Paul di bura
Ephesus vene
rofu
Ago di ini adina
Paul di bura Ephesus vene rofu di ouresi ago bi “Sei di nirorotari reyo mokena dada, beika baika omari ma konori amededi tau noibanu Keriso dudu ukita rigo” (1.10). Ini usa usa nina ago bi Sei di vene yaku mina nirorotari rena ago usi ina dada ameyagane. Makai amiye tau noibanu bi Iesu Keriso dudu yokoi maka nigedi.
Ephesus vene rofu ouresi bura renari, mina yokoi maka nina ago niyo bi Baba Sei ini vene auba reyo di ida rofu. Ka bi gokai ina bi ini Mida Iesu Keriso dudu ini vegu no koite makusi erufuyo, ma gokai Vima kikifa yaku Sei di nitore reyo ago tora niyo bi rama niyaine. Kamini ini ago regode ere bi bura vededi vene usa usa nido bi Keriso dudu egogo resi yokoi maka niyagane.
Ago bouna bouna mina bura renari oteimadedi Sei di vene bi yokoi maka niyadi Keriso dudu: ekalesia vene bi roaita kana, ma Keriso bi ini ada; o yava kana, ma Keriso bi ini moi gira redo fore; o rema kana, ma Keriso bi ini maruka. Mina bura bi ini mokena tora tora nufa, Sei di buni tora gade Keriso dudu mina niyo dada. Beika baika tau noibanu bi Keriso di uka mana, ori sisika rena, vegu no koite makuna, buni tora gade ma vegu no nufa de di vabarari kana niyo.
Beika sina ideri
Ago di ini adina 1.1–2
Keriso ma ekalesia vene 1.3—3.21
Vegu ruaka Keriso ri 4.1—6.20
Metona ago 6.21–24
1
Na bi Paul, kaere bi Sei di ura dudu Iesu Keriso di nifeidena amiye — Acts 18.19–21; 19.1
Sei di vene Ephesus ri* Ephesus ri bura bedakai mina ago nufa de. amededi, kaere Iesu Keriso rofu vegu rama rededi, ya rofu bura reida mini:
Uni Baba Sei ma Varika amiye Iesu Keriso di buni tora gade ma uka amuta ya maragane.
Vima di buni tora gade Keriso dudu
Uni Varika amiye Iesu Keriso di Baba kaere bi Sei, bi ini roka moi odoro rinadi, kaere bi Keriso dudu oma di gaganiri, vima di buni tora gade noibanu una maro. Kamini oma ma kono bi rina koderi, Sei yaku una auba reyo, ye una bi ini nemokori kikifa ma butigi yokoi de dudu inasa amebigifa.
Ini uka mana dudu senagi nirorotari reyo bi Iesu Keriso dudu ini mida mida kana, una vadema aego—mina bi ini buni ma ura rena dada. Ye ini buni tora gade vabara dada ini roka moi odoro rinadi. Adina mina ini uka maro Amiye dudu una rofu maro! Ini dava dudu ina yaku una voi resi erufuyo; mina bi uni vegu no koite makuyo, ini buni tora gade bi tora gade gade dada. Col 1.14 Bi mokena tora ma ada yora tau noibanu dudu mina una mai buaru reyo!
Ini ura di nisui ago una rofu moi ogau riyo, ini nirorotari rena dada; mina bi Keriso dudu dogo resi aeyo. 10 Mina bi meda nemoko rama nigori, ini nirorotari reyo mokena dada, beika baika omari ma konori amededi tau noibanu Keriso dudu ukita rigo.
11 Ina dudu Baba di ini beika baika moiyafa, adina ini nirorotari rena ago senagi mokeyo makai kana rego, mina bi kaere, ini ura di mokena dada, beika baika tau noibanu moimai redo. 12 Ye una kaere ouresi Keriso rofu uka mokena aeyafa vene, bi ini vabara moi odoro riyaganedi!
13 Ya vene yaku ini ago rama, mina yi moi vegu rina di ago buni, neidegasa ya ka ina rofu mokena vari gira aeyadi ma nitore reyo Vima kikifa di bera ya fafau aeyo. 14 Mina Vima kikifa bi Sei yaku ini vene ini beika baika mago di rama niyaine, nitore rena ago mina moigifa mamo, ye ini vabara moi odoro rigifa.
Paul di usa usa nina
15 Mina resi ya mokena vari gira Varika amiye Iesu rofu aesi Sei di vene tau noibanu uka maradi, mina neideyaka dada, 16 na bi toga toga Sei rofu buni tora gade manari, ya fafau de feresi nai usa usa nina tauri ya rofu mokeida. 17 Nai usa nida bi uni Varika amiye Iesu Keriso di Sei, kaere bi vabara di Baba, ina yaku ini Vima ya maraine, ye Vima yaku ya rofu Sei moi ogau rigo; makai bi ya ya diba ina. 18 Na usa usa nida bi yi mokena moi vabara riyaine, ye uka mokena ya rofu raka niyo, mina diba niyagane; gokai ini nitore reyo ago buni tora gade ini vene rofu bi beika baika tau nufa. 19 Ka Sei di vava bi isivaga iniye una mokena vari gira aesifa vene rofu. Mina vava uni ideri moimai redo bi ini vava isivaga iniye mini; 20 mina dudu Keriso muyenari gutuna dadi rae resi oma di sanari, ini vana rama eta rofu moi ameinu reyo. Ps 110.1 21 Keriso mironari ourefeidena vene, vava nufa vene ma varika vene ina tau noibanu odoro ourefeidedo; ini vava di roka bi gua meda ma meda baegori, tau vakoi di roka ebu redo. 22 Sei yaku mina beika baika tau noibanu Keriso di yuka gabireri aesi tau noibanu di Varika amiye isivaga iniye kana, ekalesia vene maro. Ps 8.6 Col 1.18 23 Mina ekalesia vene bi Keriso di roaita kana; Keriso bi beika tau noibanu ideri amedo ma mina vene bi ina yaku moi vata baena iniye reyo.

1:1: Acts 18.19–21; 19.1

*1:1: Ephesus ri bura bedakai mina ago nufa de.

1:7: Col 1.14

1:20: Ps 110.1

1:22: Ps 8.6

1:22: Col 1.18