulumu pilingeindo we opa karaye kau tenge aulkemu akirindipe, Gotenga ungu paimboma pilinge aulkemu pipi tirimo kani enondo aku ulu naa teaio niwi. Kano iyemani mane tirimele ungumani Gote pimolo aulkemu naa akirindirimo. Gotenga ungumu kinye, yuni lino kinye tembo nimbe, nimbe panjirimu uluma kinye, Kraist Jisasi molopa linonga nimbe tenderimu mele akumu paimbo nimbo enge nimbo pimolo ulumuni kau aku taloni kau pimolo aulkemu akirindirimo. Kano iyemani ningo kenjiko imboma teko embambo tirimele iyemando aku teko naa teaio niwi nio mele Kraistinga imboma nendo yando enongano konopu mondoko molangei nimbo kano iyemando aku teko niwi nio. Paimbo ningo enge ningo pimele ulumu paa paimbo teremele ulumu kinye, konopu kake teli ulumu kinye, konopuni pilkolio Goteni kanopa keri karomo ulu keri te konopuna naa peremo lepamo ningo pileli ulumu kinye, aku tepa konopu penga peremo imboma andi yando enongano konopu mondoli ulumundo nio. Imbo mare aku tepa konopu pengama naa pepili molko aku ulu pengama tiye kolkolio we unguma kau ningo keke lepo toromele. Mosesini Gotenga ungu manema pilipelie yando nimbe tirimu ungu manemanga mane tilima molamili nimele nalo ungu manemanga puluma naa pilko, enge ningo mane tingeindo nimele ungumanga puluma eno enongano wamongo naa pimele.
Lino pimolo, Mosesini ungu mane tirimuma tumbi tipo pilipo, aku ungu manemanga ungu pulumu wambo pilipolio ulu akuma temolo kinye aku ungu manema paa penga nimbo pimolo. 9-10 Kano ungu manemani kongono wamba tepa teremo mele kanopolio kano ungu manema penga nimbo pimolomunga ungu pulumu i tepa: Goteni ungu manema timbeindo tumbi tiko moromele imboma pilko teangei nimbe naa tirimu. Ungu manema toko tangondoko kalambo naa nimele imboma kinye, Gotenga unguma liko umbulu tiko ulu pulu kerima teremele imboma kinye, Gotenga unguma naa pilko ulu kake telima pilipo teamili naa nimele imboma kinye, imbomani enonga anupili lapali toko kondoromele imboma kinye, imbo lupema toko kondoromele imboma kinye, wapu ulu kerinale teremele kango imboma kinye imbo yuma kinye, kombu awili Sodom imbomani iyema enongano ulu kerinali teko amboma enongano ulu kerinale teringi mele teremele imboma kinye, maket tepo kou liemili ningo imboma wapu ltimele imboma kinye, kolo toromele imboma kinye, kotena pungo paimbo nimolo ningo panjikolio kolo toromele imboma kinye, Gotenga unguma pilipo Kraistinga imboma teko molangei nimbo mane tirimolo ungu lupema peya topa tangondambaindo ulu kerima teremele imboma pali kinye, Mosesini tirimu ungu manemani aku ulu teko kenjiko moromele imboma pali nokopili nimbe Goteni aku ungu manema pepili nimbe, nimbe panjirimu. 11 Gotenga unguma mane tirimolo ungu paimbo akuma Goteni na kanopa lipe andoko ningo tiwi nimu unguma kinye tendeku tipe. Aku ungumu paa penga olandopamu, imbi paa peremo Gotenga ungumu.
Poloni Goteni yu kondo kolorumumunga paa tereno nimu ungumu
12 Jisasi Kraist linonga Awilimuni i kongono tenderomunga engemu tipelie na kanopa penga pilipe nanga kongonomu tiye naa kolopa manda tepa kondombalo nimbe pilipelie i kongono tenderomu na tirimumunga yundo paa tereno nio. 13 Paimbo oi yunge imbimu lipo ungu taka tondopo, yunge imboma kinye opa pule topo mindili tipo topo kondomboi teru nalo yu paimbo Gotenga Malo molopa Goteni lino nokopili nimbe maina lipe mundurumu iye Kraist molorumu mele pilipo tundupolio, Yunge temanemu toringi pilipolio kolo toromele nimbo enge nimbo pileru mele akumu tepo alowa terumunga yuni kanopalie na kondo kolopa mindili nopili naa nimu. 14 Nalo na Kraist Jisasi kinye peya tapu topo molorumbulu kala linonga Awilimuni na paa we kondo kolopalie, Yu paimbo nimbo enge nimbo pileli ulumu kinye imboma konopu mondoli ulumu kinye kano uluma Awilimuni na olandopa tirimu.
15 Lino ulu pulu keri terimulu imboma lipe tapondopa, mindili nolemala aulkena wendo lipe yu kinye peya molopo kondomolo aulkena lipo mondambo nimbe Goteni maina lipe mundurumu iye nomi Kraist Jisasi maina mainye orumu. Aku ungumu paa paimbo ungumu. Imbomani konopu talo naa pepili paimbo aku ulu terimu ningo paa enge ningo pilko ipuki tiengei. Aku temolo kinye paa ku naa pemolo. Ulu pulu keri teremele imbomanga na ulu pulu keri awini terumunga na iye kiyendomu, 16 nalo Kraist Jisasini imboma konopu topele tangei nimbo taka lipo nokopo ame topili moro. Nani paimbo manda lipe tapondombalo ningo pilinge imboma paimbo kondo kolopo lipo tapondopo, koinjo molko kondoko kau punge ulu pulumu timbo ningo kanangei nimbelie na ulu pulu keri olandopa teru iyemu oi kondo kolopa tepo kenjirumunga mindili naa namboi nimbelie lipe tapondorumu. 17 Waliwalima molopa kau puli iye nomi kingimu molopa, kolopa naa kolombalo iyemu molopa, imbo teni naa karomo iyemu molopa, yu tendekumu kau paimbo Gote molopa, aku tepa moromo Gote yu kau imbi ola molopa enge pepa, enge nimbe pa tepa, aku tepa molopa kau pupili! Aku tepa kau nemili! I paa.
Poloni Timotindo ulu kerima kamukumu mainye pupili ningo enge ningo kongono tewi nimu ungumu
18-19 Nanga malo Timoti, Gotenga ungu nimbe mundulima Kraistinga iye mareni nu molonio mele oi ningo tiringi mele pilipolio nu paa aku teko teani nimbo, nimbo tiro. Imboma teko kenjiko molangei nimele melema mainye pumbe, Gotenga kongono tepo moromu enge pepili kani enge nimbo opa paa teambo ningolio nu tenio mele oi ningo tiringi ungu akuma pilko liko teani. Kraist Jisasi paimbo ningo enge ningo pino mele tiye naa kolko, waliwalima konopuni pilkolio Goteni kanopa keri pimo ulu keri te nanga konopuna naa peremo. Kongono teroma tepo kondoro lepamo ningo pilko molani! Aku ulu talo ambolkolio opa enge nimbo teambo ningo nu tenio mele oi ningo tiringi ungu akuma paa pilko liko teko molani. Imbo mareni kano ulu talo naa tembo kinye ulure molo ningimunga, nona andoli sip te nona kou teni topa bulturumo kinye paa keri lemo mele kano imboma aku teko mele ipuki teringi ulumu paa kamukumu keri lierimu. 20 Aku teringi imbomanga iye Himeneus kinye Aleksander kinye elo aku teko teringili kinye kuromanga nomi Satan mindili lipe tipili mindili nangili niu. Aku teko molko kenjikolio Gote ungu taka tondoko yunge imbimu teko naa kenjingele mele pilengili nimbo aku ulu teru.