Hipalu
Mukia vayamoya ma avoma kae-malenea kanomo agia ohavinae. Yisasife haviya amakupi malenaya veala Yuta veamogamife huno kae-malene. Yisasia faliteno hetino ikapinaga haitegeno nago kanomoa teti foa (34) kafu agava maineno Hipalu kea kae-malene.
1
Anumaya Koti nafanemoa ke lahapai-maine.
1 Nayona mukia kanaene mukia yatetiene Anumaya Kotia agaia aune vayamogami amavayafitila taginagomo-gamina hamapai-maineane. 2 Hamapai-maineanagino ani kanamoa hano higeno menia ma mopa hano hisia kanamoa aupa nehigeno Anumaya Kotia agaia nafanemo avayafiti hu falote huno tahapai-maine. Anumaya Kotia ma mopaene mukia ikate yaene mopafi yaenena nafaneamo ayapiti talo hu-maleteno mukia yana nafaneamo ayapi malene. 3 Nafaneamoa Anumaya Kotina tokiyaage hale yamaa agaia maineanagino Anumaya Kotiene nago avamete huana mainaageno tokiyaama hanea keleti ke huno mukia yana Male maiho. huno hu-mainele mainae. Kefo ya nehuna yatimo anonaa Yisasia aliteno ani kefo yama ali talesiafe faliteno hetino anafinaga mainea Anumaya Kotina aya tamaga kaiyaga, ala vaya mainalega, hanea siale maine.
Yisasia ensole vayala amakaseno ala kano maine.
4 Yisasia ensole vayala amakaseno ala kano maineanagino Nefama aminea agimoa tusia kanale agi haneno ensole vayamogami amakimona amakase-maine. 5 Nayona Anumaya Kotia agaifena mage higeya kae-malenayane
Kagaya nagai nafane mainananagina nagaya menia Negafana mainoe. huno hu-maineane.
huya kae-malenayane. Eteno nagoene mage huno hu-maineane
Nagaya Nefana maisugeno agaya nagai nafane maigahie. huno hu-maineane.
Anumaya Kotia nago kanafina hana ensole kanomote mani kea hu-maineane? Aao nafaneamoteke hu-maineane. 6 Agaia yage nafanea* avaleno ma mopafi elavino egeno Anumaya Kotia mani kea huno hu-maineane
Mukia nagai ensole vayamogatama agai agigeya ayetama agia alisaga hiho. huno higeya Anumaya Koti avopina kae-malenayane.
7 Kae-malenagi Anumaya Kotia ensole vayafena mage hu-maineane
Ensole vayala yasimoene ata anefemoene hia avamete huya aliyaamia nealiye. huno hu-maineane.
8 Hu-maineanagi nafaneamofena mage hu-maine
Anumaya Kotiga kagaya mukia kanafina agola kava yagaika maige maige huka maigane. Kagaikaa kavama yagaisanana fatago auavateti yagaigane. 9 Kagaya fatago auavafekeya negahaigeno kefo auavafena nokahaiyafe nagaya kagaikaa Anumaya Kotinia Negafugamina ago amakaseka ala kano mainane. huna masaveteti falegatogeka muse hugane.
10-12 Nagoene mage huno hu-maineane
Anumayamogae ehe kanafina ma mopaene ikaene kayapiti talo hu-malenananagino ikaene mopaene fanane hugahianagi kagaya agola maige maige huka maigane. Ikaene mopaenena kenamoma falu-palegeya aye kafagegiya neataleya alu kenama aliya fai nealiya avamete huka ania huganagi kagaya alua augafa kanoa omaiganagi ania huka agola maige maige huka maigane. huno Anumaya Koti avopina kae-maleneane.
13 Nayona Anumaya Kotia nafaneamofena mage hu-maineane
Kagaya tamaga nayatega, ala vaya mainalega, hanea siale mainesanagena kame vayakaa kaiyafi alitalu humategahue. huno higeya kae-malenayane.
Anumaya Kotia nago ensole kanomona mani kea haopaitafa huno haopaine. Nafaneamoteke mani kea hu-maineane. 14 Ensole vayala avamu mainayanagino Anumaya Kotia agaia amaku amamema ali gatisia veamogamina amaya hisiafene huno humategeya aliyana mo nealiye.