4
Iau manga vargat iu ta ra mata i God, ma Kristo Iesu, nina ba na kure ra umana launa ma ra umana minat. ta kana vinavana mulai uti ma kana varkurai: Una varvai ta ra tinata; una ongor ta ra bo na kilala, ma ra kaina kilala, una varvartakun ot, una varpit, una vargat, ta ra kini vovovon ma ra vartovo. Tago na vut boko ra kilala ba pa diat a mainge mule ra takodo na vartovo; ma, da kadia kaina mamainga, diat a vapeal kadia umana tena vartovo, tago di vala mainge upi diat a valongore ta kalamana magit; ma diat a valingan vaire vue ra talinga i diat kan ra dovotina upi ra varvai vakuku. Ma una minana ta ra lavur magit par, una pidik tar ta ra magit na kinadik, una pait ra papalum na tena varvai, ma una pait ot pa kaum tiniba. Iau papait na virua da ra tinabar, ma i maravai ra bung ba ina vana tana. Iau tar varvarubu ta ra bo na vinarubu, iau tar pait ot pa kaugu nivut, iau tar vatur vadekdek vake ra nurnur; papa gori di tar vung vake ra kere na mangamangana takodo ure iau, nina ba ra Luluai, ra takodo na tena varkurai, na tul tar ia tagu ta nam ra bung; ma vakir tagu kaka, ta diat par bula dia tar mainge kana vinavana mulai uti.
A tinata tadav Timoteo iat
Una ongor pi una vana lulut uti piragu; 10 tago Demas i ga takap kan iau, tago i ga mari go ra rakarakan a gunagunan, ma i vana Tesalonika; ma Kresko i vana uro Galatia, ma Tito i vana Dalmatia. 11 Luka ka i ki piragu. Una ben pa Marko, ma amur a varagur me uti; tago i topa iau ure ra papalum. 12 Iau tar tulue Tikiko uro Epeso. 13 A olovoi iau ga vana kan ia aro Troas pire Karpo, ba una vana uti, una kap ia, ma ra umana buk, ma koko una nuk vue ra umana buk di pait ia ma ra pal a vavaguai. 14 Alekandro, ra tena madaka ta ra palariam i gobol, i ga pait mangoro na kaina magit piragu; a Luluai na bali ia pirana da kana mangamangana; 15 ma u, una balaure u tana; tago i tar tur bat kaveve tinata. 16 Ba iau ga tatata tavuna bat iau boko, pa ta tikai i ga maravut iau, diat par.dia lop kan iau; boina ba koko da luk tar ia ta diat. 17 Ma ra Luluai i ga maravut iau ma i ga vadekdek iau; upi ina pait ot pa ra bo na varvai, ma upi diat par ra umana Tematana diat a valongore; ma di ga valaun iau kan ra ngie ra leon. 18 A Luluai na valaun iau boko ta ra magit i kaina parika, ma na vaki iau bula ta kana varkurai ra bala na bakut; da tul tar ia tana ra variru pa na mutu. Amen.
A mutuaina tinata na varvagai
19 Una vatatabe Priska ma Akuila, ma diat ra tarai ta ra kuba i Onesiporo. 20 Erasto i tar ki Korinto; ma iau ga vana kan Tropimo ta ra gunan Mileto, tago i mait. 21 Una ongor ma ra vinavana uti ba pa i ti vut boko ra kilala na mudian. Ubulo i vatatabe u, ma Puden, ma Lino, ma Klaudia, ma diat ra umana tura i dat par.
22 A Luluai na ki ta ra tulungeam. A varmari tadav avat.