Hibru
Hibru nɨbi bɨ Krais lau adö mɨdeila gau kalɨp köp kalɨ kƚiñ rɨka
1
God Ñɨ nɨpe hanɨp manö aij ña
Nöd God nɨpe apɨs bac hon Juda nɨbi bɨ gau kalɨp manö hagnɨg, bɨ manö hagep nɨpe gau adan ke ke gasɨ ñö, kale nɨŋöm hag ñɨmɨdal. Pen ñɨn hain mɨdpun i, Ñɨ nɨpe ke yuö apöm hanɨp manö hag ña. God hagö, Ñɨ nɨpe ram mɨnöŋ nan gau magöŋhalö hadame dagol gau gɨ la. God hagö, Ñɨ nɨpe ram mɨnöŋ nan gau magöŋhalö abad mɨdeinab. * Jon 1:3 Nap mailö kub halö yabɨƚ mɨdöp rö u, Ñɨ u rö nöp mailö kub halö yabɨƚ mɨdöp. Nap bɨ aigege bɨ rö mɨdöp u, Ñɨ nɨpe u rö nöp unbö rö nöp mɨdöp. Ñɨ manö kƚö yabɨƚ nɨpe hagö, ram mɨnöŋ nan gau magöŋhalö mɨdep nöp mɨdöp. Ñɨ nɨpe apöm, hanɨp nɨbi bɨ magöŋhalö a göm umöm, nɨbi bɨ magöŋhalö gau nan si nan naij gɨpal gau magöŋhalö ƚɨk gɨ ke gau yuöm, kauyaŋ urak ap jak Nap kƚö ke halö mɨdöp u ñɨmagö yɨjɨg böŋ lau adö asɨköm aip mɨdpil. * Ap 2:33-34; Kol 1:20; Hib 8:1
Ejol gau yagol rö mɨdpal; God Ñɨ me Bɨ Kub yabɨƚ mɨdöp
God nɨpe gö, Krais nɨpe ejol gau rö wasö; nɨpe Bɨ Kub mɨdöp. God Krais nɨp Ñɨ yad a ga u, hib nɨpe ejol hib rö wasö; hib nɨpe i adö laŋol au mɨdöp. * Plp 2:9 God Manö adɨŋ ap God manö hagöm haga,
“Yad mɨñi nöp hagabin, ne Ñɨ yad mɨdpan,
yad Nap ne mɨdpin,” a ga.
Pen manö anɨbu God nɨpe ejol ap hagaga. * Ap 13:33; 2Sa 7:14; 1Kr 17:13 Pen Ñɨ nɨpe nöd u mɨnöŋ naböŋ i yunɨg ga ñɨn u, God nɨpe ejol nɨpe kalɨp haga,
“God ejol gau magöŋhalö hib nɨpe haglö adö araŋ,” a ga. * Ro 8:29
Pen ejol gau manö hagöm God haga,
“God ejol nɨpe gau gö,
ñɨn ap yɨgön rö udöm aubal.
Wög gɨ ñeb bɨ nɨpe gau gö,
ñɨn ap mab mɨɫaŋ rö udöm aubal,” a ga. * Sam 104:4
Pen God nɨpe Ñɨ nɨpe nɨp manö hagöm haga,
“Ne God. Ne Kiŋ pör nöp pör nöp mɨdmön,
nɨbi bɨ ne gau pör nöp abad mɨdeinabön.
Nɨbi bɨ ne abad mɨdmön, gɨ aij gɨmön,
kabö rö nöp gɨmön, abad mɨdeinabön. * Sam 45:6-7
Nɨbi bɨ gɨ aij gɨlö,
ne ñɨñɨ lɨban,
pen nɨbi bɨ nan si nan naij gɨlö,
ne mulu kal nɨŋban.
Anɨb u, yad, God ne, gɨnö,
ne nöp Bɨ Kub ke yabɨƚ mɨdpan;
bɨ nɨŋeb ne gau mo ne gau mɨdpal,” a ga.
10 God manö rɨmnap halö hagöm haga,
“Bɨ Kub, ne ke hadame dagol gau nöp mɨdmön,
mɨnöŋ naböŋ iƚ i gɨ löm, kumi kabö au ñɨmagö ne gɨ lɨna. * Sam 102:25-27
11-12 Nan anɨb gau magö ap mɨdöm, ur gɨnɨg gab,
pen ne mɨdep nöp mɨdeinabön.
Nan anɨb gau, waƚɨj papɨƚ lɨ lugö,
ud asɨk ke au löm, gɨsön nɨbö rol gɨpal rö gɨnabön.
Pen ne Bɨ Kub, nöd mɨdmɨdan rö,
uri anɨb unbö rö nöp mɨdpan;
ke ap lagnabön; uri mɨdpan rö
hainö anɨb unbö rö nöp nöp pör pör nöp mɨdeinabön,” a ga.
13 God Manö adɨŋ ap God manö hagöm haga,
“Ne ñɨmagö yɨjɨg böŋ yad aui asɨk mɨdö,
nan nɨhön nɨhön nöp kauaƚ mauaƚ rö mɨdöp gau magöŋhalö,
raƚa mɨgan ne gau lɨnabin,” a ga.
Pen manö anɨbu God nɨpe ejol ap hagaga. * Sam 110:1 14 Anɨb u, ejol gau nɨhön rö mɨdpal? God kalɨp hag yuö, nɨp wög gɨ ñöl gɨ, nɨbi bɨ Krais ud kamɨŋ yuö kumi kabö adö laŋ au God aip pör nöp kamɨŋ mɨdeinaböl gau kalɨp gɨ ñɨbal. * Sam 34:7; 91:11

*1:2: Jon 1:3

*1:3: Ap 2:33-34; Kol 1:20; Hib 8:1

*1:4: Plp 2:9

*1:5: Ap 13:33; 2Sa 7:14; 1Kr 17:13

*1:6: Ro 8:29

*1:7: Sam 104:4

*1:8: Sam 45:6-7

*1:10: Sam 102:25-27

*1:13: Sam 110:1

*1:14: Sam 34:7; 91:11