Rom
Ripili Agale
Pol-me go pepa lisare nipu mo Rom su-para piri Kristen enaalinu adola pope raaname komoma lisa. Nimu raapu pa rudupu yapi di-na piruma mo Spen su-para Epe Agale mogeaata pulalo pisa. Go pepa madaare Pol-me lapaoma lagiala. Gore Keriso-na Epe Agale-para Yesu raleme enaalina pi-aenu madaa lagiala.
Riri-nanere Pol Rom adare-para piri Kristen enaalinu-para epe yapi di lo rapaata. Go puma nimu madaa neme Gote-me nimi raba minalo beten lo aayo. Werepe go pepana agalere go-rupa lisa: Kone rulae elena pora madaare naa Gote-na le agalere redepo le enaalinu opalima. (1:17) Pol-me gu-rupa lisa: Enaali raayo, Juda ruru page pa ruru medanu page, koeyae pi enaalinu yaade. Go pea-le Gote-me nimi kodome komoma nimu wala mina lisa. Ali meda Yesu Keriso kone rulalia-daare Gote-me nipu wala mealia. Go puma nipu Gote-na adami ali-rupa piruma ora Yesu Keriso-na ame piralia.
Gore Gote-me ali meda wala mealia-daare nipuna lo robaa kagaa opea. Gote nipu raapu piruma nipuna Holi Spirit page nipu madaa rubitabea. Go pea-pulu koe-para komape kone laapome nipu surubuma nipu rabuaape puri meda nasalipi. Go sapta 5 madaa puma sapta 8 madaa ma-dia yaaliare Pol-me Gote-na rekena agalena re-para Holi Spirit-na puri Yesu Keriso kone rulae enaalinu maa waalea-rupana agale lisa.
Go sapta 9 madaa ipuma sapta 11 madaa ma-dia yaaliare Pol-me nipuna kedaa adaa medana remaa lisa. Pol-re Juda ruru yaade. Go enaali rururi abalade Gote-me nipuna enaali-rupa mapiraasa. Yapare adaapumi Yesu koau waalisimi. Pa ruru meda-nane epe enaalinuri Yesuna disaipel pirisimi pare Juda rururi ora dia. Pol-me gu-rupa lisa: Juda alinu nimuna koeyae peme lisa. Go yapare Pol-me gu-rupa kone wisa: Werepe Juda enaali page Yesuna ruru piralimi kone wisa.
Pol-me agale ma-dia yaatalore Kristen enaalina pape-ae madaa remaa lisa. Yago raaname komapena agale adaapu lisa. Gote-na kogono papena page agale adaapu lisa. Go puma gavman-na rolo-para piruma yago raba meapena page agale lisa.
Robonu gu-rupa adamina:
Go buk-na re madaa agale (1.1-17)
Enaali raayome pupitagi neme (1.18–3.20)
Gote-na kagaa piraoma laari poape pora (3.21–4.25)
Gote-me naa ma-redepo yaasa (5.1–8.39)
Gote-me Israel enaali nipuna loma mada misa (9.1–11.36)
Kristen enaalinuna epe pora (12.1–15.13)
Pol-me go agale mana ma-dia yaare enaalinu-para abi patalepape lisa (15.14–16.27)
1
Pol-me Rom su-para piri enaalinu-para pepa rapasa
1 Ni Pol-re Yesu Keriso-na aposel kogono ali piruma go pepa luma rapaayo. Gote-me nipuna Epe Agale mogeanolo yaaloma ni mapiraasa.
2 Go Epe Agalere abasade Gote-me ora gialua lisa-pulu nipuna agale lakale alinumi Epe Buk madaa lisimi. 3 Go Epe Agalere Gote-na Si madaa buk lu wisimi. Go Si Yesu Keriso-re naana ora Mudu Ali pia. Yesu su kamaa madisa rabu Mudu Ali Devit-na ruru-para pirisa. 4 Nipu Gote-na epe kone su pirisa-pulu Gote-na adaa purimi tapa-para marekaasa. Go pea-pulu naame nipu ora Gote-na Si ora pia-daa adema. 5 Yesumi ni raba minalo Gote-me ni aposel kogono ali mapiraasa. Go puma neme su raayona piri enaalinu-para Gote-na agale waru pagoma Yesu madaa kone rulaliminalo mogeaayo. 6 Go pea-le nimi Rom su-para piri enaalinu page Gote-me nimi Yesu Keriso raapu komea-para piraminalo ni yaaloma mapiraasa.
7 Go pea-le neme nimi Rom su-para piri enaalinu-para pepa lu rapaato. Gote-me nimi madaa ranaame komoma nimi Yesu Keriso raapu mapiraalalo yaalisa. Go puma naana Aapa-para naana Mudu Ali Yesu Keriso laapome nimi epe raba meape kone-para kuma pi kone-para gina.
Pol-me Gote-para ora pili loma beten lisa
8 Gore su raayona piri enaali raayome nimi Yesu madaa kone rulaeme-daa pageme. Go pea-le neme nimi madaa Yesu Keriso-na bimi Gote-para beten loma ora pili loaayo. 9 Neme Gote-na Si madaa Epe Agale mogeaayo rabu neme kone waru suma nipuna kogono moge aayo. Go puma Gote-me ni adea-pulu neme ora agale lagianolo adea. Neme beten le rabu ade abuna nimi makuaaoma beten loaayo. 10 Go puma Gote-me nipuna epe kone suma pora maa waalea-daa neme nimi adolalo epalua. Go pea-pulu neme Gote-para beten loaayo. 11 Gore neme Gote-na agaleme puri nimina lo robaa mapalaalua-me neme nimi ora adola epalua. 12 Nana-daa dia, yapare naame epe raba meape kone ropo pamina. Go puma ni kone rulaeme nimi raba muma puri gialua rabu nimimi go kone komea-rupa salimina.
13 Naa ame balinu pagalepape. Rana adaapu nimi adolalo pe pare ele medalomame ni pa saapia. Neme nimu ruru rado raba misua rabu nimumi Gote madaa kone rulasimi-rupare nimi page go-rupa raba mulalo pi. 14 Gore neme enaali raayo kodome komoma enaali raayo raba mulalo pi. Go puma ora epe-rupa piri enaalinu page raa-para piri enaalinu page kone makuaae enaalinu page kone nasalimi enaalinu page raba mulalo pi. 15 Go pea-le neme nimi Rom su-para piri enaalinu page Epe Agale mogealuame pi.
Epe Agalere Gote-na puri wia
16 Neme Gote-na Epe Agale madaa kone komea wi-pulu yala napotea. Go Epe Agale Gote-na puri wia-pulu abala Juda enaalinumi page wala pa ruru radonu page go agale madaa kone rulaoma nimu ade abuna kagaa piramala palimi. 17 Go Epe Agalemere Gote-me enaalinu ma-redepo yainalo go pora maa waalea. Gore ririna pu piralimi-daare Gote-na agale lo robaa-para maa saabaoma redepo le enaali piralimi. Gote-na buk-mi gu-rupa lea: Gote-me enaalinu ma-redepo yaaliade enaali raayomere Gote-na agale lo robaa-para maa saabaoma ade abuna pa kagaa piramala palimi.
Su kamaa piri enaali raayome pupitagi noma Gote koau waalisimi
18 Gore yaa-para piri Gote-mere nipuna rono pagape kone pupitagi ne enaalinu madaa mea waalea. Go enaalinumi koe kone saabaoma ora agale rabuaanaaeme-pulu Gote-me ora rono pagea. 19 Gote-me nipuna kone epe-rupa mea waalisa-pulu enaalinumi Gote epe-rupa mada adisimi. Gore Gote nipuna go kone pename mea waatea. 20 Gote-me abala su yaa wariaalaoma puma abi page enaalinumi Gote-na pagaa wi kone-para nipuna puri-para nipuna pa rado epe kone-para waru ademe. Enaalinumi Gote-na warili ele ademe rabu Gote nipuna puri page ademe. Go ademe-pulu naame Gote-na kone-daa na-adoma agale gu-rupa mada natema.
21 Nimumi Gote-na kone ademe pare nimumi Gote nipuna bi naminasaaoma go page nimumi nipu-para ora pili-daa nalisimi. Dia, gu-rupa nalisimi pare nimuna makeae kone suma nimuna pu robaa-para page ribaa pa yabaasa. 22 Nimuna konere naa ora makuaae enaalinu pima lisimi pare nimu ora makeae enaali-rupa pirisimi. 23 Nimumi ade abuna kagaa pirapede Gote-na bi naminasaaeme pare nimumi pa enaali-para yaa-para paaka-para mena-para yapa-para go ele warili elena bi minasaaeme.
24 Gore makeae enaali-rupa pimi-pulu Gote-me nimu giyainaloma nimuna pu robaa-para wi koe ele madaa peme. Nimuna yogale madaa koe yala polape kone suma peme. 25 Nimumi Gote-na ora agale giyoma makirae agale madaa pageme. Gote-re ele raayo warisa pare nipuna bi naminasaaeme pare nimuna pa warili elena binu minasaaeme.
26 Gote-na bi komea naame ade abuna minasaamina. Enaalinumi go-rupa peme-pulu Gote-me nimuna koe yala polapea-alenu pina giyesa. Go puma enanuri alinu raapu epe-rupa napitimi pare ena yagonu raapu u paitape kone suma peme. 27 Go page alinu medaloma page nimuna enanu giyoma pa ali yogonu raapu yala pi kone suma peme. Alinumiri yala pia peme-pulu nimuna go koe elenu madaa koae yoto mealimi.
28 Enaalinumi Gote makuaape kone giyeme-pulu Gote-me nimuna koe pugu pi-ainu pinalo giyesa. Gote-me nimu giyesa-pulu nimumi pupitagi pa no piruma nagiyisimi. 29 Go puma nimumi ora koe elenu raayo gu-rupa peme: Nimuna koe elenu puma koe konenu suma kepaame komape kone page suma koeyae peme. Nimumi kudipa kone page enaali lu makomaape kone page yada pape kone page makirae agale lape kone page enaali medaloma mabebolape kone page nimumi koeyae abulape kone page wimi. 30 Go puma nimumi enaali medalomana bi rabuaanaaoma Gote madaa ora koe kone wimi. Nimuri pugu pi kone suma rope pi kone suma nimuna agale adaapu leme. Nimuna konere naa ake puma koe kone rado meda salima pe kone suma nimuna agi aaraana agale page yokeme. 31 Go puma nimumi ena paake puma nimuna agale namogeleme. Go puma nimumi enaali medaloma kodome nakomalimi. 32 Gore Gote-na rekena agale madaare enaalinu go-rupa piralimi-daare mada komalimi. Go pea pare enaalinu koeyae pala pimi. Go page mada dia, pare nimumi koeyae peme enaali medaloma-para page raaname komeleme.