Lewitikus
SÊJAM SAKIŊ ANÔTÔ ŊAŊAGÔLIŊ
Lewitikus nec dabuŋwaga, taŋ sêsa aŋga Lewinê gôlôac naŋ, tauŋ nêŋ buku. Ŋabiŋ ŋagêdô tec kepeŋ dabuŋwaga tau solop, go ŋabiŋ ŋagêdô kêpi nêŋ sakiŋ tokaiŋ-tokaiŋ naŋ. Kôm tonec gêjac dabuŋwaga tonaŋ ŋawae gebe sêlic lau Israel laŋgwa tônê nêŋ om ma têndôŋ Anôtônê biŋ êndêŋ lau tau gebe sêsa nêŋ lêŋ to aweŋ êôc Anôtô sêsô biŋ tau ŋalabugeŋ.
Biŋ Anôtô dabuŋŋa kêtu ŋalôtênasêga gêjam gôliŋ buku tau gêjam aucgeŋ. Amboac tonaŋ ŋagôliŋ tonec gêdêŋ Anôtônê lau Israel gebe sêlic nêŋ om to sêsa nêŋ lêŋ ŋaŋêŋ, ec sêmbiŋ tauŋ tôŋ tamiŋ Israelnêŋ Anôtô Dabuŋ tau endeŋ tôŋgeŋ.
Buku tau ŋasêbu lemeŋteŋ gebe
1. Môkêlatu 1–7 Biŋsu da to dajaŋa.
2. Môkêlatu 8–10 Sêjam mec Aron to latui gebe sênam kôm dabuŋwagaŋa ŋamiŋ.
3. Môkêlatu 11–15 Ŋagôliŋ lau sêŋgôŋ selecŋa to sênam dabuŋ tauŋŋa.
4. Môkêlatu 16 Omsêga Wama ŋagôliŋ.
5. Môkêlatu 17–27 Ŋagôliŋ gêdêŋ lau gebe sêsa nêŋ lêŋ to sêlic nêŋ om sênam dabuŋ tauŋ ŋapep.
Ŋalô towae, taŋ kêsêp buku tonec ŋalêlôm naŋ, teto gêc 19:18. Apômtau Jesu kêsam ŋalô tau gebe Biŋsu kêtu luagêcŋa, taŋ kêtôm biŋsu kapôêŋ ŋamataŋa. Biŋsu tau gebe “Têmtac êwiŋ lau wacbaŋ aôm amboac têmtac gêwiŋ taôm.”
1
1:1–15:33 Biŋsu, taŋ gêjam gôliŋ lau Israel nêŋ sakiŋ omŋa ma nêŋ lêŋ sêkêŋ da to dajaŋa naŋ, kêsêp môkêlatu 1–7. Êsêac sêjam mec Aron to latuagêc ŋamiŋ kêsêp môkêlatu 8–10. Môkêlatu 11–14 gêwa biŋ tatu selec to biŋ ŋatêmuiŋa sa. Bôc, taŋ lau Israel têtôm gebe sêniŋ to bôc, taŋ sêjac jao gebe sêniŋ atom naŋ, nêŋ ŋaê kêsêp môkêlatu tonaŋ amboac tonaŋgeŋ. Biŋ ŋagêdô gêwa lauo, taŋ sêkôc ŋapalê naŋ, nêŋ lêŋ têtu selecŋa sa. Ma biŋsu ŋagêdô kêkanôŋ lau tokamocbôm ma gêwa êsêacnêŋ lêŋ têtôc tauŋ êndêŋ dabuŋwaga ma dabuŋwaganêŋ kôm sêwaka lau tonaŋ saŋa sa.