Leveleseni
Mani kemona agimo aepaꞋa Kanite kefina mage huno hane “Fala kimainea yana alino fufute maleno ali falote humalene.” huno humaine. Mani avona haenagama falote hisia yana Yisasi KalaisiꞋa himona kana yapi ali falote huno Yonina ave-ligeno YoniꞋa kae-malenegeta nehavune. YoniꞋa ani kanafina kosuna leteno nagola ti amuꞋnopi hanea kumate kina nopi maineno mani yaꞋyaga himona kana yapi ageteno kae-malene. YisasiꞋa faliteno hetino ikapinaga haitegeno YoniꞋa sikisiti faefuꞋa (65) kafu agava maineno Leveleseni kea kae-malene.
1
Mani kemona aepaꞋamoꞋa maꞋa humaine.
1 Nagaya YoniꞋnae Yisasi KalaisiꞋa naveligeꞋna ageteꞋna mani kea kaeꞋna tamahapaigahe nehue. Nayona mani kemoꞋa fala-kino haneanagino Anumaya KotiꞋa ani kanamoꞋa aupaꞋa falote hisia yana Yisasi Kalaisina agaiꞋa aliꞋya veaꞋne amave-lisiafene huno Yonina ave-ligeno kae-malene. YisasiꞋa ensole kanoꞋa hutegeno nagaya agai aliꞋyama neꞋalua kanoa, Yoninile, eaꞋamo mani yaꞋyaga me naveli-maine. 2 Me naveligeꞋna age-mainoa yafeꞋene Anumaya Koti kene Yisasi Kalaisi humainea kene aliꞋna tamage huꞋna tamahanepauve. 3 Ma avopima kae-maloa kea ago aupaꞋa falote hisia yafe aune laga huno humainea kema hapaliꞋya havisaya veaꞋnene haviteꞋya akaveꞋma malesaya veaꞋnene tusiꞋa muse hugahae.
YoniꞋa seveniꞋa (7) kumate hanea mono note avona kaeno amamine.
4 Nagaya YoniꞋnae Esia kotega seveniꞋa (7) mono noma hanea veaꞋmogatamale mani avona kaeꞋna nelamamue.
Anumaya KotiꞋa nayona maineanagino menienena maineanagino haenagaꞋa maisia kanogino agaiꞋa kava yagai-mainea siamo aulega seveniꞋa (7) AvamuꞋmoꞋya hetiꞋya mainayanagiꞋya kayone hisaya yaꞋamiene tamaipa falu hisia yaꞋamiene tamamisae. 5 Tamamisageno Yisasi KalaisiꞋa fatago huno Anumaya Koti kema hamapai-mainea kanomoꞋa fali-mainaya veapitila uhagote-lateno heti-maineanagino mukiꞋa veaꞋnema fali-mainesafiti hetisaya katia valilatene. MukiꞋa mopafima mainaya sauve vayaꞋmogamina sauveꞋamimoꞋa agaiꞋage maineanagino kayone hisia yamaꞋaene tamaipamo falu hisia yamaꞋaene tamamisie. Tagaifena hau ayamopafi haigeno agaiꞋa kolamaꞋa ailaki-talenea yateti mukiꞋa kefo yatimoꞋa aigagilateneanagino agola ali kalu hetalene. 6 He-taleneanagino Anumaya KotiꞋa kava yagailatesia yapi tavaleno tategeta mainonanagita tagayama Nelafa Anumaya Koti aliꞋyama neꞋalita agima alisaga huta musema hutesunafene huno hulatene. Hulateneanagita mukiꞋa kanafina agai agia alisaga hisunageno tokiyaꞋage hale yamaꞋamoꞋa agola hanege hanege huno hanesie. Tamage.
7 Ageho YisasiꞋa siate maiteno egahigi mukiꞋa amakaveꞋnoma huteteꞋya augafafima kevema aye-mainaya veaꞋnene mukiꞋa ma mopafima mainaya veaꞋmoꞋyaene ageteꞋya tusiya huꞋya hamau huteꞋya avi tegahae. E, ani yana tamage huno falote hugahie. Tamage.
8 Ala Anumaya KotiꞋa mage huno humaine “Nagaya nagaiꞋniꞋa mukiꞋa tokiyamona aepaꞋa mainoanagiꞋna mukiꞋa yatela kava yagai-mainoafe alivayayesua kanoa tamage huꞋna mainoe. Nayo kanafina mainoanagiꞋna menia mainoanagiꞋna haenagaꞋa maigahue. TusiꞋa tokiyaꞋnia hanea kava kano mainoe.” huno hu-maineane.
YoniꞋa Yisasina age-maine.
9 Nagaya YoniꞋnae neputamimoꞋna tamakaiꞋenena YisasiꞋene ailokaeta mainona yafe tusiꞋa kana yaꞋene tagata aiya yaꞋene falote hianagi Anumaya KotiꞋa kava yagailategeta mailava huta tokiyaꞋage huta mainone. Nagaya Anumaya Koti kene YisasiꞋa tagaiꞋma hulatenea mono kene huhaleꞋna hua yateti navaleꞋya Patimosia ti amuꞋnopi hanea kumate kina hunatageꞋna mainoe. 10 Mainogi nago SotaꞋyupa Alu Aotage AvamuꞋmoꞋa tokiyaꞋage huno natafa higeꞋna nehavugeno nakavelagati nagola ala kegefamoꞋa ufema nehaya avamete huno agea aigeꞋna havimainoe. 11 Ani kemoꞋa mage huno humaine “MukiꞋa yama agesana yana avopi kaeteka atalegeno seveniꞋa (7) kumate hanea mono note veatega vino. Efesusiene Simenaene Pegamumuene Taiyatailaene Satisiene Filatelefiene LeotisiaꞋene vino.” huno humaine.
12 HigeꞋna kema nahapaiya kanoma agesuafene huꞋna maiyahae huꞋna agoana seveniꞋa (7) lamua kanileta yafateti talo humale lamua hanegeꞋna age-mainoe. 13 Agoa lamuyagamo amuꞋnopina nago kanoa, ikapinagati emainea kanoa vayaꞋmo atenea nafaꞋnemo augafa kana kanoa hetino mainegeno ayaꞋaya kenamoꞋa aiyalega vai-talegeno tavigeno kanileta yafateti talo humale amuꞋnofila aigagino haifiꞋyafale hu-malenegeꞋna agoe. 14 Agogeno ayolagefamoꞋa efeꞋage huno sipi sipimo ayolagefaleti talo humale nofi kana huteno efeꞋage sia kana nehigeno aulagamoꞋa ata nefemoꞋma hia avamete humaine. 15 Higeno aiyamoꞋa nagola atafima kae-malageno teno tokiyaꞋage huno hale yamaꞋaene kanileta yafa kana nehigeno agema aiya agemoꞋa paugegefa nehigeno ala timo agemoꞋma neꞋaiya avamete kava huno aimaine. 16 Ayapina seveniꞋa (7) kaꞋnefi atafa hu-linegeno avayafitila tole kaiyaga aveꞋneꞋne naepe kaꞋyona anikofi-linegeno augosamoꞋa yagemoꞋma hia kava huno aigalu galu huno aivasa humaine. 17 Aigalu galu higeꞋna neꞋageꞋna fali-mainea vaya kana huꞋna aiyafi nagoꞋya aye-mainogeno tamaga ayana naugafale maleno mage huno hie “Kolia ohuo nagaya mukiꞋa tokiyamona aepaꞋa mainoanagiꞋna nagaya uhagoteꞋna maiteꞋna haenagalafana maiteꞋna huꞋna mainoa kano mainoe. 18 Nagaya nahaimuꞋene kano mainoe. Nayona ago fali-mainoanagi ago hetiꞋna haegafa huꞋna agola mukiꞋa kanafina maige maige huꞋna mainoanagiꞋna veaꞋma nefalia yaꞋene fali-mainaya veaꞋmoꞋya mainaya kumate ki nofitela ali-lineꞋna ani yapitiꞋma amavaleꞋna amatalesua himamuꞋnia hane. 19 Haneafe kagaya menima falote higeka agana yaꞋene haenagama falote hisia yaꞋenena avopi kae-malo. 20 SeveniꞋa (7) kaꞋnefiꞋene seveniꞋa (7) kanileta yafateti talo humalenaya lamuenena tamaga nayapima hanegeka agana yamoꞋa falaki-mainea yamo aepaꞋa kahapaigahue. SeveniꞋa (7) kaꞋnefiꞋmoꞋa maꞋa humaine seveniꞋa (7) kumateꞋma Yisasife haviꞋya melitalu nehaya veate kava vayafe* humaine. SeveniꞋa (7) lamumoꞋa ani seveniꞋa (7) mono noꞋyagafi Yisasife haviꞋya melitalu nehaya veafe humaine.”