3 Jon
Jon Minj Kisen Tikak
Minim Nind Niŋep
Jon minj day kisen tikak biy, bi Gayas, biynimb Jiysis nup gosimb niŋyak gunap kuyip kond mindyiŋgip ak nup tikak.
Minim Ar Keykey Mindip Rek:
Minim nind aŋgak ak mindip, 1-4.
Bi Gayas girep gek Jon nup miñmiñ gak minim ak mindip, 5-8.
Bi Diyotreypis timey gak minim ak mindip, 9-10.
Bi Demetriyas mindrep gip rek nup dinimimb aŋgak minim ak mindip, 11-12.
Gayas sek, biynimb nuk gok sek kuyip, “Nimb mindpim” aŋgak minim ak mindip, 13-15.
1
1 Mam Gayas. Nand mindpan? Yand Jon, bi Gor biynimb nuk gok kuyip kond mindpiyn. Nand buŋgiy tep yand ak mey, 2 Gor nup aŋgniŋiy apiyn, “Gayas nup kond mindenimin, tap bap ma ginimuŋ apiyn.” Pen nand Gor nup gosimb niŋiy, mindrep gipan ak niŋbiyn. 3 Mam gunap biy apiy, Gor minim niŋind yimb ak, kisen ginep mindpan ak aŋgñeyak, yip tep gak. 4 Per ñapan yand aŋgen, minim niŋind ak dipay gok, mindrep gipay aŋgey niŋen, yip tep yimb gip.
5 Buŋgiy tep yand. Yand niŋbiyn: mam ay gunap kuyip per direp yimb gipan. Mam ay miñmon paryomb okok nimb, ma niŋban gok, kuyip monmon diy, kond mind tep gipan. 6 Kun gipan ak gunap apiy, biynimb Gor ker mindpay akniy kuyip aŋgyak, “Gayas Gor biynimb nup gok kuyip, wasemb yimb ayip aŋgyak.” 7 Pen kiyk Krays minim ak aŋgñi taŋgyiŋg, biynimb yikop gok kuyip aŋgniŋiy, keñmaŋgiy tap gok ma dipay. Kun ak ap nip niŋiy, kinjeŋ bap amniŋg aŋgey, kuyip tap gunap ñey, dand amniŋgiy. 8 Biynimb tep kun ak rek direp giy mey; kiy yip jimñiy, Gor woŋg ak gon amrep giniŋgamb.
Diyotreypis Timey Gak
9 Yand Gor biynimb mindpay gok kuyip, minj tiknik ak pen, bi Diyotreypis, biyomb kiyk minden aŋgiy, minim yand apiyn gunap ma nep niŋimb. 10 Kun ak yand mindpim ak amiy, nuk chinup aŋgjiwiy, yerer gip minim ak, aŋgniŋgambun. Nuk mam ay Gor minim aŋgñi tapay gok kuyip, ma nep diy, biynimb gunap kuyip diniŋg gey, nuk mer aŋgiy, lotiw biy kisen ma winimimb aŋgip.
Demetriyas Girep Gak
11 Pen mam tep yand. Biynimb gunap miñ timey ar ak gey, nand yip ma ginimin. Biynimb tap siy tap timey giyiŋg mindpay gok Gor ker ma mindpay. Mindrep giyiŋg mindpay gok, Gor ker mindpay.
12 Nand niŋban: yand minim yesek ma apiyn. Mam Demetriyas minim niŋind yimb chin aŋgñimbun ar ak niŋiy, yipund gip ar ak nep aŋgñimb. Biynimb maŋgiysek nup niŋiy bi, tep apay. Kun ak nup dinimin.
Minim Day Won Gunap
13 Yand nip minim kuŋaynep aŋgiy, ñiw kil tiknim ak pen, 14 maŋ mindip, nip jomluk niŋiy minim nen aŋgniŋgayn.
Namam akniy mindpay gok, “Nip mindpan?” aspay. Biynimb Gor ker nand yip mindpim gok kuyip Jon, “Nimbip mindpim?” aŋgip aŋgnimin. Gor nimbip kond mindeŋ.