APOSOLO BINAŊ
Aposolo jaŋere binaŋ papia i Lukazi qâreŋkewec. Ere miti papia jajahec fokopirec hâcne, Jesure binaŋ â aposolo jaŋere binaŋ. Luka e papia jahec i âgo-ticne Teofile ere biŋe qâreŋ-jofawec. Luka tâmiric muzac aposolo jaŋere binaŋ paŋšâic mi mana-hâmonšapeŋ. Erâ Luka e aposolo gâcne jaŋere binaŋ boc mi qâreŋkewec. Qanaŋ Petoro â Johane jahere qâreŋkewec, izi Paulo erao fotâcnerâ binaŋ-ticne šuhuckewec. Paulozi miti muiŋneme mâreŋne mâreŋne haŋ barawec, irec binaŋ hâcne šušuhuc jaha qâreŋkewec. Binaŋ tucne i ŋic gâcne jaŋere mickonec manarâ qâreŋkewec, â tucne ine e jahac wiac hone manac ewec sâc qâreŋkewec. Paulo e miti kiŋaŋ rame bâjâpehuc wiac ebac ewec â miti muwec i hone manac ewec hâcne. Bâbâfuac epic ine Paulozi miti kiŋaŋ šâšâŋiŋ moc rawec ira raku Troa haeo fisiwec ira. Eme bâbâjâpec raku Filipi haeo ine Lukazi ŋeha Paulo e fotâcnerâ rawec. Juku dameŋ mocko Jerusalemko risieocte Luka jowame mâmâc rapic. Eme ira Paulo kâpâcwâru barâ Kaisarea haeo barapie jara 2 ŋehuc juwec. Ehame Luka e qâterâ ijaha juwec. Juku Paulo wokeo râerâ Roma haeo barapie Luka e woke ijaha Paulohec mâmâc raku Roma haeo fisipic. Mamac jupic irec binaŋ hâcne ninic jaha qâreŋkewec. Eme Roma haeo fisikicne ira bâtâcnerâ behewec. Wemocte Paulore binaŋ mi qâreŋke tarawec irec fuŋne kâuc baŋgopeneŋ.
Lukazi aposolo jaŋere binaŋ qâreŋkewec i honepene šâšâŋiŋko fâuckekac, ehuc neŋgocne sâko jajahec fuakac ine šiŋuc: Qanaŋ Jesure kikefuŋ Jerusalem haeo fuawec. Eme opâ ruac guru jaŋe Mârozi tâpiri jareme mitire hata bâfuarâ Jesure Biŋebiaŋ bâiŋ basawec epie Palestaiŋ mâreŋ sâckerâ fowec, erâ wâc Siria mâreŋko rarâ Antiokia haeo ira fua ɋârâŋkeme mitire hae qizec sâko namba 2 i Antiokiazi ewec. Binaŋ izi Aposolo gaŋ 1 irecnec domarâ feku gaŋ 12 ira fisikac. Eme binaŋ irec maŋnao gie bapa ŋic mai fuaŋgopieŋ ine Petoro â Johane â Stefano â Filipo erâ gâcne moc moc.
Aposolo jaŋere binaŋ irec dâkâ sâko namba 2 ine Paulo â babaficfâcne jaŋe miti kiŋaŋ gie bapie miti mâreŋ sâc rawec irec dâŋ binaŋ hâcne fokac. Siria mâreŋko Antiokia hae irec kikefuŋ guru jaŋe neŋgoc ŋejarepie miti kiŋaŋ rambiŋ, erâ Jesure šâŋe biŋe musawepie mâreŋ sâko 3 fusucmawec, Asia mâreŋ masune, Makedonia, Grië mâreŋ erâ wâc ŋicwofuŋ sâko ere hae qizec, Roma haeo rarâ fua ɋârâŋkewec. Binaŋ biri-ticne gâcne šiŋuc fokac:
Paulo e Banabahec miti kiŋaŋ bâtâcnerâ rapic (gaŋ 13-14).
Paulo e Silahec miti kiŋaŋ arec 2 rapic (gaŋ 15 botâŋne 18).
Paulo e miti kiŋaŋ arec 3 rawec (gaŋ 18 botâŋne 20).
Paulo e Jerusalem haeo rame kâpâcwâru bambiŋ (gaŋ 21-26).
Paulo e wokeo ferâ hâwecko rahuc juku Roma haeo fisiwec (gaŋ 27-28).
1
Jesu e motecfâcne mâzoc-joparâ fewec
1 O Teofilo, no mârâc dâŋ qâreŋke-garepo, ine Jesuzi gie bawec â miti muwec irec dâŋ binaŋ sasawa egarepo. 2 E gie-ticne fuŋkerâ baraku dameŋ-ticne maickeme Tiri Mârozi ecneme aposolo rowosâec-jopawec jaŋe micrâfâ-ticne jaza tararâ sambâŋko fewec, irec binaŋ hâcne qâreŋke-fârepo. 3 E šâic manaku hâmorâ mocwâc ɋârerâ Jaŋe hâcne šoaŋ gie bapa 40 fua soŋ ejarehuc fuŋne-ticne bajaŋgeŋkeme hone manac embiŋ, â Anuture uucmaŋ irec dâŋ jaza mutâc ewec.
4 Erâ jaŋehec ŋec domac ehuc dâŋ šiŋuc jazawec: “Ŋoŋe Jerusalem hae jâpec mi behenšepieŋ, Mamacte biŋedâŋ ŋazape manambiŋ, i fârinehec eocte ira woŋec junšepieŋ. 5 Johane e opâ rua-ŋarewec, ši ine dameŋ mi šorahame Tiri Mâro rua-ŋarezo.” 6 Iŋuc mume, tumaŋnerâ jumbiŋ jaŋe šiŋuc muhuc wiocnembiŋ: “Wofuŋ, go dameŋ ira hâcne Israe ŋic qâzuc-nâpotec mocwâc nâŋe nâŋâcne ŋicwofuŋhec erâ junaŋmu me?” 7 Mupie šiŋuc jazawec: “Mamac e tâpiri-ticnere erâ dameŋ šoric qândâŋ bawec fokac i ŋoŋe mamanane mi ekac. 8 Mocjaha Tiri Mârozi ŋoŋerao waharâ tâpiri bâfua-ŋareme biŋe mumufâc-nane eniŋmu. Ehuc Jerusalem haeo bâtâcnerâ miti-nane Judaia â Samaria mâreŋko murâ murakupie mâreŋ qaŋeŋne sâcke-fâreocmu.” 9 Dâŋ iŋuc murâ šâŋe fai-jeŋicko afeckerâ fewec. Fehame karoraczi bâsoŋkeme basambiŋ. 10 Eme sambâŋko fehame firâ râqârehuc domahapie ŋic jajahec ŋaqi qaŋqaŋhec mi jaŋerao fuarâ domazepirec i¡ 11 Erâ šiŋuc jazapic: “Galilaia mâreŋkonec ŋicbureŋ, ŋoŋe wemocte sambâŋko fihuc jaha domaŋgopieŋ? Jesu ŋoŋe honehapie behec-ŋoparâ sambâŋko fekac, eki hâcne juku iŋuc jaha wahazokac.”
Motec jaŋe risierâ nunumu gie bambiŋ
12 Eme aposolo jaŋe Oliwa tikionec risie waharâ rašimicnao Jerusalem hae ŋewec ira rašimbiŋ. Sawane i sabata hombaŋko hata rarane irec sâc. 13 Raširâ haeo ferâ ŋeŋe juju ehuc jumbiŋ fic ira fembiŋ. Jumbiŋ ine šiŋuc: Petoro â Johane, Jakobo â Anderea, Filipo â Toma, Batolomaio â Mataio, Jakobo Alifaiore ŋokâ, Simoŋ Ʒelote, erâ Juda Jakobore ŋokâ. 14 Ŋic i jaŋe hâcne maŋ mocjaha erâ nunumu gie šušuhuc jaha bahuc jumbiŋ. Iŋuc ehapie Jesure neŋgoc Maria â ŋokac gâcne â Jesu ɋafâc-ticne jaŋe mâmâc bafic-jopambiŋ.
Judare âkehoc bâfuambiŋ
15 Dameŋ ira Jesure qâjâpecfâc šare-jeŋic 120 qâririŋ iŋuczi tumaŋnerâ ŋehapie Petoro e ŋondeŋ-jeŋicko faharerâ dâŋ šiŋuc jazawec: 16 “Âgo bureŋ, Juda râsi jowac-jopame Jesu rombiŋ ere dâŋ Tiri Mârozi Dawidi mic ba afec ecneme mu qâreŋ ewec i wemocko mâc fozac. 17 Juda e nâŋâcnaonec hâcne, â miti gie i e mâmâc mucnekicne. 18 Eme ŋic eki šika furizi mâreŋ kitâcnecnewec ira ra qizeczi qârisic hurâ bune qâfâuckeme hone waha-fârewec. 19 Eme biŋe i Jerusalem haeoneczi mana-fârerâ mâreŋ irec šâŋe Akedama mumbiŋ, nâŋâcne dâŋko Ʒikamâreŋ. 20 Miti mânecko šiŋuc hâcne qâreŋkekicne fokac:
`Hae-ticne tuhu fuazejec,
â ficticnao ŋic moc mi juzejec.'
Erâ moc šiŋuc:
`Mafa-ticne i furunezi rauckezejec.'
21 Eme Jesu ŋondeŋ-nâŋecko jume ju ecnepene ŋic gâcnezi qâsuec-nâpombiŋ, 22 ehuc Johanezi Jesu Miti Opâ ruacneme gie-ticne fuŋkewec dameŋ ira erao šuhuckerâ bâjâpehuc juhapene sambâŋko fewec, ŋic iŋucne moczi fuarâ bafic-nâpome, Jesu hâmockonec faharewec irec biŋe mupene haŋ bazejec.” 23 Petorozi iŋuc jazame ŋic jajahec bâfuac-jofambiŋ. Moc šâŋene Josefe, Basaba mucne jumbieŋ, šâŋene moc Jusito, erâ âgone Matia, 24 Bâfuac-jofarâ šiŋuc muhuc numumbiŋ: “O Wofuŋ maŋ hohone, go ŋicjahec ši jaheraonec wenimoi bâwosâekomec i nâwotutec mucnepene 25 Juda miti â aposolo gie-ticne hetararâ e jahacne hatao rawec ere jujutacko juzejec.” 26 Iŋuc numurâ miti ɋâsâi qapie Matia âke fuame aposolo 11 jaŋerao šuhuckewec.