JEMIS
Minj Jemis Tikak
Minim Nind Niŋep
Baybol buk day kisen ak tikyak ñin ak, Jemis omiŋal nokom mindyiŋgipay. Pen minj kun biy biynimb kuŋaynep Jiysis numam kisen Jemis tikip rek ayip aŋgiy niŋbay. Nuk Jiwda biynimb miñmon okok maŋgiysek, Gor nup gosimb niŋbun apay gok, minim nep ma aŋgiy, tap siy tap timey ak kirgiy, Gor aŋgip rek giyiŋg, nup gosimb nokom niŋiy, Jiysis Krays nup chiŋgrep giy gem amnimuŋ aŋgiy tikak.
Minim Ar Keykey Mindip Rek:
Minim nind aŋgak ak mindip, chapta 1:1.
Miker gunap apek, Gor nup ma kirgiy, nup nep gosimb niŋyiŋg, mindenimimb aŋgak minim ak mindip, chapta 1:2-8.
Biynimb tap ma mindip gok sek, biynimb tap kuŋay mindip gok sek minim ak mindip, chapta 1:9-11.
Biynimb miker apek, Gor nup ma kirpay minim ak mindip, chapta 1:12-18.
Minim aŋgniŋgiy rek niŋiy, ginimimb aŋgak minim ak mindip, chapta 1:19-27.
Biynimb teptep gok sek, biynimb tam okok mindpay gok sek kuyip, miñ ar nokom kun ak nep ginimimb aŋgak minim ak mindip, chapta 2:1-13.
Biynimb Jiysis nup gosimb niŋbun apay gok, minim nep ma aŋgiy, tap siy tap timey gipay ak kirgiy, Gor aŋgip rek giniŋgiy aŋgak minim ak mindip, chapta 2:14-26.
Biynimb Krays ker mindpim gok, joŋimb nimb ak kond mindrep ginimimb aŋgak minim ak mindip, chapta 3:1-18.
Biynimb Krays ker mindpun gok, biynimb yikop gok gipay miñ ar ak, ma ginjun aŋgak minim ak mindip, chapta 4:1–5:6.
Gor nup gosimb nokom niŋiy, Jiysis andkind winiŋgamb ak gos sek kond mindyiŋg, biynimb tap gip gok kuyip, Gor nup aŋgniŋnimimb aŋgak minim ak mindip, chapta5:7-20.
1
Yand Jemis, Gor apiymiŋay kuyip woŋg giñimbiyn. Nimbip Jiwda biynimb jiw am miñmon key okok mindiy, Gor nup gosimb niŋbim gok, “Nimb mindpim?” aspiyn.
Miker Apek, Gos Kuŋay Ma Niŋnimimb
Mam ay sikop. Miker apek, gos kuŋay ma niŋnimimb; tep gakniŋ nep mindenimimb. Kosyam mindeniŋgambun rek, Gor nup chiŋgrep giy mey, kisen miker yerip apek, ma pirikniŋgambun. Nup chiŋgiy nep mindiy mey, mindrep giy ma apyap pikniŋgambun. Pen nimb gunap, yerer gon tep giniŋgamb aŋgiy, Gor bi chinup direp yimb gip anup aŋgniŋem, nimbip gos tep yipund giy ak ñiniŋgamb. Nup aŋgniŋey, yip yenen aŋgniŋbim aŋgiy, ma kirgip. Kun ak nup aŋgniŋniŋg, gos nokom niŋiy aŋgniŋnimimb. Pen chinup niŋniŋgamb akaŋ, ma niŋniŋgamb aŋgiy, gos omiŋal niŋiy aŋgniŋeniŋgambim; yiŋgen apiy, ñiŋg solwara paŋgiy dand doŋ wiy gip rek ak giniŋgambim. 7-8 Biynimb kun gok rek, gos niŋrep giy ma gey amimb: gosow gosow niŋyiŋg gey amimb ak mey, Gor nup aŋgniŋbay ak, tap bap kuyip ginimuŋ rek ma ayip.
Mam ay simbgeprek gok, Gor kuyip direp gek mindrep giniŋgambay ñin ak, miñmiñ giniŋgiy; 10 pen mam ay tap kuŋay mindip gok, tap kiyk apyownimuŋ ñin ak, miñmiñ giniŋgiy. Yenen: biynimb tap kuŋay mindeniŋgamb gok, mon sum rek luŋg yowniŋgambay. 11 Pumb ak lim giy, mon sum teprep kun ak niŋek, milip giy luŋg yowip. Biynimb tap kuŋay mindeniŋgamb gok, woŋg kiyk gi dand amniyakniŋ, kuyip kun ak rek giniŋgamb. 12 Pen biynimb miker apek, Gor nup ma kirgiy, chiŋgrep giy nep mindeniŋgambay gok, miñmiñ giniŋgiy. Biynimb nup wasemb aypay gok kuyip aŋgak rek, arband perper mindep ak ayñiniŋgamb.
13-14 Biynimb timey gun aŋgiy gos ak apek, Gor gos ñek kun giy niŋbun aŋgiy, ma aŋgniŋgiy. Gor tap siy tap timey ma yimb gip rek, biynimb gunap kuyip, gos kun ak rek ma ñiniŋgamb. Pen gos kiyk key niŋbay ar ak, kuyip lipiŋg dand amek, tap siy tap timey gipay. 15 Gos niŋbun kun ak, tap yiŋ rek yimon, jakiy kindiy am wosgip rek ak; tap siy tap timey gipun. Tap timey gipun kun ak, pisnep mind wosgek, kumiy kuyiŋg yowniŋgambun.
16 Pen mam ay tep yand gok. “Minim yesek bap aŋgeniŋgiy,” ma niŋnimimb. 17 Tap tep yipund giy yerip yerip dipun gok, key okok nimb apek ma dipun: Bapiy yomb melik tep gayak ak nep, chinup ñimb. Nuk miñ ar bap gi dand amiy, tap kawnan rek tuŋgandikiy, miñ ar bap key ma giniŋgamb. 18 Gos nuk key niŋiy gek, minim yipul yimb nup ak niŋiy donuk mey; biynimb tep nuk, tap marip nind maŋgiy miñmiñ giyiŋg pipaŋgipay rek ak mindpun.
Niŋrep Giy Mindrep Ginimimb
19 Mam ay tep yand gok niŋim! Nimbip minim aŋgñiyakniŋ, kasek niŋnimimb. Pen biynimb aŋg gun aŋgiy, kasek miluk ma niŋnimimb. 20 Biynimb miluk niŋon, kuyip gos tep ñek, Gor biynimb suŋ-tep nuk mindon aŋgiy, ma niŋniŋgambay. 21 Kun ak, gos timey niŋiy, timey gipim rek, yenen kun gipun aŋgiy kirgiy, Gor gos tep ñimb ar ak giy mey, kim amemb rek ayniŋgamb.
22 Gor minim ak timund ak nep pik niŋiy, niŋbun aŋgiy ma aŋgnimimb. Ak tom giniŋgambim. Aŋgip rek giy mey; niŋbun aŋgnimimb. 23 Pen biynimb minim nup niŋiy, aŋgip rek ma gipay gok, galas ak niŋiy, jomluk niŋbun rek ak gipay. 24 Galas ay niŋiy, jomluk kiyk yerip rek mindip aŋgiy niŋrep gipay ak pen; kiriŋg amiy, sakiy giy; yergiy rek mindip aŋgiy, ma niŋbay. 25 Pen low tep yimb biynimb piksak dip ak sakiy ma giy, niŋyiŋg nep gey amniŋgamb biynimb gok, Gor kuyip kond mindek, yerer giniŋgambay ak amrep giniŋgamb.
26 Pen biynimb, lotiw niŋind yimb giy mindrep gipun apay gok, joŋimb kiyk ak niŋrep giy ma apay; yesek aŋgyiŋg, key niŋyiŋg gi mindpay. Kiyk lotiw minim niŋbay ak, yikop yimb niŋbay. 27 Lotiw miñ ar Bapiy Gor niŋek tep gip ak mey; ñapan amoñiluk gok sek, biyn kaŋil simbgeprek gok sek kuyip, direp ginimimb. Pen biynimb yikop gok yip yiŋgoŋg giy, asiŋ kuyip kun ak ma wiliknimimb.