JOHANE I
Asia mâreŋ masunao Jesure kikefuŋ gurune gurune jurambiŋ. Eme Paulo â Petoro jahe hâmohapire Johanezi Efeso haeo ra juwec. Ira juhuc hae sâc mitiŋic ŋokac jurambiŋ jaŋe mamac ejarewec. Mamac ejarehuc juhame jara 23 tarawec. Eme papia I qâreŋkewec i ŋic i jaŋere biŋe qâreŋkewec hâcne. Petorozi qanaŋ jaha ŋic ijaha papia jajahec râe-jarewec. Eme papia-ticnezi mitire mumusifuc â bâbâsifuc fowec i hehâmowec. Hehâmohame šâhec moc fuawec. Ine ŋic moc šâŋene Kerinti eki kecšiŋuc muwec: Kristo â Jesu jahere fuŋne bârâwiŋ. Kristo e ŋic sahachec mi fuawec. ŋic omane moc juwec šâŋene Jesu e Johanezi Miti Opâ ruacneme erao Kristozi hapâ hawari iŋucne wahawec. Erâ Jesuhec juhame maripoŋko qazo ehapie Kristo e beherâ sambâŋko risie fewec. Burecdâŋ i hâcne haŋ bazo eme Johanezi hehâmoocte papia ši râe-jarewec.
Dâŋ qizecne kecšiŋuc qâreŋkewec: Wofuŋ e tatamac rune irec naru motecfâcne tatamackoa juhuc dâpâckonec wiac qikiŋnezo (gaŋ 1 â 2-1-17). Erâ dâŋ qizecne moc: Kristore râsifâc juŋgopieŋ jaŋe Anutu Mamac â Ŋokâ-ticne bârâwiŋ-jofazo muŋgopieŋ jaŋere sawaŋ qahuc juzo (gaŋ 2:18-29 â 4:1-6). Dâŋ qizecne moc: Anutu e maŋjauŋ sokawec jâmbâŋ eŋarewecte sâqocne geŋkehuc maŋjauŋ eec ezo (gaŋ 3). Erâ moc: Anutu e maŋjauŋ irec fuŋqizecne jukac eme nâŋâc âgofâc-nâŋec maŋjauŋ ejarepene Anuturao qacneocmu (gaŋ 4:7-21 â 5:1-4). Erâ moc: Jesu e Anuture Ŋokâ muhuc e manasiŋkenaŋmuo ine sisipiric hatao mi rahuc juju sanaŋ rauckenaŋmu (gaŋ 5:5-21).
1
Mumušâwe dâŋ
Fuŋnaonecteaŋ fowarehuc juwec, eme hazeczi manambeŋ â šâŋe-nâŋeczi honembeŋ, erâ hone dendeŋnehuc mezi ba bâuac ecnembeŋ, i juju sanaŋte Micdâŋ hâcne. Juju fârine fua tâcneme honembeŋte juju sanaŋte biŋedâŋ hâcne mufuarâ ŋazaeŋgopeneŋ. Juju sanaŋ i Mamactao fowarehuc juku nâŋerao fomârâŋkewec. Ine hâcne wiac hone manac embeŋ ijaha ŋoŋe wâc ŋazaeŋgopeneŋ. Ŋazapene manapie miriŋ-nâŋec fuame mocjaha junaŋte hâcne mueŋgopeneŋ. Eme miriŋ babac-nâŋec i Mamac â Ŋokâ-ticne Jesu Kristo erao qâsiŋnerâ foekac. Iŋuc fuame bubiaŋ-nâŋec fua ɋârâŋke taraocte papia ši hâcne qâreŋke-ŋarekopac.
Tatamacko juhuc sâqocnere hehesoŋ mi bajuzo
Dâŋ biŋe Jesuraonec kecšiŋuc manambeŋte ŋazaeŋgopeneŋ: Anutu e tatamac, dapâc i erao moc mi fohuŋgaŋkekac. Nâŋâc dapâcko juhuc Anuturao qohotaŋgopeneŋ mupene burec eocmu â dâŋ fâri qizecne mi bajunaŋmu. E jahacne tatamacko jukac iŋuc jaha wâc nâŋâc tatamacko junaŋmu, ine miriŋ babac sâcne enaŋmu, eme Ŋokâ-ticne Jesu Kristo ere soczi sâqocne-nâŋec šureme ɋaɋackenaŋmu. Nâŋâc sâqocne-nâŋec mi fokac, iŋuc munaŋmuo maŋnâŋec eatuckenaŋmu â dâŋ fâri qizecne maŋnâŋecko mi foocmu. Á sâqocne-nâŋec mufuanaŋmuo ine e mume sasanaŋ â tiŋne runezi sâqocne-nâŋec šurehuc bahac-nâŋec nâwoc rofâreocmu. 10 Nâŋâc sâqocne mi baeŋgopeneŋ, iŋuc mupene Anutu burecŋic mucneŋgopeneŋ eocmu â dâŋticne maŋnâŋecko mi foocmu.