TESALONIKE I
Tesalonike hae Makedonia mâreŋko ŋekac. Paulo e miti kiŋaŋ namba 2 raku Tesalonike haeo fisirâ sabata hombaŋ jahec â moc miti mume Judaŋic gâcne â qâpuc bocjaha jaŋe mana šakiembiŋ. Eme Judaŋic râŋgeŋne jaŋe irec aaric bâfuarâ qâpuc suruc-jopapie Paulo â Sila jofazo mupie jahe ŋafeoa Berea haeo wiserâ rapic (Aposolo 17:1-10). Eme irecnec Paulozi Ateŋ haeo rawec. Erâ Tesalonike haeonec miti mamana jaŋere mana mezac erâ Timoteo jaŋerao soreme rawec. Ra fisirâ miti babaju-jeŋicte fuŋne manarâ risierâ Paulo Korinti haeo bâfuarâ dâŋ binaŋ ecnewec Ecneme fuŋne-jeŋic manarâ papia-jeŋic qâreŋkewec (gaŋ 3:1-8).
Tesalonike haeonec miti ŋic ŋokac jaŋe jopa qâšâic ejarepie Jesure erâ šâic manambiŋ (gaŋ 1:6 â gaŋ 2:14). Eme tatakic tâmiric juhuc sanaŋkepie mitizi jaŋerao fua ɋârâŋkewec (gaŋ 1:5 â gaŋ 2:13). Paulo e irec bune biaŋkeme Wofuŋ daŋge mumuteŋ ecnewec (gaŋ 1:1-4). E irec qâreŋke-jarehuc dâŋ mocte mâmâc qâreŋke-jarewec. Jaŋe Wofuŋ fisiocte woŋec juhuc šiŋuc mumbiŋ: Jesu e fisihuc hâmokicnefâc-nâŋec hetarac-jopame šâhec eniŋmu. Iŋuc muhuc jaŋere busâqoc manambiŋ. Erâ gâcne jaŋe Wofuŋ e biac jâmbâŋ fisiocmu murâ gie-jeŋic hetararâ hâhâŋ qahuc jumbiŋ. Eme Paulo e Wofuŋ fifisi-ticnere fuŋne mufua-jarewec (gaŋ 4:14-18 â gaŋ 5:1-3). Erâ maŋɋâri juhuc Jesure ŋicfâc fârine jâmbâŋ erâ bahacmâc juniŋte bufac qajarewec (gaŋ 5:6-11 â gaŋ 4:1-8). Erâ papia ra fisime tutumaŋ-jeŋicko woseniŋte mujarewec (gaŋ 5:27). Tesalonike ŋic jaŋere papia I i Paulozi bâbâni jâmbâŋ qâreŋkewec, papia gâcne sasawa i šâhec qâreŋkewec.
Papia irec dâkâne sâko jajahec kecšiŋuc fokopirec:
1. Gaŋ 1-3. Daŋge mumuteŋ dâŋ.
2. Gaŋ 4-5. Uŋsawaŋ â mu qaqazuc dâŋ.
1
Paulo e jaŋere erâ Anutu daŋge nunumu ecnewec
Paulo, Siliwano â Timoteo nâŋe Tesalonike haeonec kikefuŋ, Anutu Mamac â Wofuŋ Jesu Kristo ere ŋicfâc, ŋoŋere papia ši râeŋgopeneŋ. Aki anonoc â wama ŋoŋerao fotâcnerâ fozejec. Nâŋe dameŋ sâc ŋoŋere erâ Anutu daŋge âzâcneeŋgopeneŋ, erâ nunumu gie bahuc sâc ŋoŋere manasu-fâreeŋgopeneŋ. Ŋoŋe mamanasiŋ-ŋeŋicte fârine bâfuaeŋgopieŋ â maŋjauŋte bâmec gie baeŋgopieŋ â Wofuŋ-nâŋec Jesu Kristo paŋšâic jaha worickeeŋgopieŋ, irec Mamac-nâŋec Anutu ere maio hati manasurâ mufuahuc âzâcneeŋgopeneŋ. Âgofâc, nâŋe manaŋgopeneŋ, Anutuzi maŋjauŋ eŋarehuc rowosâec-ŋopawec. Iŋuc eŋarewecte Biŋebiaŋ bafârâ ŋazapene dâŋ sawa mi ewec, i tâpirihec â Tiri Mârohec â buâkecnehec ewec. Ŋoŋerao jumbeŋko ŋoŋere erâ wiac ebac embeŋ i manaŋgopieŋ. Eme nâŋe bâjâpec-nâpombiŋ, bâjâpec-nâpohuc Wofuŋ e jahacne mâmâc bâjâpembiŋ. Ehuc miti i fific guguriŋ faio Tiri Mârozi bufahac qaŋarehame ro maŋ embiŋ. Ŋoŋe iŋuc ehuc Makedonia â Akaia mâreŋkonec miti mamana jaŋe micne bajarehuc fuŋne qazu-jarembiŋ.
Tesalonike ŋic jaŋere dâŋ biŋe hae sâc rawec
Ŋoŋeraonec hâcne Wofuŋte dâŋzi haŋ barahuc Makedonia â Akaia mâreŋko fuawec, erâ i sawa mâcne, ŋoŋe Anutu manasiŋkembiŋ irec dâŋ biŋe i hae sâc mana-fârepie nâŋe jajazane moc mi fuawec. Jaŋe jaŋac ŋoŋerao gie bapene fârine fuawec irec dâŋ nâzâeŋgopieŋ. Erâ ŋoŋe nemuɋâŋ râpeckerâ Anutu jujune â fârine maickerâ ŋicfâc-ticne embiŋ, 10 erâ Ŋokâ-ticne Jesu hâmockonec bâɋârekicne, e juku sambâŋkonec waharâ okac dameŋko ŋezic-nâpozokac, ere šawiehuc jueŋgopieŋ, irec dâŋ binaŋ-ŋeŋic hae sâc eeŋgopieŋ.