Hibru Imboma Pipia Topa Tirimu Ungumu
Hibru
I Ungu Torumumunga Ungu Pulu Mare
Imbomani i pipia torumu iyemunga imbi naa liko manjirimele.
I pipia torumu iyemuni Jisas yu oi imboma kinye enselemanga olandopa moromo iyemu nimbe mane tirimu. Jisas kau melema palinga olandopa moromo iyemu lipo manjemili nimbe i pipia topa panjirimu. Israel imbomanga Gote popo tondoli uluma pali Jisas yuni aku uluma ara tipe pora tirimu. Yunge terimu ulumu Israel imbomanga uluma pali ongondorumu.
I ungu kambu torono wali oi teringi uluma liko manjikolio Jisas yu kau ulu tukumemu terimu ningo yu imbomanga kinye melemanga pali olandopa iyemu ningo ipuki tieni nipili!
Mulu Kombuna Enselema Mandopa Moromele, Jisas Olandopa Moromo Ungumu
1
Kinye, Gotenga Maloni lino Gotenga unguma nimbe tirimo
1 Paa koro oi Goteni waliwalima lino Hibru imbomanga ara kaue kamendo yunge ungu nimbe mundulima ningo tiringi profet iyemani yunge ungu mane tirimuma pilkolio linonga ara kaue kame ningo tiengei nimbe lipe mundurumu. Imboma paa pilengei nimbe lipe tapondorumu wali kano iyemani ulu awini liko ondoko ungu awini ningo tiringi. 2 Nalo i peyalime waina Gote Yunge Maloni lino yunge unguma nimbe tindipili nimbe maina mainyendo lipe mundurumu. Aku Ungulumu Goteni nanga melema kamukumu yu timbo, lipe noipe molombalo nimu ungulumu. Kano Ungulumu yu Goteni oi mulu mai melema tembo nimu melema pali terimu iyemula. 3 Enamu pa teremo mele aku tepa Malo pa teremo akumuni Gotenga pa enge nimbe teremo pa telimu lino lipe ondorumu. Gote moromo mele Malo aku tepa moromo. Malonga ungu engemuni melema pali tepa enge tirimo. Yuni linonga ulu pulu kerima omba mainye pupili, lino imbo kalaro naa mololima molangei nimbe kongono tepa pora tipelie melema pali nokombaindo mulu kombuna Iye Nomi King Awili Olandopamunga imbo kindo pumbe moromo.
Gotenga Malo paa olandopa moromo, enselema mainyendo moromele aku ungumu
4 Aku terimuna Lapani yu nanga Malo imbi tirimuna aku imbi mololimu paa olandopa ltemo, mulu kombuna enselemando imbi lepa Gotenga kongono tendeli iyema nimu aku imbimu paa mainye, aku tepa mele yu paa olandopa enselema yunge maindo moromele.
5 Goteni nimbeindo:
Nu nanga Malo, kinye na nunge Lanie, (Sng 2:7)
nimu mele ensel tendo walite aku tepa nimuya? Aku molo. Yunge Malondo kau aku ungu nimu. Molo yuni nimbeindo:
Na yunge Lapa molombo, yu nanga Malo molombalo, (2Sa 7:14)
nimu akumu ensel tendo nimuya? Aku molola. Malondo kau aku ungu nimu. 6 Yundo ungu te kape nimula. Yunge ungulu komomu maina lipe mainyendo mundupelie Goteni yunge enselemando nimbeindo:
Ungulumu kapi ningo yunge imbi liko ola mundeio, (Lo 32:43)
nimu. 7 Enselema teremele ulu lipe manjipelie i tepa nimbe peremo:
Yunge enselema poporomemu mele molko, yunge kongono tendeli iyema tipe mele moromele. (Sng 104:4)
8 Nalo Goteni Malondo nimbeindo:
Awilimu, nu waliwalima iye nomi kingimu morono mele molko kau punio.
Nuni ulu tumbi nilima teko imboma nokonio.
9 Nuni ulu pulu tumbi nilima undukana konopu mondorono.
Ulu pulu kerima konopu naa mondoko paa naa tereno,
akumunga nunge Goteni nu iye nomi king molko melema pali nokani nimbe kanopa lipelie nunge imbomanga pali imbi paa olandopamu nu tirimu.
Nu aku tepa tepa kondorumumunga imbomanga pali tono koromele mele
Goteni nu tepa tono kondombalona nu paa olandopa tono kolonio, (Sng 45:6-7)
nimu. 10 Goteni Malondo ungu te peya nimbeindo,
Awilimu, oi pulu polko nuni maimu enge nimbe lepili teko, nunge kimuni mulumu kinye akuna ltemo melema kinye wamorunu.
11 Aku mele talo pora nimbelo, nalo nu waliwalima molko kau puruno.
Wali pakolima pingi pumbe tungu nimbe keri ltemo mele mulu mai talo aku tepa bembo nimbelo.
12 Imbomani wale pakoli tulema toko ltengeindo kimburumele mele nuni mulu mai talo aku teko kimbunio.
Wale pakoli te lupe panjingeindo kolo wangoromele mele nuni aku teko aku mele talo kolo wangonio.
Nalo nu nunu aku teko alowa naa teko, morono mele wali walima molko, waliwalima molko kau punio, (Sng 102:25-27)
nimu. 13 Goteni oi walite nimbeindo,
Nunge opa pulema nuni nokani nimbo pele eno topo mainye mundumbo kani i teli oi nu na kinye peya kopu tepo iye nomi talo molambili
nanga imbo kindo ongo molani, (Sng 110:1)
nimu aku ungumu ensel tendo nimuya? Aku molo. 14 Aku ungumu enselemando naa nimu lemo enselema naimeleya? Enselema mini mele molko Gotenga kongono tendelima. Akuma Goteni yu peya kamukumu kopu tepo molamili waio nimu imboma liko tapondoko nokangei paio nimbe lipe mundurumo enselema.