1 Ta ra ava ra Dekdek Muka pa i kubu mule ra umana bung nina ba na varkurai ta diat?

Ta ra ava diat dia nunure pa dia gire kana umana bung na varkurai?

2 A umana tena varpiam dia kari vue ra umana vat na langun;

Ma dia ra pa ra umana kikil na sip ma dia tabar diat.

3 Dia korot vue ra as kai ra nat na ling,

Ma dia tak pa ra bulumakau kai ra ua na vavina ure ta vuvung varirap.

4 Dia tulan vue diat dia ki na niiba kan ra nga;

Damana ra umana luveana ta ra gunan dia parau varurung.

5 Ea, da ra umana kuabar na as ta ra bil

Dia vanavana upi kadia varvakai, ma dia tikan vurvurbit upi ra nian;

A nian ai ra umana natu i diat i ki ta ra bil.

6 Dia dodoko ta ra umauma na kon,

Ma dia tangatanga ta ra umauma na vain kai ra umana tena varpiam.

7 Dia vava ta ra marum ma pa ta mal,

Pa kadia ta mal na tubatuba ure ra madoldol.

8 A bata marama ra ul a luana i puk ra paka i diat,

Ma dia tur bakit ta ra umana vat.

9 (Ta umana dia ra vue ra nat na ling kan ra u i nagu,

Ma dia ra pa natu i ra luveana upi ra vuvung varirap.)

10 Dia vana vurvurbit ma pa kadia ta mal;

Ma dia ki na mulmulum ba dia kap ra umana vinvin kon;

11 Dia bing ra dangi ta ra uma na oliva;

Ma dia mar ba dia ruarua ra tung na polo na vuai na vain.

12 A umana minait dia oir ta ra bala na pia na pal,

Ma ra umana kinkin dia kukukula;

Ma God i nur vue kadia niaring.

13 Ta umana dia tur bat ra kapa,

Dia tuptup ure ra umana nga tana,

Ma pa dia mainge ba diat a mur diat.

14 Ra tena vardodoko i tut ta ra kavunvun,

Upi na doko ra umana luveana ma diat dia ki na niiba;

Ma i da ra tena nilong ta ra marum.

15 Ra tena nipo i ki pa ra talvivi,

I pulu ra matana,

Ma i biti: Pa ta tikai na gire iau.

16 Ta ra marum dia rerebeng ma dia dola ruk ta ra umana pal;

Dia ki parau ta ra keake,

Tago pa dia nunure ra kapa.

17 Ra malana i da ra malur na minat pire diat;

Tago dia bartalaina ma ra lavur magit na bobotoi.

18 Amutal biti: A lovon i kap vue diat;

Ra tinata na varvabilak i ki taun kadia pia;

Pa dia rua mule kadia uma na vain.

19 A kilala na keake ma ra malamalapang dir vapanie vue ra tava alir maro ra lualuana;

Damana ra ruarua na tulungen i pait ia pire diat dia varpiam.

20 Kana gunan iat na nuk vue,

Pa da nuk pa mule ra iangina;

Da rubat vue ra varpiam da ra davai i maroto.

21 I vakaina nina i biu,

Ma pa i pait ra boina pire ra ua na vavina. 22 la kaka God i valolokon ra nilaun kai ra umana rangrangina ta ra dekdekina;

Dia lagalagar mulai ba dia ga nuk ia ba diat a mat.

23 I tul tar diat pi diat a ki bulu, ma diat a tur padikat;

Ma i mataure kadia lavur vinavana.

24 Di vangala diat ure ta paupau kilala, ma dia vana ka;

Dia makuk ma dia maranga da ra davai;

Ma di doko diat da di doko ra kon.

25 Ona pata, to ia bar na takun iau ba iau vavaongo,

Ma na varvai ba kaugu tinata ia ra tinata vakuku?