Hibru
Ripia Agaa
Go Hibru agaame Kristen onaa meda nimuna kone rula yae gimisimi-daa go onaanu raba mulalo agaa tisa. Gore nimu rabuaniaawa kedaa kasimi. Go bukmiri nimuna kone rula yae puri mapalaalia. Gote-me Yesu Krais madaa pisa kogonona page agaa sa. Krais padanemere Gote-na epe ae mea waata.
Agaa adaa repo madaa agaa gupa sa: 1) Yesuri ora Gote-na Si pia. Yesu nipu go su amaa pa aasa raburi kedaa adaapu rua radaa adaapu nisa. Goaene Gote-me Yesuri ora onaa rayo raba minalo riri-nane mapiraasa (2.10). Goa pua Yesumi Profet aanu-para ensel-nupara Moses page ora rabuaaya. 2) Gote-me nipu ora eta irini aa-rupa mapiraasa. Juda aanuna eta irini aa page ora rabuaaya. 3) Yesuri ora eta irini Aa Mudu pia-pulu nipu madaa kone rulae onaa rayo mada wala mealia. Moses-na rekena agaame tare Yesumi pisa kogonona ora piksa-rupa ta.
Go pepamere onaa kone rulae yae puri mapalaawa abade Israel onaana puri pane kone rulae yae madaa agaa adaapu ia (sapta 11). Gupa sa: kedaa epalia page pinawa. Nimina kone rulae yae waru ripinua omalepape. Yesu piri pua nipuna piae ratalepape. Radaa-para kedaanu apo ritimiri pakeatepape sa.
Robonu gupa adamina:
Yesuri Gote-na puri (1.1-3)
Yesumiri ensel-nu page maoge yaaya (1.4–2.18)
Yesumi Moses Josua lapo rabuaniaaya (3.1–4.13)
Yesumi ofa miru irape aanu maoge yaaya (4.14–7.28)
Yesumi waru agaa-daa maoge yaaya (8.1–9.28)
Yesumi sipsip-na yaapi maoge yaaya (10.1-39)
Kone rulae yae penaame ina (11.1-12.29)
Gote madaa kone sua pora pamualepape (13.1-19)
Onaanu rabaminalo beten sa (13.20-21)
Pora po agaa (13.22-25)
1
Gote-na Simi niaa agaa laguaaya
1 Abade rana adaapu kone rado madaare Gote-me niaana aapa akuanu agaa lakesa rabu Gote-na agaa lakene aanumi agaa rado rado adaapu lakesimi. 2 Goa simi pare abia page ora orope di rabu Gote nipuna Simi niaa nipuna agaa laguaaya. Gore Gote-na Si nipumi go su oyae rayo warisa. Goa pua su yaa perekealia rabu Gote-me nipuna Si oyae rayo minalo mapiraasa. 3 Simiri Gote nipuna epe paana puri mea waatea. Nipuri Gote-na kone nona pi pirua nipuna puri pane agaame nipuna warini onaa rayo-para oyaenu rayo-para puri mapalaaya. Nipumi onaanuna wae yaenu mea rubape kogono dia naloa nipu yaa-para pua Gote-na popo ki-nane pua piruaaya. Gote-re ora oyae rayona re ya-pulu nipu padane go-rupa piruaaya.
Gote-na Simiri ensel-nu maoge yaaya
4 Gote-me nipuna Naaki su amaa mea rapaasa-daa go Naaki nipuna bimiri ensel-nuna bi page maoge yao sa. Go-rupa abade aaraame Si lakeloa nena bimi ensel-nuna bi maoge yoa sa. 5 Siri ora mupaa naaki padane ya-pulu abade Gote-me ensel medaloma gupa nalekesa:
Nere nina Si pi-daa nalakesa.
Abiare niri nena Aapa pitualo enselnu nalakesa.
Niri nipuna Aapa piralua. Nipuri nina Si piralialo ensel-nu nalakesa.
6 Dia, pare abade Gote nipuna mupaa naaki go su amaa rapatalo pisa rabu nipumi goa sa: Nina ensel-numiri go naakina bi minasaalimina sa. 7 Goa sa pare nipumi mo ensel-nu gupa lakesa:
Go ensel-nu aipapulu po ripu nona piane mea repaato.
Goa pua nina kogono pi ensel-nu repena sulaa-rupa mapiraayo.
8 Goa loa Gote-me nipuna Naaki gupa lakesa:
Nena surubape yaenu Gote piri-para oro yaalo pa su aalia.
Nena surube suri onaanumi ora redepo ne kone sua waru surubalimi.
9 Naa redepo ne kone madaa ora waru pedo pu raaname omo aaye.
Goa pea pare wae konere ora gimi ome.
Goa pea-pulu ni ora nena Gote-me neme abade ne mapiraasude.
Goa pua nena epe kogono aa yagonu epe bi kate rabu raaname omeme.
Goa pisi pare nena bi minasaawa raana omape kone gisa rabu nimuna bi maoge yaasa.
10 Goa pua Si madaa Gote-na agaa i buk madaa gupa sa:
Aa Mudu abade neme go su waria sogo yaa page warisu ia.
11 Go su yaa lapore ora nu piri-rupa kalepe pape pua dia yalia.
Yapare nere oro yaalo kagaa piraama laama pali.
12 Goa pua aanumi mamina mea koba pimide-rupa
neme go su yaa lapo kobapu mua madia yaali.
Goa puare aanumi maarae yae koloa alo paeme-rupare go su yaa lapo kagaa perekealia.
Goa pea pare nere oro yaalo pi-rupa agu pa piraama puare ne ogae-rupa napirali.
13 Abade Gote-me ensel-nu page goa nalakesa:
Nimiri nina popo ki-nane epa piralepa lo nalakesa.
Goa puare nimina iaanu kibu rolo-para mapiraalua lo nalakesa.
14 Go agaare Si padane mada lagisa pare go ensel-nu nimuri pa wasupanu nona piane mapiraasa. Nimu Gote-na kogono pinalo mapiraasa. Gote-me ensel-nu oro yaalo kagaa piruape onaanu raba minalo mea rapaaya.