Yisasife Kanale Ke
Luku
Kaemalenea Ke.
1
LukuꞋa Tiofilasina kaeno aminea avona.
Tiofilasiga ala kava kanomoga mukiꞋa vayaꞋmoꞋya YisasiꞋma tagai amuꞋnopi humainea yana ago kaemalenae. Yisasi kema hamanepaiya vayaꞋmoꞋya ehe kanale aepa heꞋya ani yana ageteꞋya tamahapaimainae. 3-4 MukiꞋama kahapaiya kemona aepaꞋa kelamake ke havisa-nafe nagaya kanaleꞋya huꞋna havilama huꞋna havilinoafe fatago huꞋna kaeꞋna kamigahue huꞋna nehue.
Yonina ategahie huno humaine.
Nagi Yutia kotega ala kava kanomo agia HelotiꞋe kava yagaino mainea kanafina nago kanomo agia SekalaiyaꞋe mono note kava kano maineanagino Apaisa nofi kano mai-geno aꞋamoꞋa Eloni nofi vayapiti falote humaineane. Ani aꞋmo agia IlisapetiꞋe. Ani alavelatana Anumaya Koti aulagafina fatago huꞋana mai-neꞋana mukiꞋa Anumayamo kahegi kea haviꞋana akave maleꞋana havi kavala ohunaꞋane. IlisapetiꞋa namo a maineafe nafaꞋneꞋania omai alavelata kosuna alekano lemainaꞋe.
8-9 Apaisa nofi vayaꞋmoꞋya aliꞋya alisaya kana SekalaiyaꞋa Anumaya Koti aulagafi aliꞋyamaꞋa neꞋaligeꞋya mono nopi kava vayaꞋmoꞋya Sekalaiyafe “Kagayae.” huꞋya hageno SekalaiyaꞋa Anumaya Koti mono nopi maineno manaꞋage yana kaesalamana Anumaya Kotina huneꞋateane.
10 Halinamo manaꞋa Anumaya Kotina neꞋamigeꞋya mukiꞋa veaꞋne-yaga kumatega maineꞋya Anumaya Kotitega havigemainae. 11 Havigageno SekalaiyaꞋa mono nopi mainegeno Anumayamo ensole kanomoꞋa agaite efalote huno manaꞋage ata kaemalea folamole* tamaga kaiyagaꞋa me hetimainegeno agemaine. 12 SekalaiyaꞋa ani kanoa ageteno atali talu huno koli humaine. 13 Koli hianagi ani kanomoꞋa mage huno hie “Sekalaiyaga kolia ohuka afaꞋa maiyo. Nunamuma humainana yafena Anumaya KotiꞋa ago havianagino akamoꞋa IlisapetiꞋa ne nafaꞋne atesigeka agia YoniꞋe huka malo. 14 Kagaya tusiꞋa muse nehisanageꞋya mukiꞋa veaꞋmoꞋya ani nafaꞋnema falote hisia yafena tusiꞋa muse hugahae. 15 Ani nafaꞋnemoꞋa Anumaya Koti aulagafina ala agiene kano maineno havilina onegahia-nagino atenea kanaleti aepa heno Anumaya Koti Alu Aotage AvamuꞋmoꞋa aguꞋafina hiya hugahie. 16 Hiya hisigeno mukiꞋa Isaleli kumate veaꞋnemoꞋya agai kea haviteꞋya amakuꞋa aiyahae huꞋya amakaiꞋami Anumaya Kotitega ugahae.
17 Anumayamo aulega hagoteno IlaiyaꞋma humainea kavaꞋene aminea tokiꞋyaꞋaene vigeꞋya amafaheꞋya agai kea haviteꞋya amakuꞋa aiyahae huꞋya nafaꞋneꞋamihena amakesa havigahae. Veganokano nehaya veaꞋneꞋmoꞋya agai kea haviteꞋya amakuꞋa aiyahae huꞋya fatago veaꞋneꞋmoꞋya humainaya kanale kea havigahae. AniꞋama hisayafe veaꞋneyaga AnumayamoꞋma esiafe amakuꞋa talo tala huꞋya maigahae.” huno hie.
18 Higeno SekalaiyaꞋa mage huno hie “Tamage nehapi havige nehane? Nagaya kosunagiꞋna aꞋnimoꞋa alekano lemaineanagitaꞋa hanaꞋa hutaꞋa ani kea havisuꞋe?” huno humaine. 19 Higeno ensole kanomoꞋa mage huno hie “Nagaya KepalieliꞋnae Anumaya Koti aule hetiꞋna mainogeno Anumaya KotiꞋa ani kanale kema kahapaisuafene huno hunategeꞋna emainoe. 20 Havio nagai kemoꞋma haenagaꞋa efaloteꞋma huno tamage hisigeka keꞋnia ohavinanafe menia tugogekamoꞋa tileno atalako hinageka kaiyekea ohugananagika kema hua kemoꞋa efalote huno tamage hisia kanale tugogekamoꞋa akalo hinageka kagea aikalo hugane.” huno humaine.
21 HigeꞋya kumate mainaya veaꞋmoꞋya Sekalaiyafe agava huge hugeteꞋya ayaꞋaya kanagefa Anumaya Koti noma hunalagimale nopima maiya yafe “NaꞋa higeno aupaꞋa nome.” huꞋya amakesa haviꞋya mainae. 22 Mainageno ani nopinagati hatilaviana kaiyekea nohie. Kaiyekema ohia yafe veaꞋmoꞋya amakesa mage huꞋya havimainae “Nopinaga maiya yamo alu ya agemai kano maine.” huꞋya havigeno ani kanomoꞋa ayateti avameꞋname huno kea hamapaiya-nagi avayamoꞋa tuki maine. 23 Tuki mainegeno aliꞋyamaꞋama haꞋno hia kanale nomaꞋalega umaine.
24-25 Umainegeno haenagaꞋa aꞋamoꞋa, IlisapetiꞋa aipaene maineno faefuꞋa (5) ikana falakino maineno mage hie “AnumayamoꞋa kanale ya hunatene. Nageteno veaꞋmogami amaulagafina nagayema humainoa yana ago alitalene.” huno humaine.
Yisasina ategahie huno humaine.
26 IlisapetiꞋa aipaene mainea ikana sikisiꞋa (6) ika agasetegeno Anumaya KotiꞋa nago ensole kanoa, Kepalielina, nago Kalili kotega hanea kumala, Nasaleti hutene. 27 Anumaya KotiꞋa nagola vene ofaenea munate Kepalielina hutegeno umaine. Ani munaꞋmo agia MaliaꞋe. Yosefena agaite hagemalenaya munale. Yosefena aginagomo agia TevitiꞋe.
28 KepalieliꞋa Maliate eno mage huno hie “Mainano? Anumaya KotiꞋa kagaila muse nehia munaꞋmoga AnumayamoꞋa kagaiꞋene maine.” huno hie. 29 Higeno anima hia kehena MaliaꞋa tusi amaꞋyo neꞋaino ma agesa havimaine “Ani kea naꞋane ke me nahapaiye?” huno humaine. 30 Higeno ensole kanomoꞋa agaife mage huno hie “Maliaga kolia ohuo. Anumaya KotiꞋa kagaifena aipa kanale hunegate 31 Havio kagaya kaipa ya huteka ne nafaꞋne ateteka agia YisasiꞋe huka malo.
32-33 Ani nafaꞋnemoꞋa agi hanesia kano mainesigeꞋya veaꞋmoꞋya ‘Anale mainea Anumaya Koti nafaꞋne maine.’ huꞋya hugahae. AginagomoꞋa, Teviti kava yagaimainea tokiyaꞋa Anumaya KotiꞋa amisigeno Yekopu nofi veate agola kava yagaino maineno kava yagaisia tokiyaꞋa hanege hanege huno hanesigeno haꞋno ohugahie.” huno humaine.
34 Higeno MaliaꞋa ensole kanomofe mage huno hie “HanaꞋa huꞋna aniꞋa hisue? Nagaya velela omainoa muna mainoe.” huno hie. 35 Higeno ensole kanomoꞋa agaife mage huno hie “Anumaya Kotina Alu Aotage AvamuꞋamoꞋa kagaite emaisigeno anale mainea Anumaya Kotina tokiyaꞋamoꞋa aiso hugatesigeka maineka nafaꞋnea ategane. Atesanana alu aotage kanale nafaꞋne mainesigeꞋya veaꞋmoꞋya ani nafaꞋnehena ‘Anumaya Kotina neꞋamo maine.’ huꞋya hugahae. 36 Havio neꞋitakamoꞋa, IlisapetiꞋa, alekano lemaineanagi aipaene maineanagino ne nafaꞋne ategahie. ‘Namo a maine.’ huꞋya humainaya alekanomoꞋa aipaene mainea ikamaꞋa sikisiꞋa (6) ika agasemaine. 37 Anumaya KotiꞋa tagaya ohuteꞋasina yanagi afaꞋa hugahie.” huno humaine.
38 Higeno MaliaꞋa mage huno hie “Nagaya ago Anumayamo aliꞋya muna mainoe. Hana kemoꞋa kanalelagino nagaitela falote hunategahie.” huno hie. Higeno ensole kanomoꞋa anileti neꞋataleno umaine.
MaliaꞋa Ilisapeti mogemaine
39 MaliaꞋa ani kanafina hetino aiyayeno agoꞋyafi haino Yutia kotega hanea kumate umaine. 40 Uvayi huno Sekalaiya nopi hai faleno Ilisapetina falu fala hutene.
41-42 Falu fala huneꞋategeno IlisapetiꞋa MaliaꞋma hia kea nehavigeno aipafima mainea nafaꞋnemoꞋa kanage kanage higeno Anumaya Koti Alu Aotage AvamuꞋmoꞋa Ilisapetina aguꞋafina hiya higeno IlisapetiꞋa ala kefiti mage huno hie “Kagaya mukiꞋa aꞋneyaga amakaseka mainanageno Anumaya KotiꞋa kanale muse ya kamianagika atesana nafaꞋnea kanale muse ya alimainea nafaꞋne kaipafina maine. 43 Nagaya hanaꞋa a mainogeka AnumayaniꞋamona itaꞋamoga nagaitega neꞋane. 44 Havio hu falu fala hunatana kea nagesafi nehavugeno naipafinaga mainea nafaꞋnemoꞋa tusi muse nehuno kanage kanage nehie. 45 Kagaya Maliaga Anumayamo ensole kanomoꞋa kahapaiya kea ago tamage huno falote hugahie huka ago havika kagupi maleka kametiti humainanafe Anumaya KotiꞋa muse hisana yana ago kamine.” huno hie.
MaliaꞋa kasagoꞋya kea humaine.
46-47 MaliaꞋa mage huno hie “Nagu nafaꞋnemoꞋa Anumayamo agi alisaga nehigeno nagu namena alinegatia Anumaya KotiniꞋamofena tusi muse nehue. 48 Muse nehuanagiꞋna nagaya afa munalagiꞋna aliꞋya munaꞋa mainoanagi agaiꞋa nagaila kalagi ainateanagiꞋna ani nafaꞋnea atesugeꞋya mukiꞋa veala meni veaꞋnene haenagama falote hisaya veaꞋnene nagaifena ‘Ma aꞋmona Anumaya KotiꞋa tusiꞋa muse hisia ya aminea ale.’ huꞋya hugahae.
49 Tusi tokiyaꞋa hanea kanomoꞋa nagaila kanale ya hunatene. Ani kanomo agia ‘Kanale alu aotage kano.’ maine huꞋya nehae. 50 Agaife ‘Ala kanoꞋni maine.’ huꞋya humai-naya veaꞋmofena menima mainaya veaꞋnene haenaga veaꞋmogamifeꞋene tusiꞋa kalagi aimaine. 51 Ayateti tokiya aliꞋyana alimaineanagino ‘Tagaya ala veaꞋne mainone.’ huꞋya amakuꞋafinaga nehaviꞋya amaugafa aliꞋya haimainaya amakesa haviya veaꞋmogamina amanatitalene.
52 TokiyaꞋage kava vayala alino mopafi amataleneanagi amakima omale veaꞋmogamina amakia alisaga humaine. 53 AmakuꞋafinaga amakaꞋ-nelea veaꞋmogamina kanale yana kasagoꞋya alino amamigeno amamu higeꞋya havatemainae. MukiꞋa yaꞋamima hanea veala oꞋamamino humategeꞋya ataleꞋya umainae. 54-55 TaginagomoꞋa ApalahamuꞋene agaiꞋa nofi veaꞋnene haenagama falote hisaya veaꞋnenefe mage huno hie ‘Kalagi ailamategahue.’ huno nayona humainea kele menia agesa haviteno Isaleli kumate aliꞋya vayaꞋamogamina amaya humaine.” huno MaliaꞋa humaine. 56 MaliaꞋa IlisapetiꞋene tagufa (3) ika maiteno kumaꞋalega eteno umaine.
MaliaꞋa yagamefiti Anumayamo aki alisaka humaine.
57 Ilisapetina inamu ya alitegeno ne nafaꞋne atene. 58 AtetegeꞋya agaiꞋa kumate veaꞋnene agaiꞋa nofi veaꞋnene Anumaya KotiꞋa kalagi aitenea yafena haviteꞋya tusiꞋa muse humainae.
59-60 Nago sota maiteꞋya ani ne nafaꞋnemona agoya anoꞋya taga hisia ya agegahune huꞋya emaineꞋya nefate hamoꞋya hugahe agia SekalaiyaꞋe huꞋya malegahe nehageno itaꞋamoꞋa “AꞋao agia YoniꞋe huta malegahune.” huno hie. 61 HigeꞋya veaꞋmoꞋya mage huꞋya hae “NaꞋa higeka ani agia nemalane? Tanakai nofi veaꞋmoga-mina aniꞋa amakia omalene.” huꞋya hae.
62 Nefa tugokemoꞋa tilemainegeno agema oꞋaiya yafe avameꞋname huꞋya “Na agi malegane?” huꞋya havigae. 63 Havigageno avameꞋname huno “Avo kaesua ya namiho.” huno higeꞋya amigeno “Agia YoniꞋe.” huno kaegeꞋya ageteꞋya vayaꞋmoꞋya “Nohaya kava hie.” huꞋya amamaꞋyoa aiye. 64 Ani agia kaemaletegeno aupaꞋa Sekalaiya tugokemoꞋa akalo higeno avefuꞋnamoꞋa ayaꞋaya higeno kaiyekea huno Anumaya Koti agia alisaga hie. 65 Ani kumate veaꞋmoꞋya tusiꞋa amamaꞋyo aigeꞋya ani yafena ke hu atile male hageno ani kemoꞋa mukiꞋa Yutia agoꞋya hanea kumatega ute ete higeꞋya havimainae. 66 HaviteꞋya veaꞋmoꞋya haviꞋya amakupi maleteꞋya mage huꞋya hae “AnumayamoꞋa aya hugahe agaiꞋene maineafe haenagaꞋa mani nafaꞋnemoꞋa hanaꞋa hisia nafaꞋne maigahie?” huꞋya humainae.
Sekalaiya yagame.
67-68 NefaꞋa, Sekalaiyana aguꞋafi Anumaya Kotina Alu Aotage AvamuaꞋamoꞋa me hiya huno havatemainegeno Anumaya Koti aune kano kana huno mage hie “Isaleli veaꞋmogati Anumaya KotiꞋa agaiꞋa veaꞋnele me laya huno taugafa aligatimainea yafe agia alisaga hisune. 69 TevitiꞋa Anumaya Kotina aliꞋya kanoꞋamo nofi anagapiti nago tokiyaꞋage kanoa taugafa aligatisia kano ali hetitene. 70 Ani kea Anumaya KotiꞋa nayona alu aotage aune vayaꞋamogami amavayafiti hu falote humaineane. 71 Mage huꞋya humainae ‘Kame vayatimoꞋya ago tatafa hulinaya vayaꞋmogamiꞋene tagaife amaipa kafa henelataya vayaꞋmogami amayapitila tavaleno taugafa aligatigahie.’ 72 Anumaya KotiꞋa taginagomofe ‘AigetamateꞋna tamaya hugahue.’ huno humainea yana hugahie. Alu aotage huno alino hagelafilateneafe agesa havi havi huno agekani otategahie.
73 Alino hagelafilatenea kemona hulokiya vaino taginagomona Apalahamufe humaineane. Nayoma humainea kea menia ani kava hisiafe hie. 74-75 Anima hulokiya vaimalenea kemoꞋa mage huno humaine ‘Nagaya kame vayatamimogami amayapitila tamavalesaga huꞋna tamaugafa aligatisugetama tamakaya kolia ohutama mukiꞋa kanafina tamahaimula hanesigetama kefo yatamia omale veaꞋnea fatago kavaꞋage hutama nagai naulela aliꞋyaniꞋa aligahae.’ huno humaineane. 76-78 Humaineanagi kagaya Yoniga nafaꞋneꞋnimogae haenagaꞋa kagaifena ‘Anafinaga mainea Anumaya Kotina aune kanoꞋa mainane.’ huꞋya hugahae. Kagaya uhagoteka Anumayamo visia kana talo tala hugane. Anumaya KotiꞋa tagaifena tusiya huno kalagi ailateneafe agaiꞋa veaꞋnea kefo yaꞋamia agetamateno ataleꞋamateno amaku amamena aligatisiafe humavelisanageꞋya havigahae. Monafinagati halemainea kanoa falote huno tagaiteꞋma esiana ani kava hugahie. 79 Hani yapi maineta faligahe humainona veaꞋmogata ayevasa hulateno ako huta maisuna kate tategahe egahie.” huno humaine. 80 Ani nafaꞋnemoꞋa ala huno agu agesamoꞋa tokiyaꞋage higeno kaꞋme kotega umaiteno Isaleli veaꞋmogami amaulagale efalote higeꞋya agemainae.