Ŋacmêtê tau
Ŋac tokauc teŋ keto buku Ŋacmêtê Tau tonec. Eŋ kêkip ŋamalacnêŋ lêŋ nomŋa dambê to gejo-gêjac ŋam sa. Eŋ kêtap sa gebe lêŋ tonaŋ kêlênsôŋ ma biŋgêdêŋ masi. Eŋ kêsaê gebe ŋamalac sêjam nêŋ kôm tosê gogeŋ, tec gêlic gebe ŋamalacnêŋ lêŋ nomŋa ŋanô masi, gêŋ ŋaôma. Ênê kauc kêsa kêpi Anôtô, taŋ gêjam gôliŋ ŋamalacnêŋ têm naŋ, nê lêŋ atom. Eŋ kêpô lêna kêtu biŋ tonaŋŋa, mago eŋ gêjam la lau gebe sênam kôm ŋajaŋa to têtu samuc moasiŋ, taŋ Anôtô kêkêŋ gêdêŋ êsêac naŋ, êtôm têm, taŋ gêjac êsêac ŋawae naŋ.
Ŋalô taŋ sêjaliŋ sa aŋga buku tau ŋamôkêlatu 12 naŋ, kepeŋ biŋ tonaŋ, gebe Anôtô kêkêŋ gêŋ samob ŋanoc su. Ŋalô ŋagêdô gêlêŋ biŋ aêac gebe tasa nêŋ lêŋ nomŋa tokauc ma tatu samuc nêŋ lêŋ ŋaŋêŋ ŋajam êtôm têm, taŋ tamoa nom naŋ.
Biŋ taêsam, taŋ ŋac tokauc taê gêjam naŋ, kêsa aŋga nê ŋalêlôm ŋawapac to ŋatutuc. Mago lau andaŋgeŋŋa sêkêŋ ênê buku tonec kêsêp Bibolo ŋalêlôm gêwiŋ. Tec gêwa sa gebe biŋ takêŋ gêwiŋŋa, taŋ gêc Bibolo ŋalêlôm naŋ, kêkêŋ ŋasawa gêdêŋ lau tonêŋ ŋalêlôm ŋawapac to lau-sê-gowaga amboac tonaŋgeŋ. Lau taêsam sêsaê buku tonec ŋabiŋ amboac tasalakatu teŋ ma sêlic tauŋ nêŋ ŋakatu kêsêp buku tonaŋ ŋabiŋ. Go êsêacnêŋ kauc kêsa gebe Bibolo, taŋ kêtôc gêŋwapac tokaiŋ-tokaiŋ gêdêŋ ŋamalac naŋ, kêkêŋ ŋanô teŋ, taŋ ŋamalac sêkêŋ mateŋ e sêjala nêŋ lêŋ nomŋa ŋatêpôê ŋanô naŋ.
3
Gêŋ samob toŋanoc
Gêŋ samob ŋanoc gêc gêdêŋ-gêdêŋgeŋ. Ma kôm samob, taŋ sêjam sêmoa umboŋ ŋalabu naŋ, ŋanoc gêc amboac tonaŋgeŋ.
Teneŋi sêkôc aêac ŋanoc gêc, ma tamac êndu ŋanoc gêc.
Tasê gêŋ ŋatêm gêc ma tajoŋ ŋanô sa ŋatêm gêc.
Sêjac ŋamalac êndu ŋanoc gêc ma sêgôm lau ôliŋ ŋajam êsa ŋanoc gêc.
Danseŋ gêŋ suŋa ŋanoc gêc ma takwê sa ŋanoc gêc.
Tataŋ taŋiboa ŋanoc gêc ma taômac ŋanoc gêc.
Tanam abec ŋanoc gêc ma tatê wê ŋanoc gêc.
Tasac poc êliŋ-êliŋ ŋanoc gêc ma tajoŋ poc sa ŋanoc gêc.
Tamoa dawiŋ tauŋ ŋanoc gêc ma tatu mêtê tauŋ ŋanoc gêc.
Dansom gêŋ ŋanoc gec ma tanam gêŋ sapu ŋanoc gêc.
Tanac gêŋ sa ŋanôc gêc ma tajaiŋ gêŋ ŋanoc gêc.
Takac gêŋ êŋgic ŋanoc gêc ma tasi gêŋ êpi tageŋ ŋanoc gêc.
Tanam tauŋ tôŋ ŋanoc gêc ma tasôm biŋ ŋanoc gêc.
Têntac êwiŋ tauŋ ŋanoc gêc ma têntac endec tauŋ ŋanoc gêc.
Tanac siŋ ŋatêm gêc ma daê wama ŋatêm gêc.
Koleŋwaga oc kêtap ŋanô ondoc sa gêjô nê koleŋ. 10 Aê galic gêŋwapac, taŋ Anôtô gêu gêsac ŋamalac latuŋi gebe sim tauŋ suŋa. 11 Eŋ kêkêŋ gêŋ samob ŋajamanô gêdêŋ nê noc. Eŋ kêkêŋ kêsêp ŋamalac ŋalêlôm gebe sênam aweŋ su sêŋgôŋ mateŋ jaliŋa, mago ŋamalac kêtôm gebe êkip Anôtônê kôm, taŋ gêjam gêdêŋ taŋ gêjac m kôm tau e gêdêŋ gêŋ samob ŋatêku êsuŋa naŋ, ŋam sa atom. 12 Aê kajala gebe ŋamalac nêŋ gêŋ ŋajam kêlêlêc gebe sêmoa totêntac ŋajamgeŋ ma têtu samuc moasiŋ tokaiŋ-tokaiŋ êtôm nêŋ bêc sêmoa nomŋa teŋ gêc atom. 13 Ma kajala teŋ gebe Ŋamalac sêniŋ gêŋ to sênôm gêŋ ma sêôc gêŋwapac totêntac ŋajamgeŋ naŋ kêtu Anôtônê moasiŋ teŋ amboac tonaŋgeŋ. 14 Ma aê kajala gebe gêŋ samob, taŋ Anôtô gêgôm naŋ, oc ênêc endeŋ tôŋgeŋ. Ŋamalac têtôm gebe sênac têku gêŋ teŋ atom ma têtôm gebe sêkôc gêŋ teŋ su atom amboac tonaŋgeŋ. Anôtô kêmasaŋ gêŋ tau amboac tonaŋ kêtu ŋamalac têtêc eŋŋa. 15 Gêŋ taŋ kêsa galoc naŋ, gêdêŋ andaŋgeŋ kêsa sugac. Ma gêŋ taŋ oc mêŋêsa naŋ, gêdêŋ andaŋgeŋ kêsa su amboac tonaŋgeŋ. Ma Anôtô gesom gêŋ, taŋ gêjaŋa su naŋ kêtiam.
Gêŋ alôb-alôb gêc nom
16 Ma aê galic gêŋ teŋ aŋga oc ŋalabu amboac tonaŋ gebe Gêŋ alôb-alôb gêc gamêŋ, taŋ gêjac biŋgêdêŋ ŋawae naŋ, ma gêŋ alôb-alôb gêc gamêŋ, taŋ gêjac mêtôc gêdêŋ ŋawae naŋ. 17 Tec aê kasôm gêc ŋoc ŋalêlôm gebe “Anôtô oc êmêtôc lau gêdêŋ to lau sec êtômgeŋ gebe gêŋ samob ŋanoc gêc ma kôm samob ŋanoc gêc amboac tonaŋgeŋ.” 18 Aê kasôm gêc ŋoc ŋalêlôm gebe Anôtô gêgôm gêŋ tonaŋ gebe ênsaê to êtôc êndêŋ ŋamalac e sêjala gebe êsêac têtôm bôc. 19 Gebe ŋamalacnê lêŋ kêtôm bôcnê. Lulugeŋ sêmac êndu kêtômgeŋ. Lulugeŋ sêwê kaiŋ aweŋjaô tageŋ. Ŋamalacnê gêŋ ŋajam kêlêlêc bôcnê teŋ gêc atom. Gêŋ samob gêŋ ŋaôma. 20 Samob sepeŋ gamêŋ tageŋ. Samob ŋam kêsêp kekop. Ma samob têtu kekop êtiam. 21 Ŋamalac ondoc kêjala kêtu tôŋ gebe ŋamalac katu oc êpi lôlôc ma bôc katu oc êsêp nomlêlôm êna. 22 Amboac tonaŋ aê galic gebe gêŋ ŋajam kêlêlêc ŋamalac ênam nê kôm totêtac ŋajamgeŋ teŋ gêc atom gebe gêŋ tonaŋ gêjac eŋ ŋawae. Asa oc êtôm gebe êndôŋ eŋ e êjala gêŋ, taŋ mêŋêsa êtu ŋamu naŋ.