HIBRU
Hibru Ma Yenya Har Jey Maji
1
GOD RIITI YIKAPWA RII NONA MAJI HAR
Nokwapa nokwapa nobok God riita noti wayega yenya mashi mashi wochar. Piirapet, God riiti majin mashi sawo tar ma, yechaka yenya wochar. Komas na apa tawa nediik riita riiti ma Yikapwak maji wocho. Diita Yikapwan rii keyibor. Keyiborek, rii eyey boboyen riiti tapak rii yakiita. Diita Yikapawak God riita diita nosapen rii otiir. God riita riiti Yikapwak tawa. Tawak, Yikapwa rii God riiti hadabas tawa boboyen, rii eechaba eechaba harapa tak tawa boboyen, rii otii okoree mukuchichu. Wowak, rii eechaba diita nosapen, winyumay, ya, niiwiika eena rii otiichi tapak neeki dagiir tawak eena diita tawa. Rii harapa otiichichawa majik rii neeki dagiir tawak tawa. Rii noti kapsek boboyen bachi poyechi nona uku yeetir. Uku yeetiirek, rii hevenek God riiti tapa mama yepak yir.
GOD RIITI YIKAPWA EJEL YENYA DAGIIRPOYETO
Jisas rii i mama yepak yirek, eena mukuchir rii eeta howuk tawa, ejel yecha karakada. Rii mukuchir God riita riina har hi eeta harapa, ejel hi eeta karakada. God riita eecha wor,
“Mii eeta eeji Yikapwa.
Apa ada miina yimowuwa.”
 
Rii kawka eecha wor,
“Ada riiti apokoga siinak,
riipa eeji woy yikapwaga siikiita.”
 
Kapo God riiboy diita majin ejel poren bar. Yaho. Rii bakasakech. God riita mapo yimowur yikapwa diita nosapek heechirek, yarek, rii kawka eecha wor,
“Eyey God riiti ejel ye God riina sapa kwoyaba
hikinak, kwoyaba ba ta.”
 
Rii ejel maji wor,
“Rii ejel yenya sowa tawaga eecha otiito.
Rii riiti wakasa man hin otii tawaga eecha otiito.”
 
Wowak, God riita Yikapwa majin wor,
“Mii eeta God. Miita aka tabo yichawak otii
boboy sii eechaba eechaba takiita.
Mii otii kepi sii tawa boboy mun siitii kowu tawa ma.
Otii kepi sii tawa boboyen mii rukusiito.
God riiti maji mun nasowoye otii tawa
boboyen mii yuyato.
Worek, eena miiti God riita miina aka tabo yiman
otiichi howuk heechir.
Heechirek, rii miiti nareboy yenya hey siitiichi
miina saniga howuk heechir.
Heechirek, miiti inyaka harapa kwoyawoy
hiki tar.”
 
10 Rii kawka eecha wor,
“Harapa ma, miita diita nosapen bakabaka nedii
otiirek, niiwiika tawa boboyen mii miiti
tapak otiibar.
11 Eeta boboy ye ha hamakiita.
Mii eechaba eechaba takiita.
12 Siiviitabi kwopa siitawak, rabo tawaga
diita nosap eechaba kwopa siinak, rabokiita.
Rabochi akaren yanak, dareboyekiita.
Wowak, mii dareboyekasakech,
mii keena eechaba eechaba takiita.”
 
13 Mashi God rii eecha wor,
“Eeji mama yepak eeka na yi.
Yichanak, miiti o ana pichawa ma yen
ada yatii kwuruk heechikiita.
 
Worek, kapo diita majin God rii ejel porek bar? Yaho. Bakasakech. 14 Eyey ejel eeta spirit tawak, ye God riiti yon otiito. God rii yenya wochirek, irek, yesokwa yicha tawa man kiyatayeken eena ir.