ROMA
Paulo e miti kiŋaŋ mimic rahuc Korinti haeo mocwâc fisiwec. Erâ ira juhuc Romaŋic jaŋere papia qâreŋkewec. Roma haeo miti ŋic ŋokac jumbiŋ jaŋere fuŋne mi mana-hâmoŋgopeneŋ. Paulo e jahacne me aposolo moczi hae ira mi fisihame jumbiŋ. Irec šiŋuc muzo: Jerusalem haeonec miti ŋic ŋokac omanezi Roma haeo ra juhuc miti miczi muhapie hae irecnec ŋic gâcnezi manarâ Jesure biŋefâc embiŋ. Mâro wahawec dameŋ ira Judaŋiczi Romaŋic ekicne jaŋeraonec gâcnezi mâmâc Jerusalem haeo tumaŋnembiŋ (Aposolo 2:10). Ehuc wiac šâŋe furu honembiŋ â Petorore miti manambiŋ. Erâ wâc šâhecko Jerusalem haeo mitire šika kâpâcwâru fuame miti ŋic ŋokac jaŋe râwiŋ qâwiŋnerâ hae sâc rafârembiŋ (Aposolo 8:1 â 11:19). Eme jaŋeraonec gâcnezi raku Roma haeo fisimbiŋ wâc mecne. Ŋic ŋokac iŋucnezi hâcne Roma haeo Jesure binaŋ bahuc ŋic ŋokac jazapie irecnec gâcnezi mana šakiembiŋ. Eme jaŋerao hâcne Paulozi papia qâreŋkerâ râeme rawec.
Paulo e hae mâreŋ gâcne rârecke-fâreku Korinti haeo ŋehuc šiŋuc muwec Ŋicfâc-nane hae sâc jaŋe Jerusalem haeonec miti ŋic ŋokac jaŋere moneŋ bâturembiŋ i Jerusalem haeo bararâ mocwâc risie warerâ Roma haeo rapemu. Eme hae irecnec miti ŋic ŋokac jaŋe neŋgoc ŋesiŋ ŋenarehapie Sipeî mâreŋko miti kiŋaŋ rapemu (Roma 15:28). Roma haeo Paulo gie-ticnaonec opâ ruac 26 jumbiŋ jaŋere šâŋe râe-fârewec (Roma 16:1-16). Gâcne sâko ine mi manac-jopawec. Papia-ticne ŋokac moc šâŋene Foibe e râcneme Roma haeo barawec.
Erâ Paulo e Roma haeonec miti ŋic ŋokac šâfo bajareocte irec sawa papia mi râe-jarewec. E mitire fuŋne mutâcne-jareocte irec mâmâc manasurâ papia râe-jarewec. Ine fuŋne šiŋucte: Roma haeo Judaŋiczi opâ ruac â qâpuczi opâ ruac mâmâc jumbiŋ. Eme Judaŋic opâ ruac jaŋe miti raŋɋanao sâcmutâc dâŋ fokac i reŋkehuc irec manapie fârine wâc ewec. Ehuc mumbiŋ: I Wofuŋdâŋ jaha irec i mâmâc reŋkehuc biaŋkerâ sambâŋko fezo. Iŋuc mupie qâpuczi opâ ruac Paulore miti gieonec rakicne â gâcne jaŋe dâŋ irec manapie mi sâckeme qatarambiŋ. Irec dâŋjeŋic fâfâuc ejujec â gâcnezi maŋjahec embiŋ. Erâ wâc hombaŋ â wiac gâcne sâcti qâtiri râe rambiŋ. Moc ine qâpuckonec opâ ruac jaŋe Judaŋic jaŋere manapie wawahane ewec. Ine šiŋuc muhuc mana-jarepie sâqorewec: Jaŋe hâcne Jesu qambiŋ erâ wâc dameŋ šiŋuczia neŋgocne sâko maŋsanaŋ ehuc Jesure miti qikiŋneeŋgopieŋ irec Wofuŋzi behec-jopaocmu. Mupie Judaŋic opâ ruac gâcne jaŋe mumbiŋ: Macne Wofuŋzi bafic-nâpoocmu nâŋe fuŋfuŋfâcne. Dâŋ sisifucne iŋuc fowecte Paulozi mitire fuŋne jâmbâŋ ritu-jarewec. Ehuc sâcmutâc dâŋte â mamanasiŋte â mitio tiŋke biaŋ ee irec dâŋ bâutuckehuc qâreŋke-jarewec. Eme Judaŋic â qâpuc guru Anutuzi weniŋuc mana-jareme fokac i wâc mufua-jarewec. Erâ wâc dâŋ gâcne šuhuckewec. Miti fuŋqizecne kecšiŋuc qâreŋkewec: Mosere sâcmutâc dâŋ reŋkehuc bibiaŋke i mi fokac Jesu manasiŋkehuc bibiaŋke i mocjaha fokac. Sâcmutâc dâŋ bajuhuc kiŋ mi hefâsâezo Jesurao roweckehuc kiŋ hefâsâezo. Irec Paulozi Romaŋic qâreŋke-jarewec i dâŋ fâri hândâŋ â bubiaŋ dâŋ jâmbâŋ.
Romaŋic jaŋere papia dâŋ neŋgocne sâko jahec â moc fokac:
1. Jesu Kristo manasiŋkehuc kiŋ hefâsâezo. Ine gaŋ 1-8 irec maŋnao.
2. Judaŋic me qâpuc Kristo-nâŋec mocjaha. Gaŋ 9-11.
3. Maŋzi roroc ehuc Wofuŋte erâ juzo. Gaŋ 12-16.
1
Paulo gie ticnere fuŋne
1 Paulo no Jesu Kristozi kiŋaŋ qaqa-ticne bacnurâ aposolo-ticne mucnuhuc Anuture Biŋebiaŋ râepe qareŋko raocte rowosâecnuwec. 2 Miti i hâcne fuaocte Anutuzi mârâc jaha porofete ejareme irec findaŋdâŋ tiri papiao qâreŋkembiŋ. 3 Qâreŋkepie Ŋokâ-ticnerao iticnewec. E sahachec fufua i Dawidi ɋâricfâc-ticne jaŋeraonec fuawec, 4 erâ e maŋɋaɋac bâbâfua Mârohec jujuzi Anuture Ŋokâ jukac, irec fuŋne hâmokonec faharewecko fua taniŋke-jâmbâŋkewec. 5 Jesu Kristo e Wofuŋ-nâŋeczi aki anonoc enarehuc aposolo gie tahacnuwec. Ehuc mâreŋ sâc ŋic miti jazepe mana rereŋ epie Jesure šâŋe biŋe raocte munarewec. 6 Eme ŋoŋe jaŋere âgofâc jaha, Jesu Kristore ŋicfâc eniŋte hefârec-ŋopakicne, irec gie i ŋoŋerao iŋuc jaha bapere munarewec. 7 Roma haeonec Anuture jorofâc, tiriŋic mucŋopakicne, ŋoŋere hâcne papia ši qâreŋkekopac. Mamac-nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec.
Paulozi Roma haeo miti mamana iqic-jopaocte muwec
8 Miti babaju-ŋeŋicte mâreŋ sâc manapie biaŋkekacte qanaŋ ŋoŋere erâ daŋge mupe Jesu Kristorao qarâ Anutu-nanerao fotâcnekac. 9 No Ŋokâ-ticnere Biŋebiaŋ muhuc maŋnanezi Anutu kiŋaŋ qacnepe fuŋne-nane manakacte ere maio dâŋ ši mupe mananiŋ: 10 No numucneekopac sâc ŋoŋere mâmâc hati manasuekopac, ehuc Anutu maname sâckeme hata bâfua-nareme ŋoŋerao fâpemurâ âzâcneekopac. 11 No ŋoŋe honec-ŋopapere enareekac. Ehuc fârâ maŋte bâmec moc baŋarepe qiŋ herâ juniŋte muekopac. 12 Me kecšiŋuc mupe: No ŋoŋerao fâpe mamanasiŋte fârine nowac gowatuŋ ehuc keketeŋ enšepeneŋ. 13 Erâ âgofâc-nane, fuŋne-nane kâuc banšipiŋte šiŋuc ŋazape: No ŋicguru gâcne jaŋerao eeckopac iŋuc jaha ŋoŋerao fârâ miti giere fârine piticne bâfuapemurâ hati muekopac. Erâ fâzo mupe sâc wiac gâcnezi niŋgiŋnume juekopac. 14 Noni ŋic kosa. Grikŋic â kâte sanaŋ, mamanahec â mutucne mâmâc mitizi tofa bazu-jarepemurâ munarekicne. 15 Irec Romaŋic ŋoŋe iŋuc jaha Biŋebiaŋ ŋazapemurâ maŋnanezi afeckeekopac.
Mamanasiŋte erâ juju hotâckezo
16 No Biŋebiaŋte manape mimi gaŋgaŋnehec mi eekac, i Anuture tâpirihec, irec mana sakac eniŋmu sâc bâpiaŋ-jopaocmu, Judaŋic hâcne, erâ Grikŋic mâmâc. 17 Biŋebiaŋko hâcne Anuture tiŋne fua taniŋkeekac, i hâcne eki mamanasiŋhec jaŋe tahac-jopaekac, ehame mamanasiŋko utuckeniŋmu. Dâŋqâreŋ šiŋuc hâcne fokac: “Biaŋkekicnezi mamanasiŋte erâ juju hotâckeocmu.”
Ŋic jaŋe Anutu-jeŋic beherâ dapâcko rašimbiŋ
18 Ŋiczi ine Anutu qamaserâ sindaŋ ehuc kike hata-ticne hesifuckeeŋgopieŋte kimbeŋ ticnezi sambâŋkonec fua taniŋkeekac. 19 Anuture fuŋne gâcne ŋiczi mamanane i manaeŋgopieŋ, Anutu jahac bataniŋke-jarewec. 20 Anutu e ŋiczi mi hohonene, â mâreŋ bâfuahuc ine wiac fuŋne fuŋne râewec izi tâpiri sanaŋ-ticne â qâreŋ-ticne bataniŋkeme sâcne hone mana tarac eeŋgopieŋ. Irec ŋic gâcne jaŋe wemocko kâuc bahuc sahac ŋeŋezic dâŋ muniŋmu. 21 Jaŋe ine Anutu jukac i mana-bipiehuc mi jukac-tinac eha araŋ mi bacnembiŋ â mucne bacne mi ecnembiŋ, aricne. Jaŋe mumusifuc fuŋne fuŋne bâfuahuc maŋmutuc epie dapâczi foŋjopawec. 22 Ehuc nâŋe mamanahec juŋgopeneŋ muhuc sâke bâbâc eku maŋmutuc embiŋ. 23 Iŋuc ejareme jaŋe Anutu juju hati e araŋ mi bacnehuc ŋic â wipe â qowi â homa, wiac sisirowene hâcne irec ɋâŋ qâqâtâc barâ araŋ bacnembiŋ.
Ŋic jaŋe Anutu beherâ mamakâc embiŋ
24 Iŋuc epie Anutuzi hone suŋgiŋ ejareme maŋzi sasec kosa hurerâ mamakâc ehuc maŋ sahac-jeŋic bâsâqorembiŋ. 25 Jaŋe Anutu jâmbomac rune râpeckerâ burec maickembiŋ. Ehuc ru bâbâfua-Jeŋic qikiŋnerâ wiac bâfuakicne araŋ bacnehuc kiŋaŋ qacnembiŋ. Wiac bâfua-fârewec e mumuteŋheczi mumuteŋhec jurašihuc jume sâckeocmu. Jâmbomac. 26 Ŋic jaŋe e hâcne râpeckembiŋte suŋgiŋ-jopame sasec sâqocne jâmbâŋ bâfuambiŋ. Ehuc ŋokac jaŋe Anutuzi hata muwec i qâsorierâ mi jujuo rambiŋ. 27 Á ŋic jaŋe iŋuc jaha ŋowe ŋonâŋ juju qikiŋnerâ maŋjeŋicko sasecte šocsâko šame jaŋe jaŋackoaŋ mamakâc fuŋmoc bâfuambiŋ. Erâ bâbâsifuc-jeŋicte okacne maŋ sahac sisipiric rombiŋ. 28 Jaŋe Anuture fuŋne mana-bipiehuc enšaŋauc ecnepie suŋgiŋ-jopame maŋjeŋic bâzickeme wiac mi eene i hâcne embiŋ. 29 Ehuc wiac hehesicne fuŋne fuŋne hurepie fewec, sindaŋ, andac, râŋgeŋne, erâ maŋjeŋicko iiŋguuŋ â šika â rârâsi â eeatuc, erâ gibioc izi fusucmakicne. 30 Jaŋe gupe bapa, micko âkec ŋic, Anutu kisâ eecne, šaubacne, pepecne, sahac mumuteŋ, sâqocnere hata bâbâfua, neŋgoc mamac dâŋ qaqatara, 31 maŋ mamanasu tâmiric juju, doc bapa, uruc jauŋ tâmiric juju. 32 Wiac iŋucne ehuc sipirickezo, Anuture micdâŋ iŋuc fokac i mana-bipiehuc sifu eeŋgopieŋ, erâ i sawa mâcne, gâcnezi epie hume keteŋ ejareeŋgopieŋ wâc.